Garvita Odia
ସମ୍ବଲପୁର: ଆଜି ପବିତ୍ର ମହାଳୟା ତିଥିରେ ଅଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀ ଦୁର୍ ଧବଳମୁଖୀ ବେଶ ବା ଗଙ୍ଗାବେଶ ଧାରଣ କରନ୍ତି। ବର୍ଷ ତମାମ ସିନ୍ଦୁର ବର୍ଣ୍ଣରେ ଦର୍ଶନ ଦେଉଥିବା ମା’ ସମଲେଶ୍ୱରୀ। କେବଳ ମହାଳୟାରେ ଗଙ୍ଗାବେଶରେ ଦର୍ଶନ ଦେବାର ପରମ୍ପରା ରହିଛି l ବର୍ଷରେ ଥରେ ମା’ ଧବଳମୁଖୀରେ ଦର୍ଶନ ଦେଉଥିବାରୁ ମନ୍ଦିର ଏବଂ ମନ୍ଦିର ବାହାରେ ମା’ଙ୍କର ଟିକେ ଦର୍ଶନ କରିବା ପାଇଁ ହଜାର ହଜାର ଶ୍ରଦ୍ଧାଳୁ ଧାଡିରେ ଥିବା ଦେଖିବାକୁ ମିଳିଛି l ମା’ ଏହି ରୂପରେ ଅଢେଇ ଦିନ ପର୍ଯ୍ୟନ୍ତ ଶ୍ରଦ୍ଧାଳୁମାନଙ୍କୁ ଦର୍ଶନ ଦେବେ l ଆଜି ମା’ ସମଲେଶ୍ୱରୀଙ୍କ ପୂଜକମାନେ ମଧ୍ୟ ଧଳାରଙ୍ଗର ବସ୍ତ୍ର ପରିଧାନ କରି ମାଙ୍କର ଆଳତି ସହ ପୂଜା କରିଥନ୍ତି।ଶୁକ୍ରବାର ମଧ୍ୟରାତ୍ରିରୁ ମନ୍ଦିରରେ ଭକ୍ତଙ୍କ ଗହଳ ଚହଳ ବଢ଼ିବା ସହ ଆଜି ସକାଳୁ ମା’ଙ୍କ ଦର୍ଶନ ପାଇଁ ଶ୍ରଦ୍ଧାଳୁ ଧାଡିରେ ଅପେକ୍ଷାରେ । ଆଜି ଭୋରରେ ନିର୍ଦ୍ଧାରିତ ସମୟରେ ମନ୍ଦିର ପହୁଡ ଖୋଲିବା ପରେ ମା’ଙ୍କ ମଙ୍ଗଳ ଆଳତି ସମ୍ପନ୍ନ ହୋଇଥିଲା । ଭୋର୍ ୫ଟା ସମୟରେ ସାଧାରଣ ଦର୍ଶନ ଆରମ୍ଭ ହୋଇ ପୂର୍ବାହ୍ନ ୧୧ଟା ୪୫ ପର୍ଯ୍ୟନ୍ତ ଅବ୍ୟାହତ ରହିବ । ପରେ ମା’ଙ୍କ ନିକଟରେ ଅନ୍ନଭୋଗ ଲାଗି ପାଇଁ ଅପରାହ୍ନ ସାଢ଼େ ୧୨ଟା ପର୍ଯ୍ୟନ୍ତ ଦର୍ଶନ ବନ୍ଦ୍ ରହିବ । ପୁନର୍ବାର ୧୨ଟା ୩୦ରୁ ସନ୍ଧ୍ୟା ସାଢେ ୭ଟା ପର୍ଯ୍ୟନ୍ତ ଦର୍ଶନ ଚାଲିବ । ସନ୍ଧ୍ୟା ସାଢ଼େ ୭ଟାରୁ ରାତ୍ର ସାଢ଼େ ୮ଟା ପର୍ଯ୍ୟନ୍ତ ମହାଆଳତି ପାଇଁ ଦର୍ଶନ ବନ୍ଦ ରହିବ । ପୁନଃ ରାତି ସାଢେ ୮ଟାରୁ ସାଢେ ୧୦ଟାପର୍ଯ୍ୟନ୍ତ ଦର୍ଶନ ଜାରି ରହିବା ପରେ ମନ୍ଦିର ପହୁଡ ପଡିବ ।
ମା’ ସମଲେଶ୍ୱରୀଙ୍କ ଧବଳମଖୀ ବେଶରେ ଅଢ଼େଇ ଦିନ ପର୍ଯ୍ୟନ୍ତ ଦର୍ଶନ ଦେଉଥିବାରୁ ପ୍ରଥମ ଦିନ ମାତ୍ରାଧିକ ଭିଡ ନକରିବାକୁ ମନ୍ଦିର ଟ୍ରଷ୍ଟ ବୋର୍ଡ୍ ପକ୍ଷରୁ ପରାମର୍ଶ ଦିଆଯାଇଛି । ଭିଡ ଦୃଷ୍ଟିରୁ ବୟସ୍କ, ଗର୍ଭବତୀ, ଦିବ୍ୟାଙ୍ଗ ବ୍ୟକ୍ତିବିଶେଷ ଓ ଶିଶୁମାନେ ମହାଳୟ ପରଦିନ ଅର୍ଥାତ ୧୧ ତାରିଖ ଦିନ ଦର୍ଶନ କରିବାକୁ ଟ୍ରଷ୍ଟ୍ ବୋଡ୍ର୍ ତରଫରୁ ଅନୁରୋଧ କରାଯାଇଛି । ସେହିପରି ଲକ୍ଷାଧିକ ଶ୍ରଦ୍ଧାଳୁଙ୍କ ସମ୍ଭାବ୍ୟ ଭିଡକୁ ଦୃଷ୍ଟିରେ ରଖି ଶୃଙ୍ଖଳିତ ଦର୍ଶନ ସାରିବା ପାଇଁ ସମସ୍ତ ବ୍ୟବସ୍ଥା ଟ୍ରଷ୍ଟ ବୋର୍ଡ ପକ୍ଷରୁ କରାଯାଇଥିବା ଟ୍ରଷ୍ଟ୍ ବୋର୍ଡ୍ ସଭାପତି ସଞ୍ଜୟ ବାବୁ କହିଛନ୍ତି । ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡକୁ ଦେଖି ପୁଲିସ ପକ୍ଷରୁ ଟ୍ରାଫିକ୍ ଓ ପାର୍କିଂ ପାଇଁ ସମସ୍ତ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ କାରଣରକୁ କୌଣସି ଅପ୍ରୀତିକର ସ୍ଥିତି ଏଡାଇବା ପାଇଁ ମନ୍ଦିର ପ୍ରକଳ୍ପ ଚତୁପାଶ୍ୱର୍ରେ ଏକାଧିକ ପୁଲିସ କଣ୍ଟ୍ରୋଲ୍ ରୁମ୍ ସ୍ଥାପନ କରାଯାଇଛି । ମନ୍ଦିର ମଧ୍ୟରେ ଶ୍ରଦ୍ଧାଳୁଙ୍କ ପାଇଁ ବାରିକେଡିଂ ମଧ୍ୟ କରାଯାଇଛି ।
