ରାଇରଙ୍ଗପୁର ଆସିବେ ପ୍ରଧାନମନ୍ତ୍ରୀ ଓ ରାଷ୍ଟ୍ରପତି

ରାଇରଙ୍ଗପୁର: ଆଗାମୀ ଜୁନ ୧୯ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ୨୦ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ରାଇରଙ୍ଗପୁର ଗସ୍ତ କାର୍ଯ୍ୟକ୍ରମ ରହିଥିବା ଦଳୀୟ ସୂତ୍ରରୁ ଜଣାଯାଇଛି। ନିର୍ଦିଷ୍ଟ ଭାବେ କୌଣସି ଚୂଡ଼ାନ୍ତ ଗସ୍ତ ସୂଚୀ ଜାରି ହୋଇନଥିଲେ ହେଁ ଦଳୀୟ ମହଲରେ ଏହାକୁ ନେଇ ଚର୍ଚ୍ଚା ଓ କଳ୍ପନାଜଳ୍ପନା ଆରମ୍ଭ ହୋଇଯାଇଛି।
୧୯ ତାରିଖରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ପହଞ୍ଚୁଥିବା ବେଳେ ୨୦ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଇରଙ୍ଗପୁର ଗସ୍ତରେ ଆସିବେ। ସେ ରାଷ୍ଟ୍ରପତିଙ୍କ ଜନ୍ମିତ ଗ୍ରାମ ଉପରବେଡ଼ା ଯିବେ ଓ ସେଠାରୁ ଫେରି ଜନସଭାରେ ଉଦ୍‌ବୋଧନ ଦେବେ ବୋଲି ଜଣାଯାଇଛି। ଏହି ଜନସଭାରେ ୫୦ ହଜାରରୁ ଊର୍ଦ୍ଧ୍ବ ଲୋକଙ୍କ ସମାଗମ ହେବାକୁ ଥିବାରୁ ସେଥିପାଇଁ ରାଇରଙ୍ଗପୁର ସହର ଆଖପାଖର ସମସ୍ତ ସମ୍ଭାବିତ ସ୍ଥାନ ପାଇଁ ଏବେଠାରୁ ଖୋଜାଖୋଜି ଆରମ୍ଭ ହୋଇଯାଇଛି।
ମୋଦୀ ଭାରତର ପ୍ରଧାନମନ୍ତ୍ରୀ ଭାବେ ସ୍ବର୍ଗତ ଇନ୍ଦିରା ଗାନ୍ଧୀଙ୍କ ପରେ ପ୍ରଥମ ଥର କରି ରାଇରଙ୍ଗପୁର ଆସୁଥିବାରୁ ବିଜେପି ଦଳୀୟ ମହଲରେ ବିଶେଷ ଉତ୍ସାହ ଉଦ୍ଦୀପନା ପ୍ରକାଶ ପାଇଛି। ପ୍ରଧାନମନ୍ତ୍ରୀ ମୋଦୀ ରାଷ୍ଟ୍ରପତିଙ୍କ ସହର ରାଇରଙ୍ଗପୁର ଓ ମୟୂରଭଞ୍ଜ ଜିଲା ପାଇଁ କ’ଣ ସ୍ବତନ୍ତ୍ର ପ୍ୟାକେଜ ନେଇ ଆସିଛନ୍ତି, ସେଥିନେଇ ନାନା ଆଲୋଚନା ଆରମ୍ଭ ହୋଇଛି। ଏଯାବତ୍‌ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଗସ୍ତର ଚୂଡ଼ାନ୍ତ କାର୍ଯ୍ୟକ୍ରମକୁ ଅପେକ୍ଷା କରାଯାଉଛି।