Garvita Odia
କଟକ: ବାଲିଯାତ୍ରା ତଳପଡ଼ିଆରେ ମହାନଦୀକୂଳରେ ସ୍କୁଲ୍ ଛାତ୍ରଙ୍କୁ ହତ୍ୟା କରିବା ଘଟଣାରେ କ୍ୟାଣ୍ଟନ୍ମେଣ୍ଟ୍ ଥାନା ପୁଲିସ ଦୁଇ ଜଣ ନାବାଳକଙ୍କୁ ଗିରଫ କରିଛି । ଏକ ପ୍ରେମ ବ୍ୟାପାରକୁ ନେଇ ଏହି ହତ୍ୟାକାଣ୍ଡ ଘଟଣା ଘଟିଥିବାର ପୁଲିସ କହିଛି । ନାବାଳିକା ପ୍ରେମିକାଙ୍କ ବାଟରୁ କଣ୍ଟା ସଫା କରିବା ପାଇଁ ଦୁଇ ସହଯୋଗୀ ନାବାଳକ ଦଶମ ଶ୍ରେଣୀ ଯଥା ରାଜାବଗିଚା ବଢ଼େଇ ସାହିରେ ଭଡ଼ା ରହୁଥିବା ସୁମନ୍ତ ସାହୁ(୧୫)ଙ୍କୁ ହତ୍ୟା କରିଥିବାର ପୁଲିସ ତଦନ୍ତରୁ ଜାଣିବାକୁ ପାଇଛି । ହତ୍ୟାକାଣ୍ଡରେ ବ୍ୟବହୃତ ଛୁରି ସହ ସ୍କୁଟି, ମୋବାଇଲ୍ ପୁଲିସ ଜବତ କରିଛି । ଗିରଫ ହୋଇଥିବା ଦୁଇ ଜଣ ଯାକ ନାବାଳକଙ୍କ ମଧ୍ୟରୁ ଜଣେ ଡିପ୍ଲୋମା ପ୍ରଥମ ବର୍ଷ ଛାତ୍ର ଓ ଅନ୍ୟ ଜଣେ +୨ ପ୍ରଥମ ବର୍ଷ ବାଣିଜ୍ୟ ଛାତ୍ର । ମୁଖ୍ୟ ଅଭିଯୁକ୍ତ ବାଣିଜ୍ୟ ଛାତ୍ରର ଘର କାଜିବଜାର ଅଞ୍ଚଳରେ ଓ ତା’ର ସହଯୋଗୀ ଘର ବାଲୁବଜାର ଅଞ୍ଚଳରେ । ବାଣିଜ୍ୟ ଛାତ୍ର ଜଣକ ନିଜ ପ୍ରେମିକାଙ୍କ ବାଟରୁ କଣ୍ଟା ସଫା କରିବାକୁ ଦଶମ ଶ୍ରେଣୀ ଛାତ୍ର ସୁମନ୍ତଙ୍କୁ ଯୋଜନାବଦ୍ଧ ଭାବେ ଅନ୍ୟ ଜଣେ ସାଙ୍ଗ ସହ ମିଶି ହତ୍ୟା କରିଛି ବୋଲି କ୍ୟାଣ୍ଟନ୍ମେଣ୍ଟ୍ ଥାନା ପୁଲିସ କହିଛି । ଅଭିଯୁକ୍ତମାନେ ମାତ୍ର ୧୬ ବର୍ଷ ବୟସର ହୋଇଥିଲେ ମଧ୍ୟ ସିନେମା ଶୈଳୀରେ ହତ୍ୟା କରିଛନ୍ତି । ସମ୍ପୃକ୍ତ ନାବାଳକ ଦ୍ୱୟଙ୍କୁ ଅନୁଗୁଳସ୍ଥିତ ବାଳ ସ୍ୱଧାର ଗୃହକୁ ପଠାଇ ଦିଆଯାଇଛି ।
ପୁଲିସ ସୂତ୍ରରୁ ମିଳିଥିବା ସୂଚନାନୁସାରେ, ସହରର ଏକ ଶିଶୁ ମନ୍ଦିରରେ ପଢ଼ୁଥିବା ସୁମନ ଏକ କୋଚିଙ୍ଗ୍ ସେଣ୍ଟର୍କୁ ଟ୍ୟୁସନ୍ ହେବାକୁ ଯିବା ମଧ୍ୟରେ ଜଣେ ସହପାଠିନୀଙ୍କ ସହ ତାଙ୍କର ଚିହ୍ନା ପରିଚୟ ଥିଲା । ନାବାଳିକା ସହପାଠିନୀଙ୍କ ସହ ସୁମନଙ୍କର କଥାବାର୍ତ୍ତାକୁ ତାଙ୍କ ସିନିୟର ଜଣେ ନାବାଳକ ସହଜରେ ଗ୍ରହଣ କରିପାରୁ ନଥିଲା । ଏହାକୁ ନେଇ ଅତୀତରେ ଉଭୟଙ୍କ ମଧ୍ୟରେ ବିବାଦ ହୋଇଥିଲା । ବୁଝାମଣା ପରେ ବିବାଦ ସମାଧାନ ହୋଇଥିଲେ ମଧ୍ୟ ସମ୍ପୃକ୍ତ ନାବାଳକ ତଥା +୨ ବାଣିଜ୍ୟ ଛାତ୍ରର ମନରୁ ରାଗ ଯାଇନଥିଲା । ପ୍ରେମିକାଙ୍କ ବାଟରୁ କଣ୍ଟା ସଫା କରିବା ଲକ୍ଷ୍ୟରେ ଅଭିଯୁକ୍ତ ବାଣିଜ୍ୟ ଛାତ୍ର ଜଣକ ଡିପ୍ଲୋମା ଛାତ୍ରର ସହଯୋଗ ନେଇ ଷଡ଼ଯନ୍ତ୍ର ରଚିଥିଲା ।
ବାଣିଜ୍ୟ ଛାତ୍ର ଜଣକ ଏକ ଧାରୁଆ ଛୁରି ଆଣି ପାଖରେ ରଖିବା ସହ ଗତ ରବିବାର ସକାଳେ ସ୍କୁଟି ଯୋଗେ ଡିପ୍ଲୋମା ଛାତ୍ରକୁ ସାଙ୍ଗରେ ଆଣି ସୁମନଙ୍କ ଘର ପାଖରେ ପହଞ୍ଚିଥିଲା । ସୁମନଙ୍କୁ ଘର ପାଖରୁ ଡାକି ନେଇ ଅଭିଯୁକ୍ତମାନେ ବାରବାଟୀ ଷ୍ଟାଡିଅମ୍ ରାସ୍ତାରେ ଆସି ଗଡ଼ଗଡ଼ିଆ ମନ୍ଦିର ନିକଟବର୍ତ୍ତୀ ଦୋକାନରେ ଚା’ ପିଇଥିଲେ । ଚା’ ପିଇ ସାରି ତଳ ବାଲିଯାତ୍ରା ପଡ଼ିଆ ମହାନଦୀ କୂଳ ପାଖକୁ ଯାଇଥିଲେ । ସୁମନ ଗାଡ଼ିରୁ ଓହ୍ଲାଇବା ପରେ ଅଭିଯୁକ୍ତ ଦ୍ୱୟ ନାବାଳିକାଙ୍କ ସହ ପୂର୍ବ କଥାକୁ ନେଇ ଯୁକ୍ତିତର୍କ ହୋଇଥିଲା । ଠେଲାପେଲା ମଧ୍ୟରେ ଦୁଇ ଜଣ ଯାକ ସୁମନଙ୍କୁ ମାଡ଼ ମାରିବା ସହ କାଜିବଜାର ଅଞ୍ଚଳର ବାଣିଜ୍ୟ ଛାତ୍ର ଜଣକ ପାଖରେ ରଖିଥିବା ଧାରୁଆ ଛୁରିରେ ସୁମନଙ୍କ ବେକକୁ ଭୁସି ପକାଇଥିଲା । ପ୍ରବଳ ରକ୍ତସ୍ରାବ ହେବାରୁ ଅଭିଯୁକ୍ତ ଦ୍ୱୟ ଘଟଣାସ୍ଥଳରୁ ଗାଡ଼ି ନେଇ ପାର ହୋଇଯାଇଥିଲେ ବୋଲି ତଦନ୍ତ ସମୟରେ ଦୁଇ ଜଣ ଛାତ୍ର ପୁଲିସ ଆଗରେ ସ୍ୱୀକାର କରିଛନ୍ତି ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି । ହତ୍ୟାକାଣ୍ଡ ପରେ ଫେରିବା ବେଳେ ସୁମନଙ୍କ ମୋବାଇଲ୍କୁ ସେମାନେ ଭାଙ୍ଗି କାଜିବଜାର ମନ୍ଦିର ନିକଟ ନାଳରେ ଫୋପାଡ଼ି ଦେଇଥିଲେ । ସେହିପରି ଅଭିଯୁକ୍ତ ତା’ର ମୋବାଇଲ୍କୁ ଭାଙ୍ଗି କେଏମ୍ସିର ଅଳିଆ ସଫେଇ ଗାଡ଼ିକୁ ଫିଙ୍ଗି ଦେଇଥିଲା ବୋଲି ପୁଲିସ କହିଛି । ନାଳରେ ଫିଙ୍ଗିଥିବା ମୋବାଇଲ୍ ପୁଲିସ ଜବତ କରିଥିବାର ସୂଚନା ମିଳିଛି ।
