୪୨ ପୂର୍ବତନ ବିଚାରପତିଙ୍କ ଖୋଲା ଚିଠି: ‘ଭୋଟ ଚୋରି’ କହିବା ସାମ୍ବିଧାନିକ ସଂସ୍ଥା ପ୍ରତି ଅପମାନ

ଭାରତର ନିର୍ବାଚନ କମିଶନଙ୍କ ବିରୁଦ୍ଧରେ ବିରୋଧୀ ଦଳଗୁଡ଼ିକ ପକ୍ଷରୁ ଦେଶବ୍ୟାପୀ ଆନେ୍ଦାଳନ ଚାଲିଛି । କଂଗ୍ରେସ ନେତୃତ୍ୱାଧୀନ ଇଣ୍ଡିଆ ମେଣ୍ଟରାଜଧାନୀ ଦିଲ୍ଲୀରେ ତାର ବିରୋଧ ଜାରି ରଖିଛି । ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୁଦ୍ଧରେ ଏହି ରାଜନୈତିକ ଦଳଗୁଡ଼ିକ ଭୋଟ ଚୋରି ଅଭିଯୋଗ ଲଗାଇ ନାରାବାଜି କରୁଛନ୍ତି । ତେବେ ଏପରି ଅଭିଯୋଗକୁୁ ନାପସନ୍ଦ କରିଛନ୍ତି ଦେଶର କିଛି ଅବସରପ୍ରାପ୍ତ ବିଚାରପତି । ନିର୍ବାଚନ କମିଶନ ଏକ ସାମ୍ବିଧାନିକ ସଂସ୍ଥା ହୋଇଥିବାରୁ ଏହାର ପଦ ଓ ଗରିମା ବଜାୟ ରଖି ଏହା ବିରୁଦ୍ଧରେ ଦିଆଯାଉଥିବା ଆପତ୍ତିଜନକ ମନ୍ତବ୍ୟରୁ କ୍ଷାନ୍ତ ରହିବାକୁ ୪୨ ଜଣ ଅବସରପ୍ରାପ୍ତ ବିଚାରପତି ଏହି ମର୍ମରେ ଏକ ଖୋଲା ଚିଠି ଲେଖିଛନ୍ତି । ଏହି ଚିଠିରେ ଉପରୋକ୍ତ ଅବସରପ୍ରାପ୍ତ ବିଚାରପତିମାନେ ଉଲ୍ଲେଖ କରିଛନ୍ତି ଯେ, ରାଜନୈତିକ ଦଳଗୁଡ଼ିକ ପକ୍ଷରୁ ଯେଭଳି ସାମ୍ବାଧିନିକ ପଦଗୁଡିକ ବିରୁଦ୍ଧରେ ଅଭିଯୋଗ ଅଣାଯାଉଛି, ତାହା ଦେଶର ଗଣତାନ୍ତ୍ର ପ୍ରତି ବିପଦ । ବର୍ତ୍ତମାନ ଦେଶର ମୁଖ୍ୟ ନିର୍ବାଚନ କମିଶନଙ୍କ ଅଫିସ ଆକ୍ରମଣର କେନ୍ଦ୍ରବିନ୍ଦୁ ପାଲଟିଛି । କୌଣସି ତଥ୍ୟ ପ୍ରମଣ ନ ଥାଇ ଏକ ସାମ୍ବିଧାନିକ ସଂସ୍ଥା ବିରୁଦ୍ଧରେ ‘ଭୋଟ୍ ଚୋରି’, ଚୋର, ଖେଳଣା ଇତ୍ୟାଦି ଅଭିଯୋଗ ଆଣିବା ଅନୁଚିତ । କୌଣସି ସଂସ୍ଥା ବିରୁଦ୍ଧରେ ସମାଲୋଚନା ଗଣତାନ୍ତ୍ରିକ ଅଧିକାର, କିନ୍ତୁ ଅପନିନ୍ଦା ଦେବା ଅଧିକାର ପରିସରଭୁକ୍ତ ନୁହେଁ ବୋଲି ଏହି ଚିଠିରେ ଦର୍ଶଯାଇଛି । ଭୋଟର ତାଲିକା ସଂଶୋଧନ ବା ଏସଆଇଆର ନିର୍ବାଚନ କମିଶନଙ୍କୁ ପ୍ରଦତ୍ତ ଏକ ସାମ୍ବିଧାନିକ ଦାୟିତ୍ୱ, ସେ ତାହା ନିର୍ବାହ କରୁଛନ୍ତି । ଭରତୀୟ ଲୋକପ୍ରତିନିଧି ଆଇନ-୧୯୫୦ର ଧାରା ୨୧(୩)ରେ ଭୋଟର ତାଲିକା ଯେକୌଣସି ମୁହୂର୍ତ୍ତରେ ସଂଶୋଧନ କରିବାକୁ ନିର୍ବାଚନ କମିଶନଙ୍କୁ କ୍ଷମତା ଦିଆଯାଇଛିି । ଦେଶରେ ଅନୁଷ୍ଠିତ ପ୍ରଥମ ସାଧାରଣ ନିର୍ବାଚନ ଠାରୁ ନିର୍ବାଚନ କମିଶନ ବାରମ୍ବାର ଏହି ସଂଶୋଧନ କରିଆସୁଛନ୍ତି । ଏହାକୁ ନିର୍ବାଚନ କମିଶନଙ୍କ ଯଡ଼ଯନ୍ତ୍ର ବୋଲି କହିବା ଅନୁଚିତ ବୋଲି ପୂର୍ବତନ ବିଚାରପତିମାନେ ଏହି ଚିଠିରେ ଉଲ୍ଲେଖ କରିଛନ୍ତି ।