୯୧.୫% ହିତାଧିକାରୀଙ୍କୁ ମିଳିଲା ୨ ମାସର ଭତ୍ତା

ଭୁବନେଶ୍ୱର : ଜାତୀୟ ସାମାଜିକ ସହାୟତା କାର୍ଯ୍ୟକ୍ରମ (ଏକ କେନ୍ଦ୍ରୀୟ ପ୍ରାୟୋଜିତ ଯୋଜନା) ଅଧୀନରେ ମୋଟ ୧୯,୨୨,୫୨୫ ହିତାଧିକାରୀଙ୍କ ମଧ୍ୟରୁ ୧୭,୬୦,୪୩୫ ଜଣ (୯୧.୫%) ହିତାଧିକାରୀଙ୍କୁ ପୂର୍ବ ମାସଗୁଡ଼ିକର ବକେୟା ସହ ଭତ୍ତା ପ୍ରଦାନ କରାଯାଇଛି। ଉପରୋକ୍ତ ଭତ୍ତା ଅର୍ଥ ଏପ୍ରିଲ ଏବଂ ମେ ମାସ ପାଇଁ ପ୍ରଦାନ କରାଯାଇଛି। ଜୁନ୍ ମାସ ପାଇଁ ଭତ୍ତା ପ୍ରଦାନ ପ୍ରକ୍ରିୟା ଜାରି ରହିଥିବା ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ପକ୍ଷରୁ ସୂଚନା ଦିଆଯାଇଛି। ସମସ୍ତ ଭତ୍ତା ଠିକ୍ ସମୟରେ ପ୍ରଦାନ କରିବା ଏବଂ ନିଜର ଦାୟିତ୍ବ ପୂରଣ କରିବାକୁ ସରକାର ପ୍ରତିଶ୍ରୁତିବଦ୍ଧ। ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ୨୦୨୬-୨୭ ଆର୍ଥିକ ବର୍ଷରୁ ଜାତୀୟ ସହାୟତା କାର୍ଯ୍ୟକ୍ରମକୁ ଏସ୍‌ଏନ୍‌ଏ-ସ୍ପର୍ଶ ପ୍ଲାଟଫର୍ମ ମାଧ୍ୟମରେ କାର୍ଯ୍ୟକାରୀ
କରିବାକୁ ଯାଉଛି। କେନ୍ଦ୍ର ସରକାରଙ୍କ ଏନ୍‌ଏସ୍‌ଏପି ପୋର୍ଟାଲକୁ ରାଜ୍ୟ ଆଇଏଫ୍‌ଏମ୍‌ଏସ୍‌ ପୋର୍ଟାଲ, ପିଏଫ୍‌ଏମ୍‌ଏସ୍‌ ଏବଂ ଆର୍‌ବିଆଇ ସିଷ୍ଟମ ସହ ବୈଷୟିକ ଏକୀକରଣ ପାଇଁ ପ୍ରସ୍ତୁତି କାର୍ଯ୍ୟ ଶେଷ ହେବା ପରେ ଏହି ନୂତନ ବ୍ୟବସ୍ଥାରେ ସିଧାସଳଖ କାରବାର ଆରମ୍ଭ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ବରେ ଓଡ଼ିଶା ସରକାର ହିତାଧିକାରୀଙ୍କୁ ପାଣ୍ଠି ହସ୍ତାନ୍ତର ଏବଂ ଏହି ପରିବର୍ତ୍ତନ ପ୍ରକ୍ରିୟାକୁ ସୁଗମ କରିବା ପାଇଁ ନିଷ୍ଠାର ସହ କାର୍ଯ୍ୟ କରୁଥିବା ବିଭାଗ ପକ୍ଷରୁ କୁହାଯାଇଛି।