Garvita Odia
ମୁମ୍ବଇ: ଅଭିନେତା ପ୍ରକାଶ ରାଜଙ୍କୁ ବୁଧବାର ତେଲଙ୍ଗାନା ସରକାରଙ୍କ ଏସଆଇଟି ଦଳ ପଚରାଉଚରା କରିଛି। ତାଙ୍କୁ ଅନଲାଇନ୍ ଜୁଆ ଆପର ପ୍ରଚାର ସହ ଜଡିତ ମାମଲାରେ ପ୍ରଶ୍ନ କରାଯାଇଛି। ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ପ୍ରକାଶ ରାଜଙ୍କୁ ବୁଧବାର ହାଇଦରାବାଦ ସ୍ଥିତ ଏସଆଇଟି କାର୍ୟ୍ୟାଳୟରେ ପ୍ରାୟ ଏକ ଘଣ୍ଟା ଧରି ପଚରାଉଚରା କରାଯାଇଛି। ତେଲଙ୍ଗାନା ସରକାର ଅବୈଧ ଅନଲାଇନ ଜୁଆ ଗତିବିଧି ରୋକିବା ପାଇଁ ଏବଂ ଏଭଳି ମାମଲାର ଯାଞ୍ଚ ପାଇଁ ସିଆଇଡିର ଅତିରିକ୍ତ ପୁଲିସ ମହାନିର୍ଦ୍ଦେଶକଙ୍କ ତତ୍ତ୍ବାବଧାନରେ ଏସଆଇଟି ଗଠନ କରିଥିଲେ।
ଏହି ପଚରାଉଚରା ପରେ ପ୍ରକାଶ ରାଜ୍ ଗଣମାଧ୍ୟମରେ କହିଛନ୍ତି ଯେ ସେ ୨୦୧୬ରେ ଏକ ଆପର ବିଜ୍ଞାପନ କରିଥିଲେ। ତେବେ ସେ ସମୟରେ ଅନଲାଇନ୍ ଜୁଆ ଆରମ୍ଭ ହୋଇନଥିଲା। ତେବେ ପରେ ସେ ଏ ସମ୍ପର୍କରେ ଜାଣିବା ପରେ ନିଜକୁ ଅଲଗା କରିଦେଇଥିଲେ। ସୂଚନାଯୋଗ୍ୟ ତେଲଙ୍ଗାନା ଗେମିଂ ଆକ୍ଟ ୨୦୧୭ ଅନୁସାରେ ରାଜ୍ୟରେ ସମସ୍ତ ପ୍ରକାର ଅନଲାଇନ୍ ଜୁଆ ଉପରେ ପ୍ରତିବନ୍ଧକ ଲଗାଯାଇଛି। ମାର୍ଚ୍ଚ ୨୦୨୫ରେ ଅନେକ ବେଆଇନ୍ ଜୁଆ ଆପ୍ ଏବଂ ସେଗୁଡିକୁ ପ୍ରୋତ୍ସାହନ ଦେଉଥିବା ବ୍ୟକ୍ତିବିଶେଷଙ୍କ ଉପରେ ମାମଲା ରୁଜୁ ହୋଇଛି।
