କ୍ଷେତରେ ଟଳିପଡ଼ିଲେ ଚାଷୀ

ବାଲିପାଟଣା: ଆଉ ଦିନ କେଇଟା ପରେ ଝିଅ ବିବାହ କରିଥାନ୍ତେ । ହେଲେ ସବୁ ସ୍ୱପ୍ନ ସ୍ୱପ୍ନରେ ରହିଗଲା । ଝିଅକୁ କନ୍ୟା ବେଶରେ ଦେଖିବା ଆଗରୁ ଆଖି ବୁଜିଲେ ବାପା । ପରିବା କ୍ଷେତରେ କାମ କରୁଥିବାବେଳେ ଟଳିପଡ଼ିଲେ । ବାଲିପାଟଣା ଥାନା ଗାରେଡିପାଞ୍ଚଣ ଗ୍ରାମରେ ଶୁକ୍ରବାର ଏଭଳି ଅଭାବନୀୟ ଘଟଣା ଘଟିଛି । ମୃତ ଚାଷୀ ହେଲେ ମନୋରଞ୍ଜନ ବାରିକ ଓରଫ ବିଜୟ(୫୨) ।

ସୂଚନା ଅନୁଯାୟୀ,ଶୁକ୍ରବାର ପୂର୍ବାହ୍ଣରେ ସେ ଘର ପାଖ ମାଣିକ ପୋଖରୀ ନିକଟରେ ଥିବା ପରିବା କ୍ଷେତ୍ରରେ କାମ କରୁଥିଲେ । ହଠାତ୍ ମୁଣ୍ଡ ବୁଲାଇବାରୁ କାମ ବନ୍ଦ କରି ଘରକୁ ବାହାରିଥିଲେ । ହଠାତ୍ ଛାତିରେ ଜୋର ଯନ୍ତ୍ରଣା ହେବା ସହ ରକ୍ତବାନ୍ଦି ହୋଇଥିଲା । ଜମିଠାରୁ କିଛି ବାଟ ଯିବା ପରେ ସେ ମୁହଁମାଡ଼ି ତଳେ ପଡ଼ିଯାଇଥିଲେ । ଘରକୁ ଫେରିବା ବିଳମ୍ବ ହେବାରୁ ପରିବାର ଲୋକ ଖୋଜି ଖୋଜି କ୍ଷେତ ଯାଏ ଆସିଥିଲେ । ସେଠାରୁ ତାଙ୍କୁ ଉଦ୍ଧାର କରି ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବାଲିପାଟଣା ପୁଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲା । ବିଜୟ ପୂର୍ବତନ ୱାର୍ଡସଭ୍ୟ ଥିଲେ । ଘରେ ପତ୍ନୀ ବାସନ୍ତୀ, ପୁଅ ଅବିନାଶ ଓ ଝିଅ ଇପ୍ସିତା ଅଛନ୍ତି । ଏହି ଦୁଃଖରେ ମଧ୍ୟ ସେମାନେ ବିଜୟଙ୍କ ଚକ୍ଷୁଦାନ କରିଛନ୍ତି । ଗାଁ ଶ୍ମଶାନରେ ବିଜୟଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ସରପଞ୍ଚ ଶକୁନ୍ତଳା ଭୋଇ, ସମିତି ସଭ୍ୟା ତଥା ଉପାଧ୍ୟକ୍ଷା ରାଜଲକ୍ଷ୍ମୀ ଜେନା, ଗ୍ରାମର ମୁରବୀ ସୁବ୍ରତ କୁମାର ସେନାପତି, ଶକ୍ତି ପ୍ରସାଦ ପ୍ରତିହାରୀ, ସୁନୀଲ ସେନାପତି, ହରିହର ଭଟ୍ଟ, ନେତ୍ରାନନ୍ଦ ସାହୁ, ପ୍ରୀତମ ସେନାପତି, ଟବୁଲା ଭୋଇଙ୍କ ସହ ଗ୍ରାମର ବହୁ ଲୋକ ଉପସ୍ଥିତ ଥିଲେ।