ଅଭିଯୁକ୍ତକୁ ବିବାହ ବେଦୀରୁ ଉଠାଇ ଆଣିଲା ପୁଲିସ

ନିମାପଡ଼ା:ଏକାଧିକ ଅପରାଧ ଘଟାଇବା ମହଙ୍ଗା ପଡ଼ିଛି। ଯୁବକ ଜଣକ ବିବାହ କରିବା ପାଇଁ ବର ବେଶରେ ବିବାହ ବେଦୀରେ ବସି ଥିବା ବେଳେ ଗତ ବୁଧବାର ରାତିରେ ଚାରିଛକ ପୋଲିସ୍ ପହଂଚି ସମ୍ପୃକ୍ତ ଅଭିଯୁକ୍ତକୁ ଗିରଫ କରିଛି। ଗିରଫ ଅଭିଯୁକ୍ତ ହେଉଛି ଚାରିଛକ ଅଂଚଳ ଓରପଟ ଗ୍ରାମର ପ୍ରକାଶ କାଣ୍ଡି। ଉକ୍ତ ଘଟଣା ଚାରିଛକ ଅଂଚଳରେ ବେଶ୍ ଚର୍ଚ୍ଚା ବିଷୟ ପାଲଟିଛି । ଖବରରୁ ପ୍ରକାଶ,ଗତ ଶନିବାର ରାତିରେ ଚାରିଛକ ଥାନା ଅନ୍ତର୍ଗତ ଛଣିଜଙ୍ଗ ପଞ୍ଚାୟତ ବିଲସାହି ଗ୍ରାମର ଯୁବକ ଜ୍ୟୋତିରଞ୍ଜନ ବେହେରାଙ୍କୁ ଓରପଟ ଗ୍ରାମର ପ୍ରକାଶ କାଣ୍ଡି ମରଣାନ୍ତକ ଆକ୍ରମଣ କରି ଥିବା ନେଇ ଚାରିଛକ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ପରେ ପୋଲିସ ୯୯/୨୦୨୬ ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚାଲୁ ରଖିଥିଲା। ପରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଏଥିରେ ବ୍ୟବହୃତ ଗାଡ଼ି ଟିକୁ ଜବତ କରିଥିବା ବେଳେ ଅଭିଯୁକ୍ତ ଘଟଣା ସ୍ଥଳରୁ ଫେରାର ହୋଇଯାଇଥିଲା। ସେହିପରି ଗତ ବର୍ଷ ଅକ୍ଟୋବର ମାସ ୧ ତାରିଖରେ ଚାରିଛକ ବଜାରରେ ଜଣେ ମହିଳାଙ୍କୁ ଆକ୍ରମଣ ଘଟଣାରେ ପୋଲିସ ୧୨୧/୨୫ରେ ମାମଲା ରୁଜୁ କରି ପ୍ରକାଶ କାଣ୍ଡିକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିଲା। ଗତକାଲି ବିଳମ୍ବିତ ରାତ୍ରିରେ ଚାରିଛକ ପୋଲିସ ଓରପଟରେ ଅଭିଯୁକ୍ତ ପ୍ରକାଶ ବର ବେଶରେ ବେଦୀରେ ବସି ବିବାହ କରୁଥିବା ବେଳେ ପୁଲିସ ତାକୁ ସେଠାରୁ ଗିରଫ କରି ଆଜି କୋର୍ଟ ଚାଲାଣ କରିଥିବା ଜଣାପଡିଛି।
(ବସନ୍ତ ନାୟକ)