ମୁନ୍ନାଙ୍କୁ ରାଜନୀତି ଜଣାନାହିଁ:ବାବୁ ସିଂ

ଭୁବନେଶ୍ୱର: ଗତ କିଛି ଦିନ ହେବା ବିଜେଡିର ରାଜ୍ୟସଭା ସାଂସଦ ମୁନ୍ନା ଖାନଙ୍କ ବୟାନ ଚର୍ଚ୍ଚାରେ ରହି ଆସିଛି । ଭାରତୀୟ ଜନତା ପାର୍ଟିର ଏକାଧିକ ନେତା ଏବେ ‘ବିଜେଡି’ ସହ ଯୋଗଯୋଗରେ ଥିବା ବୟାନ ଦେଇ ଚର୍ଚ୍ଚାରେ ଥିବା ମୁନ୍ନା ଖାନ ଏବେ ଆଉ ଏକ ରୋଚକ ମନ୍ତବ୍ୟ ଦେଇଛନ୍ତି । ରାଜ୍ୟରେ ବିଜୁ ଜନତା ଦଳକୁ କ୍ଷମତାକୁ ଫେରିବାକୁ ନିର୍ବାଚନ ହେବା ପର୍ୟ୍ୟନ୍ତ ଅର୍ଥାତ ୫ବର୍ଷ ଅପେକ୍ଷା କରିବାକୁ ପଡିବନାହିଁ ବୋଲି କହି ମୁନ୍ନା ପୁଣି ଏକ ଦମ୍ଭୋକ୍ତି ଦେଖାଇଛନ୍ତି । ବିଜେପି ନିକଟରେ ନେତା ନଥିଲେ । ବିଜେଡିରୁ ଯାଇଥିବା ନେତା ବିଜେପିରେ ନିର୍ବାଚନ ଜିତିଛନ୍ତି, ସେମାନେ ପୁଣି ବିଜେଡି ଫେରିବେ ବୋଲି ପରୋକ୍ଷରେ କହିବାକୁ ପ୍ରୟାସ କରିଛନ୍ତି ମୁନ୍ନା । ମୁନ୍ନାଙ୍କ ପ୍ରଥମ ମନ୍ତ୍ୟକୁ ବିଜେପିର ବରିଷ୍ଠ ନେତା ତଥା ପୂର୍ବତନ ବିରୋଧୀ ଦଳ ନେତା ଜୟ ନାରାୟଣ କାଉଣ୍ଟର କରିଥିବା ବେଳେ ଏବେ ଏହି ଟିପ୍ପଣୀକୁ ବିଜେପି ବିଧାୟକ ବାବୁ ସିଂ କଡା ସମାଲୋଚନା କରିଛନ୍ତି । ମୁନ୍ନାଙ୍କୁ ରାଜନୀତି ଜଣାନାହିଁ ବୋଲି ବାବୁ କହିଛନ୍ତି । କଟାକ୍ଷ କରି ବାବୁ କହିଛନ୍ତି, ବହୁ ବିଳମ୍ବରେ ସେ ସାଂସଦ ହୋଇଛନ୍ତି, ରାଜନିତୀରେ ଜ୍ଞାନ ଟିକେ ଆହରଣ କରନ୍ତୁ ମୁନା ଭାଇ । ବିଜେଡି ଛାଡିକି ଯେଉଁ ନେତାମାନେ ଆସିଛନ୍ତି ସେମାନେ ନିଜ ଖୁସିରେ ଓ ନିଜ ଇଛାରେ ଆସିଛନ୍ତି । ବିଜେଡିରେ ପଞ୍ଜୁରୀ ଭିତରେ ଶୁଆ ଭଳି ନେତାମାନ ଥିଲେ । ସେଥିପାଇଁ ବିଜେଡି ଛାଡ଼ି ଦେଶ ନିର୍ମାଣ ଦିଗରେ ବିଜେପିରେ ଯୋଗ ଦେଇଛନ୍ତି ।
ବାବୁ କହିଛନ୍ତି,‘‘ ମୁନ୍ନା ଯେଉଁ କହୁଛନ୍ତି ୧୪ ବିଜେପି ବିଧାୟକ ତାଙ୍କ ଯୋଗାଯୋଗରେ ଅଛନ୍ତି, ଗୋଟିଏ ନାଁ ସ୍ପଷ୍ଟ କରନ୍ତୁ । ଯଦି ୧୪ ବିଧାୟକ ଦଳ ଛାଡି ବିଜେଡିରେ ସାମିଲ ହୁଅନ୍ତି, ତେବେ କେମିତି ତାଙ୍କର ବିଧାୟକ ପଦ ରଦ୍ଦ ହେବନି । ବିଜେଡି ଡଙ୍ଗାରେ ପାଣି ପଶିଲାଣି । ଦୁଇ ଜଣ ସାଂସଦ ବିଜେପିରେ ମିଶି ସାରିଲେଣି, ଆହୁରି ଅନେକ ନେତା ଯୋଗାଯୋଗରେ ଅଛନ୍ତି । ଦେଖନ୍ତୁ ଆଗକୁ କ’ଣ ହେଉଛି । ‘ବିଜେଡି’ ବୁଡିବାକୁ ବସିଥିବା ଏକ ଡଙ୍ଗା ପରି ।’’