Garvita Odia
ନୂଆଦିଲ୍ଲୀ: ”ଆଜି ପ୍ରତିଟି ଘର ତ୍ରିରଙ୍ଗା । ପ୍ରତିଟି ମନ ତ୍ରିରଙ୍ଗା । ଦେଶ ନୂଆ ସଂକଳ୍ପର ସହ ଆଗକୁ ବଢୁଛି । ପ୍ରଥମ ଥର ପାଇଁ ଲାଲକିଲ୍ଲାରେ ବନ୍ଦେ ମାତରମ୍ ଶୁଭିଲା । ଆଉ ଛୋଟ ସ୍ୱପ୍ନ ଦେଖିଲେ ଚଳିବନି । ବଡ଼ ସ୍ବପ୍ନ ଦେଖିବାକୁ ହେବ, ସଂକଳ୍ପ ଦୃଢ଼ ହେବା ଜରୁରୀ । ସଂକଳ୍ପ ବି ବଡ଼ ହେବା ଜରୁରୀ । ସ୍ବପ୍ନ, ସଂକଳ୍ପ ବଡ଼ ହେଲେ ସାମର୍ଥ ବି ବଡ଼ ହେବ । ଆଜି ଭାରତ ବି ବଡ଼ ସ୍ବପ୍ନ ଦେଖିଛି । ୨୦୪୭ ସୁଦ୍ଧା ବିକଶିତ ଭାରତର ଲକ୍ଷ୍ୟ ହାସଲ କରିବା ।” ୮୦ ତମ ସ୍ୱାଧୀନତା ଦିବସରେ ଲାଲକିଲ୍ଲାରୁ ପତାକା ଉତ୍ତୋଳନ କରି ଦେଶବାସୀଙ୍କୁ ସମ୍ବୋଧନ କରି ଏହା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ଲାଲକିଲ୍ଲାରୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଛନ୍ତି, ” ବିଶ୍ବର ଦୃଷ୍ଟିଭଙ୍ଗୀ ଆମ ପ୍ରତି ବଦଳିଛି, ଆମକୁ ସମ୍ମାନ ଦୃଷ୍ଟିରେ ଦେଖୁଛି । ୧୨ ବର୍ଷରେ ଦେଶ ଦ୍ରୁତ ଗତିରେ ବିକାଶ ଅଭିମୁଖେ ଅଗ୍ରସର ହେଉଛି । ସମର୍ପଣ ଭାବ ସହ ଦେଶ ଶୀର୍ଷକୁ ଛୁଉଁଛି । ୧୨ ବର୍ଷରେ ୨୫ କୋଟି ଗରିବୀରୁ ମୁକ୍ତି ପାଇଛନ୍ତି । ପ୍ରତିରକ୍ଷା ଉତ୍ପାଦନ ୪ ଗୁଣ ବୃଦ୍ଧି ପାଇଛି । ମେଟ୍ରୋର ବିସ୍ତାର କରିଛୁ, ପବ୍ଲିକ ଟ୍ରାନ୍ସପୋର୍ଟକୁ ଗୁରୁତ୍ବ ଦେଇଛୁ । ଏହା ପ୍ରମାଣିତ କରୁଛି, ଆମେ ଦ୍ରୁତ ଗତିରେ ଆଗକୁ ବଢୁଛୁ । ଆତ୍ମନିର୍ଭର ଭାରତ ହେବା ନିହାତୀ ଜରୁରୀ । ଶସ୍ତା ଓ ବିଦେଶୀ ସାମଗ୍ରୀ ଉପରେ ନିର୍ଭର କ୍ଷତିକାରକ । ଆଜି ଦେଶରେ ୩ ସେମି କଣ୍ଡକ୍ଚର ପ୍ଲାଣ୍ଟ ସକ୍ରିୟ ହୋଇଛି । ”
ଐତିହାସିକ ଲାଲକିଲ୍ଲାରୁ ସମ୍ବୋଧନ କରି ପ୍ରଧାନମନ୍ତ୍ରୀ ଆହୁରି କହିଛନ୍ତି, ” ନାଗରିକ ଦେବ ଭବଃ ଆମ ମୂଳ ମନ୍ତ୍ର । ଗତ ୧୦-୧୨ ବର୍ଷ ମଧ୍ୟରେ ଆମେ ଅନେକ ବିପଦର ସମ୍ମୁଖୀନ ହୋଇଛୁ । କୋଭିଡ୍ରୁ ବାହାରିବା ପରେ ୟୁକ୍ରେନ ଓ ପଶ୍ଚିମ ଏସିଆ ଯୁଦ୍ଧ ହେଲା । କିଛି ଲୋକ ଦେଶରେ ଟିକା ଉପଲବ୍ଧ ହେବ ନାହିଁ କହିଥିଲେ । ପଶ୍ଚିମ ଏସିଆ ଯୁଦ୍ଧ ସମୟରେ ଦେଶବାସୀଙ୍କୁ ଭୟଭୀତ କରାଗଲା । ପେଟ୍ରୋଲ, ଡିଜେଲ, ସାର ଉପଲବ୍ଧ ହେବ ନାହିଁ ବୋଲି ଗୁଜବ ପ୍ରଚାର କରାଗଲା । କିଛି ଲୋକ ଦେଶରେ ଚିନ୍ତାର ବାତାବରଣ ସୃଷ୍ଟି କରି ଆନନ୍ଦ ପାଉଥିଲେ ।ଦେଶକୁ ବିଭ୍ରାନ୍ତ କରୁଥିବା ଶକ୍ତି ଠାରୁ ଦୂରେଇ ରୁହନ୍ତୁ । ନାରୀ ଓ ଯୁବଶକ୍ତି ଉପରେ ମୋର ସଂପୂର୍ଣ୍ଣ ଭରସା ଅଛି । ଆମ ସରକାରର ମୂଳ ମନ୍ତ୍ର ନାଗରିକ ଦେବ ଭବଃ । ବିଶ୍ବରେ ୟୁରିଆ ଦାମ୍ ବଢ଼ିଛି, କିନ୍ତୁ ଆମେ ଶସ୍ତାରେ ଯୋଗାଉଛୁ । ”
‘୧ କୋଟି ଯୁବକଙ୍କୁ AI ଟ୍ରେନିଂ ଦେବୁ’ : ଲାଲକିଲ୍ଲାରେ ଯୁବପିଢ଼ିଙ୍କ ପାଇଁ ପ୍ରଧାନମନ୍ତ୍ରୀ ମୋଦି ବଡ଼ ଘୋଷଣା କରିଛନ୍ତି ।‘ଆଗାମୀ ୧ ବର୍ଷରେ ୧ କୋଟି ଯୁବକଙ୍କୁ AI ଟ୍ରେନିଂ ଦିଆଯିବ । ପରୀକ୍ଷା ପାଇଁ ଯୁବବର୍ଗଙ୍କୁ ମାଗଣା ଅନ୍ଲାଇନ୍ କୋଚିଂ ଦେବୁ । ଗରିବ ଛାତ୍ର ଯେପରି ଏହାର ସୁବିଧା ପାଇବେ । ଯୁବଶକ୍ତିକୁ ରାଷ୍ଟ୍ର ନିର୍ମାଣରେ ଲଗାଇବାକୁ ହେବ । ଭାରତର ବିକାଶ ଯାତ୍ରାରେ ଯୁବପିଢ଼ିଙ୍କ ବଡ଼ ଭୂମିକା ରହିଛି । ସବୁଠାରୁ ବଡ଼ ଲାଭାର୍ଥୀ ଯୁବପିଢ଼ି ହେବେ । କ୍ରୀଡ଼ା ପ୍ରତିଭାଙ୍କୁ ଚିହ୍ନଟ ପାଇଁ ଟ୍ୟାଲେଣ୍ଟ ହଣ୍ଟ ଅଭିଯାନ ଆରମ୍ଭ କରିବୁ ବୋଲି ବଡ଼ ଘୋଷଣା କରିଛନ୍ତି ପ୍ରଧାନମନ୍ତ୍ରୀ ।
‘ନକ୍ସଲ ମାନସିକତା ଅରାଜକତା ରୁଛନ୍ତି’- ଦେଶରେ ଅରାଜକତା ସୃଷ୍ଟି କରୁଥିବା ଲୋକଙ୍କୁ କଟାକ୍ଷ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦୀର୍ଘ ବର୍ଷରୁ ଦେଶ ନକ୍ସଲଙ୍କ ଦ୍ବାରା ରକ୍ତରଞ୍ଜିତ ହୋଇଥିଲା । ଆମେ ଜଙ୍ଗଲରୁ ନକ୍ସଲଙ୍କୁ ସମାପ୍ତ କରିଛୁ । କିନ୍ତୁ ଏବେ ବି ନକ୍ସଲ ମାନସିକତା ଥିବା ଲୋକେ ଅଛନ୍ତି । ସେମାନେ ଦେଶରେ ଅରାଜକତା ସୃଷ୍ଟି କରୁଛନ୍ତି । ଏଭଳି ମାନସିକତା ଥିବା ଲୋକଙ୍କୁ ଚିହ୍ନନ୍ତୁ । ଏଭଳି ଚିନ୍ତାଧାରାକୁ ସମାପ୍ତ କରିବାକୁ ପଡ଼ିବ ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦି ।
