Garvita Odia
ଭୁବନେଶ୍ୱର: ରାଜ୍ୟରେ ୮ ବର୍ଷ ହେବ ଛାତ୍ରସଂସଦ ନିର୍ବାଚନ ହେଉନଥିଲା । ମାତ୍ର ଚଳିତବର୍ଷ ନିର୍ବାଚନ ହେବା ସହିତ ଏହା ସାଧାରଣ ନିର୍ବାଚନକୁ ଟପିଥିଲା । ଟଙ୍କା ଖର୍ଚ୍ଚରେ ହେଉ କି ଗଣ୍ଡଗୋଳ କରିବାରେ ସବୁଥିରେ ଚଳିତବର୍ଷ ଛାତ୍ରସଂସଦ ନିର୍ବାଚନ ସାଧାରଣ ନିର୍ବାଚନକୁ ବଳି ଯାଇଥିଲା । ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟ ଆଗରେ ଲାଗିଥିବା ବଡ଼ ବଡ଼ ବ୍ୟାନର୍ ଓ ହୋର୍ଡିଂ ପୂର୍ବରୁ କୌଣସି ଛାତ୍ରସଂସଦ ନିର୍ବାଚନରେ ଦେଖିବାକୁ ମିଳିନଥିଲା ।
ସେହିପରି ଚଳିତ ଛାତ୍ରସଂସଦ ନିର୍ବାଚନରେ କେଉଁଠି ଥାର୍ ଗାଡ଼ି ଶୋଭାଯାତ୍ରା ତ କେଉଁଠି ଜେସିବିରୁ ଫୁଲବର୍ଷା କରା ଯାଇଥିଲା । ପୁଣି କିଛି କ୍ୟାମ୍ପସରେ ବୋମା ମାଡ଼ ତ ପୁଣି କେଉଁଠି ଉତ୍ତେଜନା ଯୋଗୁଁ ରାସ୍ତା ରୋକ ହୋଇଥିଲା । ପୁଣି କେଉଁଠି ଖଣ୍ଡା ବୁଲିଥିଲା ତ ଆଉ କେଉଁଠି ଗୋଷ୍ଠୀ ସଂଘର୍ଷ ଦେଖିବାକୁ ମିଳିଥିଲା । ତେବେ ଚଳିତ ଛାତ୍ରସଂସଦ ନିର୍ବାଚନରେ କୃତ୍ରିମ ବୁଦ୍ଧିମତା ବା ଏଆଇର ବ୍ୟବହାର ହୋଇଥିବା ଦେଖିବାକୁ ମିଳିଥିଲା । ଏଭଳି କରି ବହୁ ଛାତ୍ର ନେତା ଓ ନେତ୍ରୀଙ୍କ ବ୍ୟକ୍ତିଗତ ଚରିତ୍ର ସଂହାର କରାଯାଇଥିଲା । ଏଆଇ ବ୍ୟବହାର କରି ଛାତ୍ରନେତାଙ୍କୁ ବଦନାମ କରିବାକୁ ବି ପଛେଇଲେ ନାହିଁ ବିରୋଧୀ ଛାତ୍ର ସଙ୍ଗଠନର ନେତା ଓ ନେତ୍ରୀ ।
