ଗୃହପାଳିତ ପଶୁଙ୍କୁ ମିଳିବ ମାଗଣା ଚିକିତ୍ସା, ୟୁଜର୍ସ ଫି ଛାଡ କଲେ ରାଜ୍ୟ ସରକାର

ଭୁବନେଶ୍ବର: ଏଣିକି ଗୃହପାଳିତ ପଶୁଙ୍କୁ ମିଳିବ ମାଗଣା ଚିକିତ୍ସା । ମାଗଣାରେ ହେବ ଗାଈ, ବଳଦ, ମଇଁଷି, ଛେଳି, ମେଣ୍ଢା ଚିକିତ୍ସା । ପ୍ରାଣୀ ସମ୍ପଦର ସୁରକ୍ଷାକୁ ପ୍ରାଥମିକତା ଦେଇ ଗୃହପାଳିତ ପଶୁଙ୍କ ଚିକିତ୍ସା ଓ ଟୀକାକରଣ ଉପରୁ ଯୁଜର୍ସ ଫି ଛାଡ କରିଛନ୍ତି ରାଜ୍ୟ ସରକାର । ମାର୍ଚ୍ଚ ୧ରୁ ଏହା ଲାଗୁ ହେବ । ଏହାଦ୍ୱାରା ଗୋପାଳନରେ ନିୟୋଜିତ ଚାଷୀମାନେ ଉପକୃତ ହେବ । ଏନେଇ ସୂଚନା ଦେଇଛନ୍ତି ପଶୁସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ।
ଏନେଇ ପଶୁସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି, “ଗତ ସରକାର ସମୟରେ ପ୍ରାଣୀ ଚିକିତ୍ସା ପାଇଁ ୧ ଟଙ୍କାରୁ ୧୦୦ ଟଙ୍କା ପର୍ୟ୍ୟନ୍ତ ନିଆଯାଉଥିଲା । କିନ୍ତୁ ଏବେ ବିଜେପି ସରକାରରେ ଲୋକମାନେ ଦାବି କରିଥିଲେ ଯେ, ୟୁଜର୍ସ ଫି ଛାଡ କରିବା ପାଇଁ । ତେଣୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ପ୍ରାଣୀ ଚିକିତ୍ସା ଟିକାକୁ ସମ୍ପୂର୍ଣ୍ଣ ଭାବେ ମାଗଣା କରାଯାଇଛି । ମାର୍ଚ୍ଚ ୧ରୁ ଏହା ଲାଗୁ ହେବ । ଗ୍ରାମାଞ୍ଚଳକୁ ଯାଉଥିବା ଭ୍ୟାନ ସବୁ ଟୀକାକରଣ ପାଇଁ ଆଉ ପଇସା ନେବେ ନାହିଁ । ପ୍ରାଣୀ ଚାଷୀମାନଙ୍କୁ ସଶକ୍ତ କରିବା ଓ ସ୍ୱାବଲମ୍ବୀ କରିବା ପାଇଁ ଏପରି ନିଷ୍ପତ୍ତି ନିଆଯାଇଛି । ଦେୟମୁକ୍ତ ସାର୍ବଜନୀନ ପ୍ରାଣୀଚିକିତ୍ସା ଓ ପ୍ରାଣୀସମ୍ପଦର ସୁରକ୍ଷାକୁ ପ୍ରାଥମିକତା ଦେଇ ଆମେ ଏହି ନିଷ୍ପତ୍ତି ନେଇଛୁ । ମୋର ବିଶ୍ୱାସ ଏହି ନିଷ୍ପତ୍ତି ନିଶ୍ଚିତ ଭାବରେ ଗୋପାଳକ ତଥା ପ୍ରାଣୀସମ୍ପଦ ବିଭାଗ ପ୍ରତି ଇଚ୍ଛା ରଖୁଥିବା ଚାଷୀ ଭାଇ ଓ ଭଉଣୀମାନଙ୍କ ପାଇଁ ସହାୟକ ହେବ । କୃଷିକ୍ଷେତ୍ର ସଶକ୍ତ କରିବା ଏବଂ ପ୍ରାଣୀ ସମ୍ପଦକୁ ସମୃଦ୍ଧ କରିବା ପାଇଁ ଏହି ସରକାରରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି ।”