ଦୁର୍ଗାପୂଜା ଛୁଟି ପୂର୍ବରୁ ହୋଇପାରେ ଛାତ୍ରସଂସଦ ନିର୍ବାଚନ

ଭୁବନେଶ୍ୱର: ଚଳିତବର୍ଷ ଦୁର୍ଗାପୂଜା ଛୁଟି ପୂର୍ବରୁ ହୋଇପାରେ ଛାତ୍ରସଂସଦ ନିର୍ବାଚନ । ତେବେ ସବୁ ସରକାରୀ ବିଶ୍ୱବିଦ୍ୟାଳୟ ଓ କଲେଜ ପାଇଁ ଆଦର୍ଶ ଆଚରଣ ବିଧି କାର୍ଯ୍ୟକାରୀ ନେଇ ଚିଠି ହୋଇଛି । ଜାରି ହୋଇଥିବା ଆଦର୍ଶ ଆଚରଣ ବିଧି ଚିଠି ଅନୁଯାୟୀ, କୌଣସି ଛାତ୍ରଛାତ୍ରୀ ବିନା ଅନୁମତିରେ କଲେଜରେ ଆନ୍ଦୋଳନକୁ ଓହ୍ଲାଇବେ ନାହିଁ । ନଚେତ୍ କଡ଼ା କାର୍ଯ୍ୟାନୁଷ୍ଠାନ ନିଆଯିବ । ଅନ୍ୟପଟେ ଛାତ୍ର ସଂଗଠନ ମାନେ ମଧ୍ୟ କ୍ୟାମ୍ପସରେ ନିଜର ସଂଗଠନ ସଜାଡ଼ିବାରେ ଲାଗିଲାଣି । ଏପରି ଏକ ଚିଠି ଓ ଛାତ୍ରସଂଗଠନ ମାନଙ୍କର ପ୍ରସ୍ତୁତିକୁ ନେଇ ଛାତ୍ର ସଂସଦ ନିର୍ବାଚନ ଆଶା ବାନ୍ଧିଛି ।

ଅବଶ୍ୟ ଜାରି ହୋଇଥିବା ଆଦର୍ଶ ଆଚରଣ ବିଧି ସାଙ୍ଗେ ସିଧାସଳଖ ଛାତ୍ର ସଂସଦ ନିର୍ବାଚନର ସଂପୃକ୍ତି ନାହିଁ । ମାତ୍ର ଏଥିରେ ଆନ୍ଦୋଳନ ପାଇଁ ଅନୁମତି, ଅଣଛାତ୍ର ପ୍ରବେଶ ନିଷେଧ, ରାଜନୈତିକ ସଭାକୁ ବାରଣ ଭଳି କଟକଣା ଏକ ପ୍ରକାର ଇଙ୍ଗିତ କରୁଛି ଯେ ଆଗକୁ ଛାତ୍ର ସଂସଦ ନିର୍ବାଚନ ହୋଇପାରେ । ଏପରିକି କିଛି ମାସ ହେବ ବିଭିନ୍ନ ଉଚ୍ଚଶିକ୍ଷାନୁଷ୍ଠାନରେ ବିଭିନ୍ନ ଛାତ୍ର ସଂଗଠନ ନିଜର ପ୍ରସ୍ତୁତି ଆରମ୍ଭ କରିଛନ୍ତି । କିଏ କ୍ୟାମ୍ପସ କମିଟି ଗଠନରେ ଲାଗିଛି ତ ଆଉ କିଏ ସଂଗଠନକୁ ମଜବୁତ କରିବାକୁ ପିଲାଙ୍କୁ ଏକାଠି କରୁଛି । ବିଜେଡି ଓ ବିଜେପି ଏଦିଗରେ ଆଗରେ ରହିଥିବା ବେଳେ କଂଗ୍ରେସ ପଛରେ ପଡ଼ିଛି । ଗତ ୨୦୨୫ ଜୁଲାଇ ମାସରୁ ଛାତ୍ର କଂଗ୍ରେସର ରାଜ୍ୟ ସଭାପତି ପଦ ଖାଲି ପଡ଼ିଛି ।
ଆଗକୁ ପଞ୍ଚାୟତ ନିର୍ବାଚନ, ପୌର ନିର୍ବାଚନ ଥିବାରୁ ସରକାର ଏ ଶିକ୍ଷାବର୍ଷରେ ଛାତ୍ର ସଂସଦ ନିର୍ବାଚନ ପାଇଁ ପ୍ରସ୍ତୁତ ହେଉଥିବା ନେଇ ଚର୍ଚ୍ଚା ହେଉଛି । ସରକାରୀ ଦଳର ସମର୍ଥିତ ଛାତ୍ର ଗୋଷ୍ଠୀ କିଭଳି ଭାବେ କ୍ୟାମ୍ପସ ହାତେଇବେ ତାକୁ ନେଇ ଏବେଠୁ କସରତ ଆରମ୍ଭ ହୋଇଛି । ବିଭିନ୍ନ ଦଳର ଛାତ୍ରଛାତ୍ରୀଙ୍କୁ ନିଜର ଦଳରେ ମିଶାଇବାକୁ ଯୋଜନା ଆରମ୍ଭ କରିଛନ୍ତି । ଯାହା ଯେମିତି ହେଉଛି ହେଉ ଯଦି ଛାତ୍ର ସଂସଦ ନିର୍ବାଚନ ହୁଏ ସରକାରୀ ଦଳ ସମର୍ଥିତ ପ୍ରାର୍ଥୀ କିପରି କ୍ୟାମ୍ପସ ଅକ୍ତିଆର କରିବେ ତାକୁ ନେଇ ଏବେଠୁ ଅଙ୍କକଷା ହେଉଥିବା ଶୁଣାଯାଉଛି ।

ସେହିପରି ବିଜୁ ଜନତା ଦଳ ମଧ୍ୟ ପଛରେ ପଡ଼ିନି । ବର୍ତ୍ତମାନ ଜିଲ୍ଲା କମିଟି ଗଠନ ହେଉଛି । ଅଳ୍ପ ଦିନ ମଧ୍ୟରେ ସମସ୍ତ ବିଶ୍ୱବିଦ୍ୟାଳୟ ଓ କଲେଜରେ କ୍ୟାମ୍ପସ କମିଟି ଘୋଷଣା କରିବାକୁ ଯାଉଛି । ଛାତ୍ର ବିଜେଡି ପାଖେ କ୍ୟାମ୍ପସରେ ଥିବା ପୁରୁଣା ସଂଗଠନ କିଭଳି ଆହୁରି ମଜଭୁତ ହେବ ଆହୁରି ଅଧିକ ପିଲା ଯୋଡ଼ି ହେବେ ସେଥିଲାଗି ମଧ୍ୟ ଛାତ୍ର ନେତାଙ୍କ ସହ ବୈଠକ ହେଉଛି । ଏବିଭିପି ମଧ୍ୟ କ୍ୟାମ୍ପସରେ ବିଭିନ୍ନ ଶିକ୍ଷା ସଂପର୍କିତ କାର୍ଯ୍ୟକ୍ରମ କରୁଛି । ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ କରି ପିଲାଙ୍କୁ ବାନ୍ଧି ରଖିବାକୁ ଉଦ୍ୟମ କରୁଛି । ସେ ହୋଲି ଉତ୍ସବ ହେଉକି ଅନ୍ୟ କୌଣସି ପର୍ବ ହେଉ ସବୁଥିରେ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ କରୁଛି । ମାତ୍ର ଛାତ୍ର କଂଗ୍ରେସ ମୁରବୀଶୂନ୍ୟ ହୋଇଥିବାରୁ ଏହାର କାର୍ଯ୍ୟକ୍ରମ ଧିମା ପଡ଼ିଛି ।

ଛାତ୍ର ବିଜେଡି ରାଜ୍ୟ ସଭାପତି ଇପ୍ସିତା ସାହୁ କହିଛନ୍ତି, ଆମେ ଛାତ୍ର ସଂସଦ ନିର୍ବାଚନ ପାଇଁ ପ୍ରସ୍ତୁତ ଅଛୁ । ସରକାରଙ୍କ ପାଖେ ନିର୍ବାଚନ କରିବାକୁ ଦାବି କରୁଛୁ । ସରକାର ଆଦର୍ଶ ଆଚରଣ ବିଧି ନାଁରେ ସରକାର ଅଘୋଷିତ ଜରୁରୀକାଳୀନ ଲାଗୁ କରୁଛନ୍ତି । ଆଗକୁ ବିଭିନ୍ନ ବିଶ୍ୱବିଦ୍ୟାଳୟରେ ଅଧ୍ୟାପକ ନିଯୁକ୍ତି ଥିବାରୁ ଦୁର୍ନୀତି ଲୁଚାଇବା ପାଇଁ ଏପରି ଆଚରଣ ବିଧି ଲାଗୁ କରୁଛନ୍ତି । ଏହା ଅଗଣତାନ୍ତ୍ରିକ ଓ ସରକାରଙ୍କ ଅକ୍ଷମତାକୁ ଲୁଚାଇବା ପାଇଁ ଏପରି ବ୍ୟବସ୍ଥା କରୁଛନ୍ତି । ସେହିପରି ଛାତ୍ର କଂଗ୍ରେସ ନେତା ବିଭୂତି ଭୂଷଣ ମହାପାତ୍ର କହିଛନ୍ତି, ଶୈଖିକ ବାତାବରଣ ନାଁରେ ଛାତ୍ର ସଂସଦ ନିର୍ବାଚନକୁ ବହୁଦିନ ଧରି ବନ୍ଦ ରଖାଯାଇଛି । ନିର୍ବାଚନ ଇସ୍ତାହାରରେ ଦେଇଥିବା ପ୍ରତିଶୃତି ଏଯାଏ ବିଜେପି କାର୍ଯ୍ୟକାରୀ କରିନି । ଛାତ୍ର ସଂସଦ ନିର୍ବାଚନ ନକରି ଛାତ୍ରଙ୍କ ହକ୍କୁ ହତ୍ୟା କରାଯାଉଛି । ଆଚରଣ ବିଧି ନାଁରେ ଭୟ ସୃଷ୍ଟି ନକରି ଛାତ୍ର ସଂସଦ ନିର୍ବାଚନ ହେଉ ନଚେତ୍ ଆନ୍ଦୋଳନ ଜୋରଦାର ହେବ । ଅନ୍ୟପଟେ ଏବିଭିପିର ରାଜ୍ୟ ସଂପାଦିକା ଦୀପ୍ତିମୟୀ ପ୍ରତିହାରୀ କହିଛନ୍ତି, ସରକାର ଏବର୍ଷ ଶିକ୍ଷା କ୍ୟାଲେଣ୍ଡରରେ ଛାତ୍ର ସଂସଦ ନିର୍ବାଚନ ଉଲ୍ଲେଖ କରନ୍ତୁ ।