Garvita Odia
ଯାଜପୁର; ଉତ୍ତର ଓଡ଼ିଶାରେ ବନ୍ୟା ଦୁର୍ଦ୍ଦଶା ଥମିନି । ଏବେ ବି କେତେକ ଅଞ୍ଚଳ ଜଳବନ୍ଦୀ । ଏପଟେ ସାଳନ୍ଦୀ ଉଛୁଳି ମାଡ଼ି ଆସିଲାଣି । ଜଳକା ବି ବିପଦ ସଙ୍କେତ ଉପରେ ବହୁଛି । ବୈତରଣୀ ଜଳସ୍ତର ବିପଦ ସଙ୍କେତ ମୁହାଁ ହେଉଥିବାବେଳେ ବ୍ରାହ୍ମଣୀ ଓ ସୁବର୍ଣ୍ଣରେଖା ଧିମେଇ ଧିମେଇ ଫୁଲୁଛି । ପୁଣି ଫୁଲୁଛି ବୈତରଣୀ । ଭୟରେ ଯାଜପୁରର ତଳିଆ ଲୋକ । ଅନେକ ଗାଁରୁ ପାଣି ଖସିନଥିବା ବେଳେ ନଦୀରେ ପୁଣି ବନ୍ୟା ପାଣି ଆସିବା ସମସ୍ତଙ୍କ ଚିନ୍ତା ବଢାଇ ଦେଇଛି। ଯାଜପୁରର ପ୍ରମୁଖ ନଦୀ ବୈତରଣୀ , ଖରସ୍ରୋତା , ବ୍ରାହ୍ମଣୀ ଏବଂ ବୈତରଣୀ ନଦୀର ଶାଖା କାଣି ନଦୀରେ କିଛି ଦିନ ପୂର୍ବରୁ ବନ୍ୟା ଆସି ଅନେକ ପଞ୍ଚାୟତ ଓ ଗାଁ ଜଳ ମଗ୍ନ ହୋଇଥିବା ବେଳେ ଅନେକ ଚାଷ ଜମି ରେ ପାଣି ପଶି କ୍ଷୟ କ୍ଷତି ହୋଇଥିଲା । କଚ୍ଚା ଘର ଭାଙ୍ଗି ମାଟିରେ ମିଶି ଯିବା ଫଳରେ ଅନେକ ବାସ ହରା ହୋଇପଡିଛନ୍ତି । ଏ ସବୁ ଦୁର୍ଦ୍ଦଶାରୁ ଲୋକେ ଉଠିନଥିବା ବେଳେ ଏବେ ନଦୀରେ ପୁଣି ବନ୍ୟା ପାଣି ଆସିଛି । ସତର୍କ ସଂକେତ ୧୭.୮୩ ଥିବା ବେଳେ ୧୭.୫୮ ମିଟର ରେ ବନ୍ୟା ଜଳ ପ୍ରବାହିତ ହେଉଛି ।
ବନ୍ୟା ପ୍ରଭାବିତ ଭଦ୍ରକରେ ବିପନ୍ନମାନେ ନିଜ ଘର ସଜାଡ଼ିବା ଆରମ୍ଭ କରିଥିବା ବେଳେ ପୁଣି ଚିନ୍ତା ବଢ଼ାଇଛି ସାଳନ୍ଦୀ ବନ୍ୟା । ପୁଣି ବନ୍ୟା ସ୍ଥିତି ଉପୁଜିଛି । ବୈତରଣୀ ନଦୀରେ ଫୁଲୁଥିବା ବେଳେ ସାଳନ୍ଦୀ ଓ ଏହାର ଶାଖା ନଦୀରେ ବନ୍ୟା ସ୍ଥିତି ସୃଷ୍ଟି ହୋଇଛି । ଭଦ୍ରକ ପୌରପାଳିକା ସହ କେତେକ ପଞ୍ଚାୟତ ଓ ତିହିଡି ବ୍ଲକ୍ ରେ ବନ୍ୟା ପାଣି ପଶିଛି । ଅନେକ ଅଞ୍ଚଳ ଜଳାର୍ଣ୍ଣବ ହୋଇଛି । ମୁକୁଳା ପଡିଥିବା ଅନେକ ପୁରୁଣା ଘାଈରେ ପାଣି ପଶୁଛି । ମୟୂରଭଞ୍ଜ ଓ କେନ୍ଦୁଝରରେ ବର୍ଷା ଉପରେ ନଜର ରଖିଛି ପ୍ରଶାସନ । ହଦଗଡ଼ ଡ୍ୟାମ ୨ଟି ଗେଟ୍ ଖୋଲା ଯାଉଛି ।
ବନ୍ୟାରେ ୨୩ଟି ଜିଲ୍ଲା ପ୍ରଭାବିତ ହୋଇଛି । ହେଲେ ଏଯାଏଁ କ୍ଷୟକ୍ଷତି ହିସାବ ସରିନାହିଁ । ସର୍ବାଧିକ ପ୍ରଭାବିତ ବାଲେଶ୍ୱର, ଭଦ୍ରକ, ଯାଜପୁର ଜିଲ୍ଲାର କ୍ଷୟକ୍ଷତି ପରିମାଣ ନେଇ ହିସାବ ଜାରି ରହିଛି । ବନ୍ୟା କ୍ଷତିର ଆଶିଂକ ରିପୋର୍ଟ ଅନୁସାରେ ୩୭ ହଜାର ହେକ୍ଟର ଫସଲ ପ୍ରଭାବିତ । ୨୩ ଜିଲ୍ଲାରେ ଏବେ ସୁଦ୍ଧା ୩୫୬୭ କ୍ଷତିଗ୍ରସ୍ତ ଘର ଚିହ୍ନଟ । ସେପଟେ ଭାରତୀୟ ପାଣିପାଗ ବିଭାଗ ସୂଚନା ଦେଇଛି, ଗାଙ୍ଗେୟ ପଶ୍ଚିମବଙ୍ଗ ଓ ପାଖ ବାଂଲାଦେଶ ଉପରେ ଥିବା ଘୂଣ୍ଣି ର୍ବଳୟ ଘନୀଭୂତ ହେଉଛି । ଶନିବାରକୁ ଲଘୁଚାପ ରୂପ ନେଇ ଗାଙ୍ଗେୟ ପଶ୍ଚିମବଙ୍ଗ ଓ ପାଶ୍ୱର୍ବର୍ତ୍ତୀ ଉତ୍ତର ପଶ୍ଚିମ ବଙ୍ଗୋପସାଗର ଉପରେ ରହିବ । ଏହା ପଶ୍ଚିମ ଉତ୍ତର ପଶ୍ଚିମ ଦିଗରେ ମୁହାଁଇ ମୌସୁମୀ ଟ୍ରଫ୍ ସହ ସମାନ୍ତରାଳ ଭାବେ ଗାଙ୍ଗେୟ ପଶ୍ଚିମବଙ୍ଗ, ପାଶ୍ୱର୍ବର୍ତ୍ତୀ ଉତ୍ତର ଓଡ଼ିଶା, ଝାଡ଼ଖଣ୍ଡ, ଉତ୍ତର ଛତିଶଗଡ଼ ଆଡ଼କୁ ଗତି କରିବ । ଏହା ପ୍ରଭାବରେ ରାଜ୍ୟରେ ବର୍ଷା ଲାଗି ରହିବ ।
