Garvita Odia
ନବରଙ୍ଗପୁର: ମର୍ମନ୍ତୁଦ ଦୁର୍ଘଟଣାରେ ଚାଲିଗଲେ ବାପା ଓ ଦୁଇ ପୁଅ, ମାଆ ଏବଂ ଆଉ ଜଣେ ପୁଅ ଗୁରୁତର ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି । ନବରଙ୍ଗପୁର ଜିଲ୍ଲା କୁଣ୍ଡାଇ ଥାନା ଦେଓଭାରଣ୍ଡି ଗାଁ ନିକଟରେ ଘଟିଛି ଏହି ସଡ଼କ ଦୁର୍ଘଟଣା । ବାପା, ମାଆ ଏବଂ ତିନି ପିଲା ଏକ ମୋଟର ସାଇକେଲରେ ୪୦ ନମ୍ବର ରାଜ୍ୟ ରାଜପଥରେ ଯାଉ ଥିବା ବେଳେ, ରାଇଘରରୁ କୁନ୍ଦେଇ ଯାଉଥିବା ଏକ ଟ୍ରକ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ, ମୋଟର ସାଇକେଲ ଟ୍ରକ ତଳେ ଚାପି ହୋଇ ବହୁ ଦୂର ପର୍ଯ୍ୟନ୍ତ ଘୋଷାଡ଼ି ହୋଇ ଯାଇଥିଲା । ଦୁର୍ଘଟଣା ପରେ ଟ୍ରକ ଡ୍ରାଇଭର ଥାନାରେ ଆତ୍ମ ସମର୍ପଣ କରିଛନ୍ତି ।
ଟ୍ରକ୍ ଦୁର୍ଘଟଣାରେ ପ୍ରାଣ ହାରାଇଥିବା ମୃତକମାନେ ହେଲେ ବାବୁଲାଲ ଗୋଣ୍ଡ (35), ପୁଅ ପ୍ରଦୀପ (7) ଓ ପୁଅ ତୁଷାର (3) । ଦୁର୍ଘଟଣାରେ ମୃତକଙ୍କ ପତ୍ନୀ ଓ 10 ବର୍ଷୀୟ ପୁଅ ଗୁରୁତର ହୋଇଛନ୍ତି । ସେମାନଙ୍କୁ ପ୍ରଥମେ ହାଟଭରଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଅବସ୍ଥା ସଙ୍କଟାପନ୍ନ ହେବାରୁ ଉମରକୋଟ ସବଡିଭିଜନାଲ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ପୋଲିସ ଘଟଣାର ତଦନ୍ତ ଜାରି ରଖିଛି ।
ଦୁର୍ଘଟଣା ପରେ ସ୍ଥାନୀୟ ଲୋକ ରାସ୍ତା ଅବରୋଧ କରି ମୃତକଙ୍କ ପରିବାର ପାଇଁ କ୍ଷତିପୂରଣ ଦାବି କରିଥିଲେ । ସ୍ଥାନୀୟ ପୋଲିସର ହସ୍ତକ୍ଷେପ ପରେ ରାସ୍ତା ଅବରୋଧ ହଟିଥିଲା । ପୋଲିସ ସୂଚନା ଅନୁସାରେ ରାଇଘରରୁ କୁଣ୍ଡେଇ ସଂଯୋଗ କରୁଥିବା ରାଜପଥରେ ଏହି ଦମ୍ପତି ସେମାନଙ୍କ ତିନି ଜଣ ପିଲାଙ୍କ ସହ ଏକ ବାଇକରେ ଯାଉଥିଲେ । ଅପରପକ୍ଷରେ ରାଇଘରରୁ କୁଣ୍ଡେଇ ପଟକୁ ଆସୁଥିବା ଏକ ଟ୍ରକ, ବାଇକକୁ ଧକ୍କା ଦେବା ସହ, କିଛି ବାଟ ଘୋଷାଡ଼ି ନେଇଥିଲା । ଦୁର୍ଘଟଣା ଘଟାଇ ଥିବା ଟ୍ରକ୍ ର ଡ୍ରାଇଭର ଥାନାରେ ଆତ୍ମ ସମର୍ପଣ କରିଥିବା ବେଳେ, ପୋଲିସ ତାକୁ ପଚରାଉଚରା କରିବା ସହ ଘଟଣାର ତଦନ୍ତ କରୁଛି।
