Garvita Odia
ଆଜି ହାଇକୋର୍ଟରେ ‘ମହାପ୍ରଭୁ ଜଗନ୍ନାଥ’ ଆନିମେଟେଡ୍ ଫିଲ୍ମ ମାମଲାର ଶୁଣାଣି ହେବ। ଏହା ପୂର୍ବରୁ ଗତକାଲି ରାଜ୍ୟ ଅତିଥି ଭବନରେ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ। ବୈଠକରେ ଆଇନ ମନ୍ତ୍ରୀ, ମୁଖ୍ୟ ଶାସନ ସଚିବ, ଏଜି ପୀତାମ୍ବର ଆଚାର୍ଯ୍ୟ, ଶ୍ରୀମନ୍ଦିର ମୁଖ୍ୟ ପ୍ରଶାସକ ପ୍ରମୁଖ ଉପସ୍ଥିତ ଥିଲେ। ବୈଠକ ପରେ ଗଜପତି ମହାରାଜା ଦିବ୍ୟସିଂହ ଦେବ କହିଛନ୍ତି ଯେ, ସୁପ୍ରିମକୋର୍ଟଙ୍କ ଜୁଲାଇ ୨୯ ନିଷ୍ପତ୍ତି ପରେ ଏହି ବୈଠକ ବସିଥିଲା।
ମହାପ୍ରଭୁଙ୍କ ସଂସ୍କୃତିର ଉତ୍ତମ ଭାବେ ପ୍ରଚାର ନେଇ ଆଲୋଚନା ହୋଇଛି। ଆଜି ହାଇକୋର୍ଟରେ ମାମଲା ଆସୁଥିବା ବେଳେ କୋର୍ଟ କ’ଣ ନିଷ୍ପତ୍ତି ନେଉଛନ୍ତି ତାଉପରେ ନଜର ରହିବ। ଏହା ଅତି ଗୁରୁତର ବିଷୟ, ପ୍ରତି ଜଗନ୍ନାଥପ୍ରେମୀ ଓ ଭକ୍ତଙ୍କ ହୃଦୟର କଥା। ବିବାଦର ଶୀଘ୍ର ଉତ୍ତମ ସମାଧାନ ହୋଇପାରିବା ନେଇ ଆଶା କରିଛନ୍ତି ଗଜପତି ମହାରାଜା ଦିବ୍ୟସିଂହ ଦେବ।
ସେପଟେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ଉପରେ ନିର୍ମିତ କାର୍ଟୁନ୍ ସିନେମାକୁ ନେଇ ତେଜୁଛି ବିରୋଧ। ଅନୁଗୁଳ ଶୈଳ ଶ୍ରୀକ୍ଷେତ୍ର ପରିସରରେ ଏକ ସାମ୍ବାଦିକ ସମ୍ମିଳନୀ କରି ଜଗନ୍ନାଥପ୍ରେମୀ ଏଭଳି କାର୍ଟୁନ୍ ଫିଲ୍ମ ଜଗନ୍ନାଥ ସଂସ୍କୃତି ବିରୋଧୀ ବୋଲି କହିଛନ୍ତି। ତାସହ କହିଛନ୍ତି, ଏଥିରେ ମହାପ୍ରଭୁଙ୍କୁ ବିକୃତ କରି ଦର୍ଶାଯାଇଛି।
ତେଣୁ ସମ୍ପୃକ୍ତ ଆନିମେସନ ଚଳଚ୍ଚିତ୍ରର ନିର୍ମାତା ଏହି ଚଳଚ୍ଚିତ୍ର ପ୍ରଦର୍ଶନରୁ କ୍ଷାନ୍ତ ରୁହନ୍ତୁ ବୋଲି ଦାବି କରିଛନ୍ତି ଜଗନ୍ନାଥ ପ୍ରେମୀ। ଅପରପକ୍ଷରେ ସେନସର ବୋର୍ଡର ଅନୁମୋଦନ ହୋଇଥିବା ଦର୍ଶାଇ ସୁପ୍ରିମକୋର୍ଟ ଏ ପ୍ରସଙ୍ଗକୁ ଏଡ଼ାଇ ଯାଇଛନ୍ତି। ଯାହା କୋଟି କୋଟି ଜଗନ୍ନାଥପ୍ରେମୀଙ୍କୁ ବ୍ୟଥିତ କରିଛି।
ତେଣୁ ସେନସର୍ ବୋର୍ଡ ତୁରନ୍ତ ଏ ଚଳଚ୍ଚିତ୍ରର ସାର୍ଟିଫିକେଟ ବାତିଲ କରିବାକୁ ସେମାନେ ଦାବି କରିଛନ୍ତି। ଏପରିକି ଉଭୟ କେନ୍ଦ୍ର ଓ ରାଜ୍ୟ ସରକାର ଏ ପ୍ରସଙ୍ଗରେ ତୁରନ୍ତ ହସ୍ତକ୍ଷେପ କରନ୍ତୁ। ନଚେତ୍ ଆଗାମୀ ଦିନରେ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ଜଗନ୍ନାଥପ୍ରେମୀ। ଏନେଇ ସଂପୃକ୍ତ ଫିଲ୍ମର ନିର୍ମାତା କିମ୍ବା ପ୍ରଯୋଜନା ସଂସ୍ଥା ପକ୍ଷରୁ କୌଣସି ପ୍ରତିକ୍ରୟା ମିଳିପାରିନି।
