Garvita Odia
କଟକ: ଓଡ଼ିଶା ହାଇକୋର୍ଟ ପାଇଁ ୪ ଜଣ ନୂଆ ବିଚାରପତିଙ୍କ ନାମକୁ ସୁପ୍ରିମକୋର୍ଟ କଲେଜିୟମ ମଞ୍ଜୁରୀ ପ୍ରଦାନ କରିଛନ୍ତି। ଅଗଷ୍ଟ ୧୮ରେ ଅନୁଷ୍ଠିତ ସୁପ୍ରିମକୋର୍ଟ କଲେଜିୟମ ବୈଠକରେ ୪ ଜଣ ଆଇନଜୀବୀଙ୍କୁ ଓଡ଼ିଶା ହାଇକୋର୍ଟର ବିଚାରପତି ଭାବେ ନିଯୁକ୍ତି ଦେବା ନେଇ ସୁପାରିସକୁ ଅନୁମୋଦନ ମିଳିଛି। କଲେଜିୟମ୍ ପକ୍ଷରୁ ଜାରି ବିବୃତି ଅନୁଯାୟୀ, ଓଡ଼ିଶା ହାଇକୋର୍ଟର ବିଚାରପତି ଭାବେ ନିଯୁକ୍ତି ପାଇଁ ସସ୍ମିତା ତ୍ରିପାଠୀ, ବରିଷ୍ଠ ଆଇନଜୀବୀ ଆଦିତ୍ୟ ନାରାୟଣ ଦାସ, ବରିଷ୍ଠ ଆଇନଜୀବୀ ରଜ୍ଜିତ ରୟ ଏବଂ ବରିଷ୍ଠ ଆଇନଜୀବୀ ଗୌତମ ମିଶ୍ରଙ୍କ ନାମକୁ ଅନୁମୋଦନ କରାଯାଇଛି। ଏହି ନୂତନ ନିଯୁକ୍ତି ଦ୍ୱାରା ଓଡ଼ିଶା ହାଇକୋର୍ଟରେ ବିଚାରପତିଙ୍କ ସଂଖ୍ୟା ବୃଦ୍ଧି ପାଇବା ସହ ମାମଲାଗୁଡ଼ିକର ଶୀଘ୍ର ଫଇସଲା ପାଇଁ ସହାୟକ ହେବ। ସୂଚନାଯୋଗ୍ୟ ଯେ ହାଇକୋର୍ଟର ମଞ୍ଜୁରପ୍ରାପ୍ତ ୩୩ ବିଚାରପତି ପଦରୁ ୧୭ଜଣ ବିଚାରପତି ରହିଛନ୍ତି। ସେମାନଙ୍କ ମଧ୍ୟରୁ ୨ଜଣଙ୍କ ବଦଳି ସୁପାରିସ କରାଯାଇଛି। ବିଚାରପତିଙ୍କ ସଂଖ୍ୟା ହ୍ରାସକୁ ନେଇ ଆଇନଜୀବୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ହାଇକୋର୍ଟ ବାର୍ ଆସୋସିଏସନ୍ ପକ୍ଷରୁ ମଧ୍ୟ ବିଚାରପତି ପଦ ପୂରଣ ଲାଗି ରାଷ୍ଟ୍ରପତି ଏବଂ ସୁପ୍ରିମ୍କୋର୍ଟ ପ୍ରଧାନ ବିଚାରପତିଙ୍କୁ ଭେଟି ଦାବି ସଂକ୍ରାନ୍ତରେ ଅବଗତ କରାଯିବ ବୋଲି କୁହାଯାଇଥିଲା। ଏହି ଦାବି ପରେ ଆଜି ସୁପ୍ରିମକୋର୍ଟର କଲେଜିୟମ୍ ଉପରୋକ୍ତ ୪ ଆଇନଜୀବୀଙ୍କ ନାଁ ହାଇକୋର୍ଟ ବିଚାରପତି ପଦଲାଗି ଅନୁମୋଦନ କରିବା ଦ୍ବାରା ଉଚ୍ଚ ନ୍ୟାୟାଳୟରେ ପଦପୂରଣ ସହ ବିଚାର ପ୍ରକିୟା ତ୍ବରାନ୍ବିତ ହୋଇପାରିବ ବୋଲି ଆଶା କରାଯାଉଛି। ତେବେ କଲେଜିୟମର ସୁପାରିସ ଉପରେ କେନ୍ଦ୍ର ଆଇନ ମନ୍ତ୍ରଣାଳୟ ମୋହର ଓ ପରେ ରାଷ୍ଟ୍ରପତିଙ୍କ ଚୂଡ଼ାନ୍ତ ଅନୁମୋଦନକୁ ଅପେକ୍ଷା କରାଯାଇଛି।
