କାଳବୈଶାଖୀର ତାଣ୍ଡବ : ବ୍ୟାପକ କ୍ଷୟକ୍ଷତି

କ୍ଷତିପୂରଣ ଦାବିରେ ଦେବଗଡ଼ – ଅନୁଗୁଳ ଜାତୀୟ ରାଜପଥ ରାସ୍ତାରୋକ

ଦେବଗଡ଼: ଦେବଗଡ଼ ଜିଲ୍ଲା ରିଆମାଳ ବ୍ଲକ ଅଞ୍ଚଳରେ କାଳବୈଶାଖୀର ତାଣ୍ଡବ ପ୍ରଭାବରେ ବ୍ୟାପକ କ୍ଷତିଗ୍ରସ୍ତ ହୋଇଛି। କ୍ଷତିପୂରଣ ଦାବିରେ ଦେବଗଡ଼ – ଅନୁଗୁଳ ଜାତୀୟ ରାଜପଥରେ ବହୁ କ୍ଷତିଗ୍ରସ୍ତ ପରିବାର ରାସ୍ତାରୋକ କରିଛନ୍ତି।ଖବର ପାଇ ପ୍ରଥମେ ତହସିଲଦାର ବିଜୟାଲକ୍ଷ୍ମୀ ନାୟକ,ଥାନା ଅଧିକାରୀ ବିନୟ କେରକେଟା ପହଞ୍ଚି ବୁଝାସୁଝା କରିଥିଲେ। ସୂଚନା ଅନୁସାରେ ଆଜି ସନ୍ଧ୍ୟା ୬ ଟା ୩୦ ଅଞ୍ଚଳରେ କାଳବୈଶାଖୀ ରେ ତାଣ୍ଡବ ରଚିଥିଲା।ପ୍ରବଳ ପବନ ସାଙ୍ଗକୁ ବର୍ଷା ହୋଇଥିବା ବେଳେ ବହୁ ଘର ଦ୍ବାର ଉଡ଼ାଇ ନେଇଛି। ଗଛ ପଡ଼ି ଜାତୀୟ ରାଜପଥ ରାସ୍ତା ଅବରୋଧ ହୋଇଥିଲା। ଦମକଳବାହିନୀ ପହଞ୍ଚି ଗଛ କାଟି ସଫା କରିଥିଲେ।ଗୁଣ୍ଡିଆପାଲି ପଞ୍ଚାୟତ ଅନ୍ତର୍ଗତ ବିଲେଇଘଟି ଓ ବନାକାଲୋ ଗ୍ରାମରେ ୩୦ରୁ ଊର୍ଦ୍ଧ୍ବ ଘର ଦ୍ବାରର ଛପର, ଆଜବେଷ୍ଟସ ଉଡ଼ାଇ ନେଇଛି।ଘରର ଆସବାବପତ୍ର ,ଧାନ ଚାଉଳ ଇତ୍ୟାଦି ନଷ୍ଟ ହୋଇ ଲୋକ ବେଘର ହୋଇଛନ୍ତି।ଦୁଇ ଗ୍ରାମର କ୍ଷତିଗ୍ରସ୍ତ ପରିବାର କ୍ଷତିପୂରଣ ଦାବିରେ ଦେବଗଡ଼ – ଅନୁଗୁଳ ଜାତୀୟ ରାଜପଥ ବିଲେଇଘଟି ଠାରେ ରାସ୍ତା ରୋକ କରିଥିଲେ। ତହସିଲଦାର,ଥାନା ଅଧିକାରୀ ପହଞ୍ଚି ବୁଝାସୁଝା ପରେ ରାତି ୯ ଟାରେ ରାସ୍ତା ରୋକ ହଟିଥିଲା।ପରେ ବିଡ଼ିଓ ଆଦିତ୍ୟ ପଣ୍ଡା ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଆସନ୍ତା କାଲି ସମସ୍ତ ତଦନ୍ତ କରି ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେବା ପରେ ରାସ୍ତାରୋକ ହଟିଥିଲା।