Garvita Odia
ନୂଆଦିଲ୍ଲୀ: ପଶ୍ଚିମ ଏସିଆ ସଙ୍କଟ ମଧ୍ୟରେ ହୋର୍ମୁଜ୍ ପ୍ରଣାଳୀରୁ ଭାରତ ପାଇଁ ଏକ ବଡ଼ ଖବର ସାମ୍ନାକୁ ଆସିଛି । ଆମେରିକା ଏବଂ ଇରାନ ମଧ୍ୟରେ ଶାନ୍ତି ଚୁକ୍ତି ସ୍ୱାକ୍ଷରିତ ହେବା ପରେ ଏହି ସାମୁଦ୍ରିକ ମାର୍ଗରେ ସ୍ଥିତି ଦ୍ରୁତ ଗତିରେ ସ୍ୱାଭାବିକ ହେବାରେ ଲାଗିଛି । ଗତ ଜୁନ୍ ୧୭, ୨୦୨୬ରେ ଦୁଇ ଦେଶ ମଧ୍ୟରେ ଶାନ୍ତି ବୁଝାମଣା ହେବା ପରଠାରୁ ଏପର୍ଯ୍ୟନ୍ତ ୧୧ଟି ଭାରତୀୟ ଜାହାଜ ହୋର୍ମୁଜ୍ ଜଳପଥ ଦେଇ ଦେଶ ଅଭିମୁଖେ ଯାତ୍ରା ଆରମ୍ଭ କରିସାରିଛନ୍ତି । ଅନ୍ୟପଟେ, ଏବେ ବି ଆଉ ୧୦ଟି ଜାହାଜ ସେଠାରେ ଅଟକି ରହିଥିବା ବେଳେ ସେଗୁଡ଼ିକ ମଧ୍ୟ ଖୁବ୍ ଶୀଘ୍ର ଭାରତ ଅଭିମୁଖେ ବାହାରିବେ ବୋଲି ଜଣାପଡ଼ିଛି ।
ବିଦେଶ ମନ୍ତ୍ରାଳୟର ମୁଖପାତ୍ର ରନ୍ଧୀର ଜାୟସୱାଲ ଏହି ସୂଚନା ଦେଇ କହିଛନ୍ତି ଯେ, ଏହି ଜାହାଜଗୁଡ଼ିକରେ ବହୁ ପରିମାଣର ଅଶୋଧିତ ତୈଳ ଏବଂ ସାର ରହିଛି । ଏଗୁଡ଼ିକ ଭାରତର ବିଭିନ୍ନ ବନ୍ଦରରେ ପହଞ୍ଚିବା ପରେ ଦେଶରେ ପେଟ୍ରୋଲିୟମ ଜାତ ଦ୍ରବ୍ୟ ଏବଂ ସାରର ଉପଲବ୍ଧତା ବୃଦ୍ଧି କରିବାରେ ବେଶ୍ ସହାୟକ ହେବ । ମୁଖପାତ୍ରଙ୍କ ସୂଚନା ଅନୁସାରେ, ହୋର୍ମୁଜରୁ ଜାହାଜଗୁଡ଼ିକ ବାହାରିବା ଆରମ୍ଭ କରିଥିବା ବେଳେ ୩ଟି ଭାରତୀୟ ଜାହାଜ ବାହାରୁ ହୋର୍ମୁଜର ପଶ୍ଚିମ ଭାଗକୁ ମଧ୍ୟ ପ୍ରବେଶ କରିଛନ୍ତି । ଭାରତ ଅଭିମୁଖେ ଆସୁଥିବା ୧୧ଟି ଜାହାଜ ମଧ୍ୟରୁ ୩ଟି ଭାରତୀୟ ଜାହାଜରେ ପ୍ରାୟ ୨.୮୫ ଲକ୍ଷ ମେଟ୍ରିକ୍ ଟନ୍ ଅଶୋଧିତ ତୈଳ ରହିଛି । ଏହା ବ୍ୟତୀତ ବିଦେଶରେ ପଞ୍ଜୀକୃତ ହୋଇଥିବା ଗୋଟିଏ ଏଲପିଜି ଓ ଗୋଟିଏ ଅଶୋଧିତ ତୈଳ ବାହୀ ଜାହାଜ ଭାରତ ଅଭିମୁଖେ ଆସୁଛି । ଅନ୍ୟ ୬ଟି ଜାହାଜରେ ସାର ଭର୍ତ୍ତି ହୋଇ ରହିଛି, ଯାହା ଭାରତ ପାଇଁ ଅତ୍ୟନ୍ତ ଜରୁରୀ ।
ଚଳିତ ବର୍ଷ ଫେବୃଆରୀ-ମାର୍ଚ୍ଚ ମାସରେ ପଶ୍ଚିମ ଏସିଆ ସଙ୍କଟ ତେଜିବା ସମୟରେ ହୋର୍ମୁଜ୍ ଅଞ୍ଚଳରେ ପ୍ରାୟ ୨୪ଟି ଭାରତୀୟ ଜାହାଜ ଫସି ଯାଇଥିଲା । ଏଗୁଡ଼ିକ ମଧ୍ୟରୁ ଅଧିକାଂଶ ଜାହାଜ ହୋର୍ମୁଜର ପଶ୍ଚିମ ପାର୍ଶ୍ୱରେ ଥିଲେ । ଏହି ଟ୍ୟାଙ୍କରଗୁଡ଼ିକରେ ମୁଖ୍ୟତଃ କ୍ରୁଡ୍ ଅଏଲ୍, ଏଲ୍ପିଜି ଏବଂ ସାର ଗଚ୍ଛିତ ଥିଲା । ଭାରତ ତାର ମୋଟ ଅଶୋଧିତ ତୈଳ ଆବଶ୍ୟକତାର ପ୍ରାୟ ୫୦ ପ୍ରତିଶତ ମଧ୍ୟପ୍ରାଚ୍ୟ ଦେଶ ଯେପରିକି ଇରାକ, ସାଉଦି ଆରବ, ୟୁଏଇ ଏବଂ କୁଏତରୁ ଆମଦାନୀ କରିଥାଏ, ଯାହା ଏହି ହୋର୍ମୁଜ୍ ଜଳପଥ ଦେଇ ହିଁ ଆସିଥାଏ । ଯଦିଓ ନିକଟ ଅତୀତରେ ଭାରତ ଅନ୍ୟ ଦେଶରୁ ତୈଳ ଆମଦାନୀ କରି ନିଜର ନିର୍ଭରଶୀଳତା କମାଇବାକୁ ଚେଷ୍ଟା କରିଛି, ତଥାପି ଦେଶର ଶକ୍ତି ସୁରକ୍ଷା ପାଇଁ ହୋର୍ମୁଜ୍ ଜଳମାର୍ଗ ଆଜି ବି ଅତି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ।
