ବାତ୍ୟା ବିପନ୍ନଙ୍କ ପାଖରେ ପହଞ୍ଚିଲା ରାଇକିଆ ସରସ୍ୱତୀ ଶିଶୁ ବିଦ୍ୟା ମନ୍ଦିର

ପ୍ରଧାନ ଆଚାର୍ଯ୍ୟା ସବିତା ମିଶ୍ରଙ୍କ ନେତୃତ୍ୱରେ ଗୁରୁଜୀ ଓ ଗୁରୁମାଙ୍କ ମାନବିକ ପଦକ୍ଷେପ
ମାଣିକେଶ୍ୱର ଆଶ୍ରୟସ୍ଥଳୀରେ ବଣ୍ଟନ କଲେ ଶୁଖିଲା ଖାଦ୍ୟ

ରାଇକିଆ: ବିପଦ ସମୟରେ ମାନବିକତା ଓ ସେବା ମନୋଭାବର ପରିଚୟ ଦେଇଛି ରାଇକିଆ ସରସ୍ୱତୀ ଶିଶୁ ବିଦ୍ୟା ମନ୍ଦିର। ବାତ୍ୟାରେ ପ୍ରଭାବିତ ହୋଇ ଆଶ୍ରୟସ୍ଥଳୀରେ ରହୁଥିବା ଅସହାୟ ଓ ବିପନ୍ନ ପରିବାରଙ୍କ ସହାୟତା ପାଇଁ ବିଦ୍ୟାଳୟ ପରିବାର ଆଗେଇ ଆସିଛି। ବିଦ୍ୟାଳୟର ପ୍ରଧାନ ଆଚାର୍ଯ୍ୟା ଶ୍ରୀମତୀ ସବିତା ମିଶ୍ରଙ୍କ ନେତୃତ୍ୱରେ ସମସ୍ତ ଗୁରୁଜୀ ଓ ଗୁରୁମାଙ୍କ ପକ୍ଷରୁ ମାଣିକେଶ୍ୱର ପଞ୍ଚାୟତର ବାତ୍ୟା ଆଶ୍ରୟସ୍ଥଳୀରେ ଅବସ୍ଥାନ କରୁଥିବା ବାତ୍ୟା ବିପନ୍ନଙ୍କୁ ଶୁଖିଲା ଖାଦ୍ୟ ବଣ୍ଟନ କରାଯାଇଛି।ବାତ୍ୟା ଓ ଲଗାଣ ବର୍ଷାର ପ୍ରଭାବରେ ରାଇକିଆ ବ୍ଲକର ବିଭିନ୍ନ ଅଞ୍ଚଳରେ ଜନଜୀବନ ବ୍ୟାହତ ହୋଇଥିବା ବେଳେ ଅନେକ ପରିବାର ନିଜ ଘର ଛାଡ଼ି ସୁରକ୍ଷିତ ସ୍ଥାନ ଓ ବାତ୍ୟା ଆଶ୍ରୟସ୍ଥଳୀରେ ରହିବାକୁ ବାଧ୍ୟ ହୋଇଛନ୍ତି। ଏଭଳି ସଙ୍କଟପୂର୍ଣ୍ଣ ପରିସ୍ଥିତିରେ ଆଶ୍ରୟସ୍ଥଳୀରେ ରହୁଥିବା ଲୋକଙ୍କ ନିକଟରେ ଖାଦ୍ୟ ସାମଗ୍ରୀ ପହଞ୍ଚାଇବା ଏକ ମାନବିକ ଦାୟିତ୍ୱ ହୋଇପଡ଼ିଛି। ଏହି ଆବଶ୍ୟକତାକୁ ଅନୁଭବ କରି ସରସ୍ୱତୀ ଶିଶୁ ବିଦ୍ୟା ମନ୍ଦିରର ଗୁରୁଜୀ ଓ ଗୁରୁମାମାନେ ନିଜସ୍ୱ ଉଦ୍ୟମରେ ସହାୟତାର ହାତ ବଢ଼ାଇଛନ୍ତି.ପ୍ରଧାନ ଆଚାର୍ଯ୍ୟା ସବିତା ମିଶ୍ରଙ୍କ ନେତୃତ୍ୱରେ ବିଦ୍ୟାଳୟର ସମସ୍ତ ଗୁରୁଜୀ ଗୁରୁମା ଏବଂ କର୍ମଚାରୀ ଏକତ୍ରିତ ହୋଇ ମାଣିକେଶ୍ୱର ପଞ୍ଚାୟତର ଆଶ୍ରୟସ୍ଥଳୀରେ ପହଞ୍ଚି ବିପନ୍ନଙ୍କୁ ଶୁଖିଲା ଖାଦ୍ୟ ବଣ୍ଟନ କରିଥିଲେ। ବିପଦ ସମୟରେ କେବଳ ପ୍ରଶାସନ ନୁହେଁ, ସମାଜର ପ୍ରତ୍ୟେକ ବର୍ଗର ଲୋକ ନିଜ ନିଜ ସାମର୍ଥ୍ୟ ଅନୁସାରେ ସହଯୋଗର ହାତ ବଢ଼ାଇଲେ ବିପନ୍ନଙ୍କ ଦୁଃଖ ଓ ଦୁର୍ଦ୍ଦଶାକୁ ଅନେକାଂଶରେ ଲାଘବ କରାଯାଇପାରିବ ବୋଲି ଏହି ପଦକ୍ଷେପରୁ ବାର୍ତ୍ତା ମିଳିଛି।
ଶିକ୍ଷାର ଉଦ୍ଦେଶ୍ୟ କେବଳ ପାଠପଢ଼ା ଓ ପରୀକ୍ଷାରେ ସଫଳତା ହାସଲ କରିବା ନୁହେଁ, ବରଂ ଛାତ୍ରଛାତ୍ରୀଙ୍କ ମନରେ ସେବା, ସହଯୋଗ, ସମ୍ବେଦନଶୀଳତା ଓ ସାମାଜିକ ଦାୟିତ୍ୱବୋଧର ଭାବନା ସୃଷ୍ଟି କରିବା ମଧ୍ୟ ଏହାର ଏକ ମୁଖ୍ୟ ଲକ୍ଷ୍ୟ। ରାଇକିଆ ସରସ୍ୱତୀ ଶିଶୁ ବିଦ୍ୟା ମନ୍ଦିରର ଏହି ସହାୟତା କାର୍ଯ୍ୟ ସେହି ମୂଲ୍ୟବୋଧର ଏକ ସୁନ୍ଦର ଉଦାହରଣ ଭାବେ ପରିଗଣିତ ହୋଇଛି।
ପ୍ରାକୃତିକ ବିପର୍ଯ୍ୟୟ ସମୟରେ ମାନବିକତାର ପରିଚୟ ଦେଇ ବିପନ୍ନଙ୍କ ପାଖରେ ଠିଆ ହେବା ହିଁ ପ୍ରକୃତ ସାମାଜିକ ସେବା। ରାଇକିଆ ସରସ୍ୱତୀ ଶିଶୁ ବିଦ୍ୟା ମନ୍ଦିରର ଏହି ପ୍ରୟାସ ସମାଜର ଅନ୍ୟ ଅନୁଷ୍ଠାନ ଓ ସାମାଜିକ ସଂଗଠନଗୁଡ଼ିକୁ ମଧ୍ୟ ବିପନ୍ନଙ୍କ ସହାୟତା ପାଇଁ ଆଗେଇ ଆସିବାକୁ ପ୍ରେରଣା ଯୋଗାଇବ ବୋଲି ଆଶା କରାଯାଉଛି।
ରିପୋର୍ଟର ଦୁତି କୃଷ୍ଣ ପଣ୍ଡା