ଭୁବନେଶ୍ୱରରେ ଲକ୍ଷ୍ନୌର ସିବିଆଇ ଟିମ୍

ଭୁବନେଶ୍ୱର: ଭୁବନେଶ୍ୱରରେ ଲକ୍ଷ୍ନୌର ସିବିଆଇ ଟିମ୍। ୱାପକସ୍ ଅଫିସରେ ଚାଲିଛି ଖୋଳତାଡ଼। ଲାଞ୍ଚ ନେଇ ଅନୈତିକ ଭାବେ ଟେଣ୍ଡର ଦେବ ଅଭିଯୋଗରେ କେନ୍ଦ୍ର ସରକାରଙ୍କ ଜଳ ଓ ବିଦ୍ୟୁତ ପରାମର୍ଶ ସେବା କାର୍ୟ୍ୟାଳୟ(ୱାପକସ୍)ର ଭୁବନେଶ୍ବର ଜୟଦେବିବହାର ସ୍ଥିତ କାର୍ୟ୍ୟାଳୟରେ ପଶିଛି ଲକ୍ଷ୍ନୌର ସିବିଆଇ ଦଳ। ଉକ୍ତ କମ୍ପାନୀର ୩ ଅଧିକାରୀଙ୍କ ସମେତ ୮ଜଣଙ୍କ ନାମରେ ମାମଲା ରୁଜୁ ହୋଇଛି। ଅଭିଯୁକ୍ତମାନେ ହେଲେ ପ୍ରକଳ୍ପ ପରିଚାଳିକ ପଙ୍କଜ ଦୁବେ, ଦୁଇ ଅଧିକାରୀ ଭବଦ୍ୟୁତି ଭୂତିଆ, ଅଭିଷେକ ଠାକୁର, ମେସେସ୍ ଏକାନା ଏଣ୍ଟରପ୍ରାଇଜେସର ମାଲିକ ବବୁଲ ସିଂ ଯାଦବ, ମଧ୍ୟସ୍ଥ ପଙ୍କଜଙ୍କ ଭାଇ ପବନ ଦୁବେ, ରାମେଶ୍ବର ଚର୍ତ୍ତୁବେଦୀ, ଗୋପାଲ ମିଶ୍ର ଓ ରାହୁଲ ବର୍ମା।

ସୂଚନା ଥାଉକି, ୱାଟର ଆଣ୍ଡ ପାୱାର କନସଲଟାନସି ସର୍ଭିସ ବା ୱାପକୋସ୍ ନାଁରେ ଟେଣ୍ଡର ଫିକ୍ସିଂ ଅଭିଯୋଗ ଆସିଛି। କୌଣସି ପ୍ରକଳ୍ପ ନେଇ ଟେଣ୍ଡର ପ୍ରକାଶ ପାଇବା ପରେ ଏହାର ସମସ୍ତ କାଗଜପତ୍ର ପଙ୍କଜ ଦୁବେ, ଗୋପାଳଙ୍କୁ ଦେବା ସହିତ ସମ୍ପୃକ୍ତ ଠିକାଦାର କିଭଳି କାମ ପାଇବେ ସେନେଇ ଟେଣ୍ଡର ପେପର ଦାଖଲ କରିଥିଲେ । ଯେଉଁଥିପାଇଁ ଟେଣ୍ଡର ଭାଲ୍ୟୁର ୪ରୁ ୬ ପ୍ରତିଶତ ପଙ୍କଜ ଓ ଦଲାଲ ଗୋପାଳ ନେଇଥିଲେ । ସେହିଭଳି ବବୁଲ ସିଂ ଠାରୁ ଆରମ୍ଭ କରି ଅନ୍ୟମାନେ ମଧ୍ୟ ଟେଣ୍ଡର ଫିକ୍ସିଂରେ ସାମିଲ ଥିବା ତଥ୍ୟ ପ୍ରମାଣ ପାଇଛି ସିବିଆଇ । ଏନେଇ ଜଣାପଡ଼ିବା ପରେ ଭୁବନେଶ୍ବର ୱାପକୋସ୍ ଅଫିସ, ରାୟଗଡା, ଲକ୍ଷ୍ନୌ ସମେତ ୬ଟି ସ୍ଥାନରେ ଚଢ଼ାଉ କରିଛି ସିବିଆଇ ।