ମହଙ୍ଗା ହେଲା ଅମୂଲ-ମଦର ଡାଏରୀ କ୍ଷୀର

ନୂଆଦିଲ୍ଲୀ: ସାଧାରଣ ଖାଉଟିଙ୍କ ପାଇଁ ଏକ ବଡ଼ ଝଟକା । ତେଲ, ଗ୍ୟାସ୍ ପରେ ଏବେ କ୍ଷୀର ପାଇଁ ପକେଟ୍ ଉପରେ ପ୍ରଭାବ ପଡ଼ିବ । ଦେଶର ଦୁଇ ପ୍ରମୁଖ ଦୁଗ୍ଧ ଉତ୍ପାଦନକାରୀ କମ୍ପାନୀ ଅମୂଲ ଏବଂ ମଦର ଡାଏରୀ କ୍ଷୀରର ମୂଲ୍ୟ ବୃଦ୍ଧି କରିଛନ୍ତି । ଉଭୟ କମ୍ପାନୀ ଲିଟର ପିଛା ୨ ଟଙ୍କା ଲେଖାଏଁ ଦର ବଢ଼ାଇଛନ୍ତି । ବଢ଼ିଥିବା ଏହି ନୂଆ ଦର ମେ ୧୪, ୨୦୨୬ ଅର୍ଥାତ୍ ଆଜିଠାରୁ ସମଗ୍ର ଦେଶରେ ଲାଗୁ ହୋଇଛି ।
ଅମୂଲ ବ୍ରାଣ୍ଡର ମାଲିକାନା ସଂସ୍ଥା ଗୁଜରାଟ କୋଅପରେଟିଭ୍ ମିଲ୍କ ମାର୍କେଟିଂ ଫେଡେରେସନ୍ ସୂଚନା ଦେଇଛି ଯେ, କମ୍ପାନୀର ସବୁଠାରୁ ଅଧିକ ବିକ୍ରି ହେଉଥିବା ମୁଖ୍ୟ ଭେରିଆଣ୍ଟ ଗୁଡ଼ିକରେ ୨ ଟଙ୍କା ବୃଦ୍ଧି କରାଯାଇଛି । ସେଗୁଡ଼ିକ ହେଲା: ଅମୂଲ ଗୋଲ୍ଡ, ଅମୂଲ ତାଜା, ଅମୂଲ କାଉ ମିଲ୍କ, ଅମୂଲ ବଫେଲୋ ମିଲ୍କ ,ଅମୂଲ ଶକ୍ତି ଓ ସ୍ଲିମ୍ ଆଣ୍ଡ ଟ୍ରିମ୍। ସେହିପରି ମଦର ଡାଏରୀ ମଧ୍ୟ ତା’ର ଟୋକନ୍ କ୍ଷୀର ଏବଂ ପ୍ୟାକେଟ୍ କ୍ଷୀରର ସମସ୍ତ ଭାରିଆଣ୍ଟରେ ଲିଟର ପିଛା ୨ ଟଙ୍କା ବୃଦ୍ଧି କରିବାକୁ ନିଷ୍ପତ୍ତି ନେଇଛି ।

ଦର ବୃଦ୍ଧି ପଛରେ କମ୍ପାନୀ ପକ୍ଷରୁ କେତେକ ପ୍ରମୁଖ କାରଣ ଦର୍ଶାଯାଇଛି: ୧. ଉତ୍ପାଦନ ଖର୍ଚ୍ଚରେ ବୃଦ୍ଧି: ପଶୁ ଖାଦ୍ୟ ଅର୍ଥାତ୍ ଚୋକଡ଼ ଓ ଦାନାର ଦାମ୍ ବଢ଼ିବା ସହ ପରିବହନ ଖର୍ଚ୍ଚ ଏବଂ ପ୍ୟାକେଜିଂ ଫିଲ୍ମର ମୂଲ୍ୟ ବୃଦ୍ଧି ପାଇଛି । ୨. ଚାଷୀଙ୍କୁ ମୂଲ୍ୟ ପ୍ରଦାନ: ମଦର ଡାଏରୀ ଅନୁଯାୟୀ, ଗତ ଏକ ବର୍ଷ ମଧ୍ୟରେ ଚାଷୀଙ୍କ ଠାରୁ କ୍ଷୀର ସଂଗ୍ରହ ମୂଲ୍ୟ ପ୍ରାୟ ୬% ବୃଦ୍ଧି ପାଇଛି । ଚାଷୀଙ୍କ ସ୍ୱାର୍ଥ ରକ୍ଷା ପାଇଁ ଏହି ନିଷ୍ପତ୍ତି ନିଆଯାଇଛି । ୩. ଅପରେସନ୍ ଖର୍ଚ୍ଚ: କ୍ଷୀର ପ୍ରକ୍ରିୟାକରଣ ଏବଂ ଶୀତଳୀକରଣ ପାଇଁ ବ୍ୟବହୃତ ହେଉଥିବା ବିଦ୍ୟୁତ୍ ଓ ଇନ୍ଧନ ଖର୍ଚ୍ଚ ମଧ୍ୟ ବଢ଼ିଛି ।