Garvita Odia
ନୂଆଦିଲ୍ଲୀ : ସୋମବାର ଠାରୁ ସଂସଦର ମୌସୁମି ଅଧିବେଶନ ଆରମ୍ଭ ହେବାକୁ ଯାଉଛି। ଅଗଷ୍ଟ ୧୩ ପର୍ଯ୍ୟନ୍ତ ଚାଲିବାକୁ ଥିବା ଏହି ଅଧିବେଶନ କାଳରେ ସରକାର ଏକାଧିକ ବିଲ୍ ଆଗତ କରିବାକୁ ତାଲିକାଭୁକ୍ତ କରିଛନ୍ତି। ସେହିପରି ବିରୋଧୀ ଦଳଗୁଡ଼ିକ ମଧ୍ୟ ସରକାରଙ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କରିଛନ୍ତି। ଏହି ଅଧିବେଶନରେ ସରକାର ୭ଟି ଗୁରୁତ୍ୱପୂର୍ଣ୍ଣ ବିଲ୍ ଆଗତ କରିବାକୁ ଯୋଜନା କରିଛନ୍ତି। ଏଥିମଧ୍ୟରୁ ୫ଟି ନୂଆ ବିଲ୍ ଓ ୨ଟି ପୁରୁଣା ବିଲ୍। ସଂସଦରେ ଆଗତ ନିମନ୍ତେ ତାଲିକାଭୁକ୍ତ ବିଲ୍ ଗୁଡିକ ହେଲା ଆୟକର (ସଂଶୋଧନ) ବିଲ୍, ସୁପ୍ରିମକୋର୍ଟ (ବିଚାରପତିଙ୍କ ସଂଖ୍ୟା)
ସଂଶୋଧନ ବିଲ, ଜନ୍ମ ଓ ମୃତ୍ୟୁ ପଞ୍ଜୀକରଣ (ସଂଶୋଧନ) ବିଲ୍, ଜାତୀୟ ସମ୍ମାନର ଅପମାନ ପ୍ରତିରୋଧ (ସଂଶୋଧନ) ବିଲ୍, ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ (ଏମଏସ୍ଏମଇ) ବିକାଶ (ସଂଶୋଧନ) ବିଲ୍ ଓ ବୈଦେଶିକ ସହାୟତା (ନିୟନ୍ତ୍ରଣ) ସଂଶୋଧନ (ଏଫସିଆରଏ) ବିଲ୍। ବିକଶିତ ଭାରତ ଶିକ୍ଷା ଅଭିସ୍ଥାନ ବିଲ୍, ୨୦୨୫ ଯାହାକୁ ଯାଞ୍ଚ ପାଇଁ ଯୁଗ୍ମ ସଂସଦୀୟ କମିଟି ପାଖକୁ ପଠାଯାଇଥିଲା ତାକୁ ଏଥର ଆଗତ କରାଯିବ ନାହିଁ। ସଂସଦ ଅଧିବେଶନ ପୂର୍ବରୁ ରବିବାର ସରକାରଙ୍କ ପକ୍ଷରୁ ଏକ ସର୍ବଦଳୀୟ ବୈଠକ ଡକାଯାଇଥିଲା। ଅନ୍ୟପଟେ ବିରୋଧୀ ଦଳ ନିଟ୍ ପ୍ରଶ୍ନପତ୍ର ଲିକ୍, ବେକାରୀ, ମୁଦ୍ରାସ୍ଫୀତି ଓ ଅନ୍ୟାନ୍ୟ ଜାତୀୟ ପ୍ରସଙ୍ଗରେ ସରକାରଙ୍କୁ ଜବାବ ମାଗିବା ପାଇଁ ସୋମବାର ସକାଳେ ଏକ ମିଳିତ ବୈଠକ କରି ନିଜର ରଣନୀତି ସ୍ଥିର କରିବେ। ଏଣୁ ଏହି ଅଧିବେଶନ ବେଶ୍ ସରଗରମ ହେବାର ସମ୍ଭାବନା ରହିଛି।
