Garvita Odia
ଭୁବନେଶ୍ୱର: ରାଜ୍ୟରେ ଆହୁରି କଲବଲ କରିବ ତାତି । ଆଗାମୀ ୨ ଦିନ ମଧ୍ୟରେ ଦିନର ତାପମାତ୍ରା ୨ ରୁ ୩ ଡିଗ୍ରୀ ବଢିବାର ସମ୍ବାବନା ରହିଛି। ଆଜି ପଶ୍ଚିମ ଓ ଆଭ୍ୟନ୍ତର ଓଡ଼ିଶାର ବହୁ ଜିଲ୍ଲାକୁ ହିଟ୍ ୱେଭ୍ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର। ସେହି ଜିଲ୍ଲା ଗୁଡିକ ହେଉଛି ବଲାଙ୍ଗିର, ବରଗଡ଼, ଝାରସୁଗୁଡ଼ା, ସୁନ୍ଦରଗଡ଼, ଦେଓଗଡ଼, ଅନୁଗୁଳ, ବୌଦ୍ଧ, କନ୍ଧମାଳ, ସୋନପୁର ଓ ସମ୍ବଲପୁର। ଏଥିସହିତ ଆଗମୀ ୭ ଦିନ ପାଇଁ ଉପକୂଳବର୍ତ୍ତି ଜିଲ୍ଲା ଗୁଡିକରେ ଅସହ୍ୟ ଗୁଳୁଗୁଳି ଲାଗି ରହିବ ବୋଲି ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି।
ଗତକାଲି ରାଜ୍ୟରେ ୬ଟି ସହରରେ ତାପମାତ୍ରା ୪୦ ଡିଗ୍ରୀ ଉପରେ ରହିଥିଲା। ଟିଟିଲାଗଡ଼ରେ ସର୍ବାଧିକ ୪୨ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିଲା। ସକାଳ ୮ଟା ପରେ ରାସ୍ତାଘାଟ ଶୁନଶାନ୍ ହୋଇଯାଉଛି । କିଛି ଦିନ ତଳେ କାଳବୈଶାଖୀ ଯୋଗୁଁ ତାତି କମ୍ ଥିବା ବେଳେ ଏବେ କିନ୍ତୁ ଭୀଷଣ ପ୍ରକୋପ ଅନୁଭୂତ ହେଉଛି । ନିହା କାମ ନ ଥିଲେ ଘରୁ ବାହାରିବାକୁ ଡରୁଛନ୍ତି ଲୋକେ । ପ୍ରବଳ ଖରା ଓ ଗୁଳୁଗୁଳି ପାଇଁ ସତର୍କ ରହିବାକୁ ପରାମର୍ଶ ଦିଆଯାଇଛି । ଉପକୂଳରୁ ଉପାନ୍ତ ସବୁଠି ତାତି ଅସହ୍ୟ କରୁଥିବା ବେଳେ ରାଜ୍ୟର ବହୁ ଜିଲ୍ଲାବାସୀ ଅସହ୍ୟ ଗରମ ସହ ଗୁଳୁଗୁଳି ଯୋଗୁ ଅସ୍ତବ୍ୟସ୍ତ ହୋଇପଡ଼ୁଛନ୍ତି।
ତାତିରୁ ରକ୍ଷା ପାଇବା ପାଇଁ ଲୋକେ ଏବେ ଥଣ୍ଡା ପାନୀୟ ଦୋକାନ ସମେତ ତରଭୁଜ ତଥା ପଇଡ ପିଇବାକୁ ଖୁବ୍ ଭିଡ଼ ଜମାଉଛନ୍ତି । ହେଲେ ସରକାରଙ୍କ ପକ୍ଷରୁ ଏହାର ମୁକାବିଲା ପାଇଁ ସେଭଳି କୌଣସି ସ୍ଥାନରେ ଆଖି ଦୃଶିଆ ପଦକ୍ଷେପ ନିଆଯାଇନି। କିମ୍ବା ରାସ୍ତାକଡ଼ରେ ଜଳଛତ୍ର ବି ସେପରି କିଛି ଖୋଲାଯାଇନି। ଯାହାକୁ ନେଇ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ।
