ଏମ୍ସ ସମ୍ମୁଖରେ ଠିକା କର୍ମଚାରୀମାନଙ୍କ ଆନ୍ଦୋଳନ

ଭୁବନେଶ୍ଵର : ବିଭିନ୍ନ ସମସ୍ୟା ନେଇ ଭୁବନେଶ୍ଵର ଏମ୍ସ ଡାକ୍ତରଖାନାରେ କାର୍ୟ୍ୟରତ ଠିକା ଶ୍ରମିକ ମାନଙ୍କ ଅସନ୍ତୋଷ ଦେଖିବାକୁ ମିଳିଛି। ଠିକ ସମୟରେ ଦରମା ଦାବି କରି ଏମ୍ସ ମୁଖ୍ୟ ଫାଟକ ଆଗରେ ଶହ ଶହ ଠିକା କର୍ମଚାରୀମାନେ ଧାରଣାରେ ବସିଛନ୍ତି। ଫଳରେ ଆଜି ସକାଳୁ ରୋଗୀ ସେବା ଠପ ହୋଇଯାଇଛି।
ମିଳିଥିବା ସୂଚନା ଅନୁସାରେ ଏକ ଠିକା ସଂସ୍ଥା ଅଧିନରେ ଭୁବନେଶ୍ୱର ଏମ୍ସରେ ଶତାଧିକ କର୍ମଚାରୀ କାମ କରନ୍ତି। ପୂର୍ବରୁ ୭ ତାରିଖ ମଧ୍ୟରେ ଦରମା ମିଳୁଥିଲା। କିନ୍ତୁ ଗତ କିଛି ମାସ ହେବ ଆଉ ଠିକ ସମୟରେ ଦରମା ମିଳୁନାହିଁ। ତେଣୁ କାମ କରୁଥିବା ଠିକା କର୍ମଚାରୀମାନଙ୍କ ଚଳିବାରେ, ଘରଭଡା ଦେବାରେ ବହୁ ଅସୁବିଧା ସୃଷ୍ଟି ହେଉଥିବା ଅଭିଯୋଗ କରିଛନ୍ତି। ଏହି ସମସ୍ୟା ନେଇ ଗତ ଫେବୃଆରୀ ମାସରେ ଠିକା କର୍ମଚାରୀମାନେ ଏମ୍ସ ଆଗରେ ଆନ୍ଦୋଳନ କରିଥିଲେ। ଫଳରେ ଦୁଇ ତିନି ମାସ ଠିକ ଠାକ ଚାଲିଥିଲା। କିନ୍ତୁ ଏବେ ଯଥା ପୂର୍ବଂ ତଥା ପରଂ ନ୍ୟାୟରେ ପୂର୍ବ ଭଳି ଦରମା ଦେବାରେ ବିଳମ୍ବ କରୁଛନ୍ତି। ଆଉ ଦିନେ ଦୁଇ ଦିନ ପରେ ରଜ ପର୍ବ। ଆଜି ୧୨ ତାରିଖ ହେଲାଣି। କିନ୍ତୁ ଏଯାଏଁ ଦରମା ମିଳିନି। ବାହାରୁ ଆସି ଏଠାରେ ଘରଭଡା ନେଇ ଚଳିବା ବଡ କଷ୍ଟକର ହୋଇପଡୁଛି। ଦରମା ମିଳିନଥିବାରୁ ରଜ ପାଇଁ କିଛି କିଣାକିଣି ମଧ୍ୟ ହୋଇ ପାରି ନାହିଁ। ଦରମା ଉପରେ ନିର୍ଭର କରୁଥିବା ଠିକା କର୍ମଚାରୀମାନେ କେମିତି ଚଳିବେ ବୋଲି ଅଭିଯୋଗ କରିଛନ୍ତି। ତୁରନ୍ତ କତୃପକ୍ଷ ଏଦିଗରେ ଦୃଷ୍ଟି ଦେବାକୁ ଦାବି ହୋଇଛି। ଏପର୍ୟ୍ୟନ୍ତ କୌଣସି ବରିଷ୍ଠ ଅଧିକାରୀ ଆନ୍ଦୋଳନ ସ୍ଥଳକୁ ଆସି ନଥିବା ସୂଚନା ମିଳିଛି।