କ୍ୟାବିନେଟ: OSWAS 3.0କୁ ମଞ୍ଜୁରି

ଭୁବନେଶ୍ବର: ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ରାଜ୍ୟ କ୍ୟାବିନେଟ ୬ଟି ବିଭାଗର ୧୦ଟି ପ୍ରସ୍ତାବକୁ ଅନୁମୋଦନ ଦେଇଛନ୍ତି । ଓଡ଼ିଶା ରାଜ୍ୟ କାର୍ଯ୍ୟପ୍ରବାହ ସ୍ୱୟଂଚାଳନ ପ୍ରଣାଳୀ ବା OSWAS 3.0 ଲାଗୁ କରିବାକୁ ଆସିଥିବା ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି । ଏହା ରାଜ୍ୟ ସରକାରଙ୍କ ଡିଜିଟାଲ କାର୍ଯ୍ୟପ୍ରବାହ ପ୍ରଣାଳୀକୁ ଆହୁରି ଆଧୁନିକ ଓ ସୁଦୃଢ଼ କରିବ । ଲୋକସେବା ଭବନରୁ ବ୍ଲକସ୍ତର ପର୍ଯ୍ୟନ୍ତ ଏକୀକୃତ ଡିଜିଟାଲ୍ ପ୍ଲାଟଫର୍ମ ଭାବେ ଏହା କାର୍ଯ୍ୟ କରିବ । OSWAS 1.0 ୨୦୦୮ରେ ଏବଂ OSWAS 2.0 ୨୦୧୮ରେ ଆରମ୍ଭ ହୋଇଥିବାବେଳେ ୨୦୨୬ରୁ OSWAS 3.0 ଆଗକୁ ବଢ଼ିବ । ନୂଆ ପ୍ରଣାଳୀରେ ବୁଦ୍ଧିମାନ ଓ ସ୍ୱୟଂଚାଳିତ କାର୍ଯ୍ୟପ୍ରବାହ ସହ ଆଧୁନିକ ଓ ସୁରକ୍ଷିତ ଡିଜିଟାଲ୍ ପ୍ଲାଟଫର୍ମ ବିକଶିତ କରାଯିବ । ଟେଣ୍ଡର ପ୍ରକ୍ରିୟାରେ ପ୍ରାୟ ୧୨୨.୬୦ କୋଟି ଟଙ୍କା ବ୍ୟୟରେ ୫ ବର୍ଷ ପାଇଁ ପରିଚାଳନା ଓ ରକ୍ଷଣାବେକ୍ଷଣ ସମେତ M/s TCSକୁ କାର୍ଯ୍ୟାନ୍ୱୟନ ଦାୟିତ୍ୱ ଦିଆଯାଇଛି ।