Garvita Odia
ଭୁବନେଶ୍ୱର: “ନିଶାକୁ ନାଁ, ଯୁବ ପ୍ରଗତିକୁ ହଁ” – ଏହି ନାରା ସହ ରାଜ୍ୟରୁ ନିଶା କାରବାରକୁ ସମୂଳେ ବିନାଶ କରିବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଜନସାଧାରଣଙ୍କ ସହଯୋଗ ଲୋଡ଼ିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ‘ନିଶାମୁକ୍ତ ଯୁବା-ବିକଶିତ ଭାରତ ଅଭିଯାନ’ରେ ସାମିଲ ହୋଇ ମୁଖ୍ୟମନ୍ତ୍ରୀ ଏହାକୁ ଏକ ସରକାରୀ କାର୍ୟ୍ୟକ୍ରମ ନୁହେଁ, ବରଂ ଏକ ‘ଜନ ଆନ୍ଦୋଳନ’ ଭାବେ ଗଢ଼ି ତୋଳିବାକୁ ଆହ୍ୱାନ ଦେଇଛନ୍ତି ।
ମୁଖ୍ୟମନ୍ତ୍ରୀ କହିଛନ୍ତି, ବେଆଇନ ନିଶା କାରବାର ବିରୋଧରେ ରାଜ୍ୟ ସରକାର ‘ଜିରୋ ଟଲେରାନ୍ସ’ ନୀତି ଆପଣାଇଛନ୍ତି । ନିଜ ଅଞ୍ଚଳରେ ଚାଲିଥିବା କୌଣସି ବି ପ୍ରକାରର ନିଶା କାରବାର ବିଷୟରେ ପୋଲିସକୁ ଗୁପ୍ତ ସୂଚନା ଦେବାକୁ ସେ ଜନସାଧାରଣଙ୍କୁ ଅନୁରୋଧ କରିଛନ୍ତି । ବିଶେଷ କରି ସୂଚନାଦାତାଙ୍କ ପରିଚୟ ସମ୍ପୂର୍ଣ୍ଣ ଗୋପନ ରଖାଯିବ ଏବଂ ସେମାନଙ୍କ ତଥ୍ୟ ଆଧାରରେ ପୋଲିସ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରିବ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି ।
ଏହି ଅଭିଯାନ ଆଗାମୀ ୧୦୦ ସପ୍ତାହ ବା ପ୍ରାୟ ୨ ବର୍ଷ ପର୍ୟ୍ୟନ୍ତ ଜାରି ରହିବ। କେବଳ ଭାଷଣ ନୁହେଁ, ବରଂ ଯୁବପିଢ଼ିଙ୍କୁ ଶାରୀରିକ ଓ ମାନସିକ ସ୍ତରରେ ସୁସ୍ଥ ରଖିବା ପାଇଁ ଯୋଗ, ଫିଟନେସ୍ ଏବଂ ସାଂସ୍କୃତିକ କାର୍ୟ୍ୟକ୍ରମ ମାଧ୍ୟମରେ ସଚେତନତା ସୃଷ୍ଟି କରାଯିବ । ଜାତୀୟ ସ୍ତରର ଏହି କାର୍ୟ୍ୟକ୍ରମ ପରେ ଏବେ ରାଜ୍ୟ ଏବଂ ଜିଲ୍ଲା ସ୍ତରରେ ମଧ୍ୟ ବ୍ୟାପକ କାର୍ୟ୍ୟକ୍ରମ ହାତକୁ ନିଆଯିବ ।
ମୁଖ୍ୟମନ୍ତ୍ରୀଙ୍କ କହିବା ଅନୁଯାୟୀ, ଏକ ଶକ୍ତିଶାଳୀ ରାଷ୍ଟ୍ର ଗଠନ ପାଇଁ ଯୁବଶକ୍ତି ହେଉଛି ଆମର ସବୁଠାରୁ ବଡ଼ ସମ୍ବଳ। ଯୁବବର୍ଗଙ୍କୁ ନିଶା ଓ କୂଅଭ୍ୟାସରୁ ଦୂରରେ ରଖି ସେମାନଙ୍କ ଭବିଷ୍ୟତକୁ ସୁରକ୍ଷିତ କରିବା ସରକାରଙ୍କ ପ୍ରାଥମିକତା। ଆଜି ପ୍ରଧାନମନ୍ତ୍ରୀଙ୍କ ଆହ୍ୱାନରେ ସାରା ଦେଶର ୨୮ ହଜାରରୁ ଅଧିକ ସ୍ଥାନରେ ୨ କୋଟିରୁ ଅଧିକ ଯୁବକଯୁବତୀ ଏକତ୍ରିତ ହୋଇ ନିଶାମୁକ୍ତ ରହିବାକୁ ସଂକଳ୍ପ ନେଇଛନ୍ତି। ଓଡ଼ିଶାରେ ମଧ୍ୟ ଏହି ସଂକଳ୍ପକୁ ପାଳନ କରି ସମସ୍ତେ ସୁସ୍ଥ ସମାଜ ଗଠନରେ ସହଯୋଗ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି ।
