ନୋଏଡ଼ା ହିଂସାରେ ପାକିସ୍ତାନ ଲିଙ୍କ୍! ତଦନ୍ତ ଆରମ୍ଭ

ନୋଏଡ଼ା : ନୋଏଡ଼ା ହିଂସାରେ ପାକିସ୍ତାନ ଲିଙ୍କ୍! ଗତକାଲିର ନୋଏଡ଼ା ହିଂସାକୁ ନେଇ ଆସିଛି ଚାଞ୍ଚଲ୍ୟକର ତଥ୍ୟ। ହିଂସାକାଣ୍ଡ ପଛରେ ପାକିସ୍ତାନ ଲିଙ୍କ୍ ଥିବା ସନ୍ଦେହ କରୁଛି ପୋଲିସ୍। ଏନେଇ ତଦନ୍ତ ବି ଆରମ୍ଭ କରାଯାଇଛି। ଗତ କିଛି ଦିନ ଧରି ଦିଲ୍ଲୀ, ନୋଏଡ଼ା ସମେତ ଆଖପାଖ ଅଞ୍ଚଳରୁ ଆତଙ୍କବାଦୀ ସନ୍ଦିଗ୍ଧଙ୍କୁ ଗିରଫ କରାଯାଇଛି। ଏପରିକି ପାକିସ୍ତାନ ସହ ସମ୍ପର୍କ ଥିବା କିଛି ବ୍ୟକ୍ତିଙ୍କୁ ଧରିଛି।

ଏସବୁ ଗିରଫ ହେବା ପରେ ଶ୍ରମିକଙ୍କ ଆଢ଼ୁଆଳରେ ଗିରଫଦାରୀ ହେଇଥିବା ଚର୍ଚ୍ଚା ହେଉଛି। ଏନେଇ ପୋଲିସ୍ ତଦନ୍ତ ଆରମ୍ଭ କରିଛି। ସେପଟେ ଶ୍ରମିକଙ୍କ ଦରମା ବଢ଼ାଯାଇଛି। ତଥାପି ପୋଲିସ୍ ଉପରେ ଆଜି ପଥର ମାଡ଼ କରିଛନ୍ତି କିଛି ଲୋକେ। ଘଟଣାସ୍ଥଳରେ ଉତ୍ତେଜନାମୂଳକ ସ୍ଥିତି ଥିବାରୁ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି।

ସୂଚନାଯୋଗ୍ୟ, ନୋଏଡାର ଫେଜ୍-୨, ସେକ୍ଟର ୬୦, ସେକ୍ଟର ୬୨ ଏବଂ ସେକ୍ଟର ୮୪ ସମେତ ବିଭିନ୍ନ ସ୍ଥାନରେ ଦରମା ବୃଦ୍ଧି ଦାବିରେ କାରଖାନା କର୍ମଚାରୀଙ୍କ ବିରୋଧ ପ୍ରଦର୍ଶନ ହିଂସାରେ ପରିଣତ ହୋଇଥିଲା। ଏହି ଆନ୍ଦୋଲନରେ ପ୍ରାୟ ୪୫ ହଜାର ଶ୍ରମିକ ଏକାଠି ହୋଇଥିଲେ। ଏହି ସମୟରେ, ପୋଡ଼ାଜଳା ଏବଂ ଭଙ୍ଗାରୁଜା ଘଟଣାରେ ପୋଲିସ ଏପର୍ଯ୍ୟନ୍ତ ପ୍ରାୟ ୩୫୦ ଜଣଙ୍କୁ ଗିରଫ କରିଛି। ୧୦୦ ରୁ ଅଧିକ ଲୋକଙ୍କୁ ପଚରାଉଚରା ପାଇଁ ଅଟକ ରଖାଯାଇଛି। ହିଂସାକାଣ୍ଡରେ ସମ୍ପୃକ୍ତ ଲୋକଙ୍କୁ ଚିହ୍ନଟ କରିବା ପାଇଁ କର୍ତ୍ତୃପକ୍ଷ ବିଭିନ୍ନ କାରଖାନାର ସିସିଟିଭି ଫୁଟେଜ ସ୍କାନ କରୁଛନ୍ତି।