Garvita Odia
ଭୁବନେଶ୍ୱର: ମୋ ବସ୍ର ନାମ ପରିବର୍ତ୍ତନ ହେବ । ଏଣିକି ମୋ ଜାଗାରେ ଆମ ବସ୍ ଲେଖାଯିବ । ଖୁବ୍ଶୀଘ୍ର ଏନେଇ ପ୍ରକ୍ରିୟା ଆରମ୍ଭ ହେବ ବୋଲି ନଗର ଉନ୍ନୟନ ମନ୍ତ୍ରୀ ଡାକ୍ତର କୃଷ୍ଣଚନ୍ଦ୍ର ମହାପାତ୍ର ସୂଚନା ଦେଇଛନ୍ତି । ସେ ଆହୁରି କହିଛନ୍ତି ଯେ, ମୋ ଏକ ଅହଙ୍କାର ଶବ୍ଦ । ତେଣୁ ମୋ ବଦଳରେ ଆମ ଲେଖିଲେ ଏହା ଶୋଭାପାଇବ ।
ମନ୍ତ୍ରୀ ଗଣମାଧ୍ୟମକୁ କହିଛନ୍ତି , ମୋ ବସ୍ ନାମକରଣ ମୋତେ ବିଚଳିତ କରିଛି । ମୋ ପରିବର୍ତ୍ତେ ଆମର ଲେଖିବାକୁ ମୁଁ ଜରୁରି ମନେ କରୁଛି । ଏନେଇ ବିଭାଗକୁ ନିର୍ଦ୍ଦେଶ ଦିଆଯାଇଛି । ପର୍ୟ୍ୟାୟ କ୍ରମେ ଷ୍ଟିକର ବଦଳାଯିବ । ଏହା ସହ ଡିପୋରୁ ଆସୁଥିବା ନୂଆ ବସ୍ର ନାମକରଣ ଏକା ଥରେ ହୋଇଆସିବ । ବାରମ୍ବାର ଦୁର୍ଘଟଣାକୁ ନେଇ ମଧ୍ୟ ସେ ମତ ରଖିଛନ୍ତି । ସେ କହିଛନ୍ତି, ଅନେକ ସମୟରେ ମୋ ବସ୍ରେ ଅନ୍ୟ ଗାଡ଼ି ଦୁର୍ଘଟଣା ଘଟାଉଛି । ବଡ଼ ଗାଡି ହୋଇଥିବାରୁ ମୋ ବସ୍ ଦୋଷ ମୁଣ୍ଡାଉଛି । ତେଣୁ ବସ୍ର ଚାରିପାଖରେ କ୍ୟାମେରା ଲଗାଯିବାକୁ ବ୍ୟବସ୍ଥା କରାଯାଉଛି । ଏଭଳି ଦୁର୍ଘଟଣା ଜନିତ ସମସ୍ୟା ପାଇଁ ଏଡିଏଏସ୍ ଚିପ ଲାଗିବ ଯାହା ଦୁର୍ଘଟଣାକୁ ୬୦ରୁ ୭୦ ପ୍ରତିଶତ କମାଇଦେବ । ଏହି ସୁବିଧା ଦ୍ୱାରା ଗାଡ଼ିର ଆଗ ପଛ ଚାରିପାଶ୍ୱର୍ରେ ୩୬୦ ଡିଗ୍ରୀରେ କ୍ୟାମେରାରେ ସବୁ କିଛି ଦେଖି ହେବ ବା ଜଣାପଡ଼ିବ । ଦୁର୍ଘଟଣା ସମୟରେ ସ୍ୱୟଂଚାଳିତ ବ୍ରେକ ହୋଇ ବସ୍ ଆପେ ଅଟକିଯିବ । ଡ୍ରାଇଭର ସାମ୍ନାରେ ଏକ ସ୍କ୍ରିନରେ ଜଣାପଡ଼ିବ ଆଗରେ ପଛରେ କଣ ହେଉଛି । ଏପରିକି ଦୁଇ ଗାଡି ମଧ୍ୟରେ ଦୂରତା ଓ କୌଣସି ଦୁର୍ଘଟଣା ଜନିତ ସମସ୍ୟା ଥିଲେ ସ୍ୱୟଂଚାଳିତ ଭାବେ ଗାଡ଼ିଟି ଦୁର୍ଘଟଣାରୁ ବର୍ତ୍ତିପାରିବ ।
