Garvita Odia
ଭୁବନେଶ୍ଵର : ପିଏମ୍ କିଷାନ ସମ୍ମାନ ନିଧି ଯୋଜନାରେ ୨୪ତମ କିସ୍ତି ବଣ୍ଟନ । ଗୁଜରାଟର ବନାସକାଣ୍ଠାରୁ ପିଏମ୍-କିଷାନ ଟଙ୍କା ଛାଡ଼ିଲେ ପ୍ରଧାନମନ୍ତ୍ରୀ ମୋଦି । ଦେଶର ୯.୩୪ କୋଟି ଚାଷୀଙ୍କ ଆକାଉଣ୍ଟକୁ ଗଲା ୧୮,୬୯୦ କୋଟି ଟଙ୍କା । ଓଡ଼ିଶାର ୩୫.୩୯ ଲକ୍ଷ ଚାଷୀଙ୍କ ବ୍ୟାଙ୍କ ଖାତାକୁ ଆସିଲା ୭୦୭.୮୬ କୋଟି ଟଙ୍କା । ଡିବିଟି ଜରିଆରେ ଯୋଗ୍ୟ କୃଷକଙ୍କୁ ସହାୟତା ପ୍ରଦାନ । ପୂର୍ବରୁ ୨୩ଟି କିସ୍ତି ମାଧ୍ୟମରେ ଦିଆଯାଇଛି ୪.୪୭ ଲକ୍ଷ କୋଟିରୁ ଅଧିକ ଟଙ୍କା । ଭୁବନେଶ୍ବର ଓୟୁଏଟି କୃଷି ଶିକ୍ଷା ସଦନଠାରେ ଆୟୋଜିତ ରାଜ୍ୟସ୍ତରୀୟ କାର୍ଯ୍ୟକ୍ରମରେ ଯୋଗଦେଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ।
ଏହି ଅବସରରେ ଅଭିଭାଷଣ ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ, ଆଜି ରାଜ୍ୟର ୩୫ ଲକ୍ଷ ଚାଷୀଙ୍କୁ ଡିବିଟି ମାଧ୍ୟମରେ ପିଏମ୍ କିଷାନ ଯୋଜନାରେ ୨୦୦୦ ହାଜର ଟଙ୍କା ଲେଖାଏଁ ମିଳିଛି । ଏଥିରେ ଭୂମିଦାରୀ, କ୍ଷୁଦ୍ର, ବୃହତ ଓ ସହରାଞ୍ଚଳର ଦୁର୍ବଳ ବର୍ଗର ଚାଷୀଙ୍କୁ ସାମିଲ କରାଯାଇଛି । ପିଏମ୍ କିଷାନ ଯୋଜନାରେ ସାମିଲ ହେବା ପାଇଁ ଏଗ୍ରିଷ୍ଟାକ ପୋର୍ଟାଲରେ ପଞ୍ଜିକରଣ ବାଧ୍ୟତାମୂଳକ । ଯେଉଁମାନେ ସିଏମ୍ କିଷାନ ପାଉଛନ୍ତି ସେମାନେ ପିଏମ୍ କିଷାନ ମଧ୍ୟ ପାଆନ୍ତୁ । ତେଣୁ ସେମାନେ ଆବଶ୍ୟକ ଦସ୍ତାବିଜ ଦେଇ ଏହାର ଲାଭ ଉଠାନ୍ତୁ । ସିଏମ କିଷାନରେ ପାଖାପାଖି ପାଞ୍ଚ ଲକ୍ଷ ଅଧିକ ଚାଷୀ ଅଛନ୍ତି । ରାଜ୍ୟ ସରକାର କୃଷି ମନ୍ତ୍ରଣାଳୟ ସହାୟତାରେ ଏକିକୃତ ପଞ୍ଜିକରଣ ବ୍ୟବସ୍ଥା କରିଛନ୍ତି । ସମସ୍ତ ତଥ୍ୟ ସରକାରଙ୍କ ପାଖରେ ରହିବ । ପଞ୍ଚାୟତରେ ଥିବା ଆରଆଇ ଅଫିସ କିମ୍ବା କୃଷି କାର୍ଯ୍ୟାଳୟରେ ପଞ୍ଜିକରଣ କରିପାରିବେ । କୃଷକ କେବଳ ଚାଷୀ ନୁହନ୍ତି, ସେମାନେ ଆମ ପାଇଁ ଅନ୍ନଦାତା । ଅନ୍ନଦାତାଙ୍କ ପାଇଁ ରାଜ୍ୟ ସରକାର ବିଭିନ୍ନ ଯୋଜନା କରୁଛନ୍ତି । ପିଏମ୍ କିଷାନରେ ଛଅ ହଜାର ମିଳୁ ଥିବା ବେଳେ ଆମ ରାଜ୍ୟରେ ସିଏମ କିଷାନରେ ଦୁଇ ହଜାର ଦୁଇ ଥର କରି ଛଅ ହଜାର ଦିଆ ଯାଉଛି । ଅନ୍ୟ ସମସ୍ତ ରାଜ୍ୟରେ ସିଏମ କିଷାନ ଯୋଜନା ନାହିଁ । ଦୁର୍ବଳ ଜନଜାତିଙ୍କୁ ଖୋଜି ଖୋଜି ବାର ହଜାର ଟଙ୍କା ଦିଆ ଯାଉଛି । ସମସ୍ତ ଚାଷୀ ଭାଇଙ୍କୁ ପ୍ରଧାନମନ୍ତ୍ରୀ ଅନ୍ନଦାତା ଭାବରେ ଅଭିହିତ କରିଛନ୍ତି ।
ପିଏମ୍ ଓ ସିଏମ୍ କୃଷି ଯୋଜନାରେ ଆମ ଚାଷୀମାନେ ୧୦ ହଜାର ଟଙ୍କା ପାଉଛନ୍ତି । ଯାହାକି ସବୁ ରାଜ୍ୟର ଚାଷୀ ପାଉନାହାନ୍ତି । କୃଷି କ୍ଷେତ୍ରରେ ଆର୍ଥିକ କ୍ଷେତ୍ରରେ ଦୁର୍ବଳ ଥିବା ଚାଷୀଙ୍କୁ ଆମେ ଖୋଜି ଖୋଜି ଏଥିରେ ସାମିଲ କରୁଛୁ । ଚଳିତ ବର୍ଷ ୨୨ ଲକ୍ଷରୁ ଅଧିକ ଚାଷୀ ଧାନ ବିକ୍ରି ପାଇଁ ପଞ୍ଜିକରଣ କରିଛନ୍ତି । ଯାହାକି ଗତ ବର୍ଷ ଅପେକ୍ଷା ଢେର ଅଧିକ । ଚାଷ ଅଛି ଯାହାର କେଡେ ଆନନ୍ଦ ତାହାର । ଆମ ସରକାର ସମୟରେ ଏହା ସତ ହେଉଛି । ପୂର୍ବରୁ କେବଳ ଲୋକ ଜୀବନ ବଞ୍ଚାଇବା ପାଇଁ ଚାଷ କରୁଥିଲେ । ପୂର୍ବ ସରକାର ସମୟରେ ଚାଷୀଙ୍କ ଆୟ ମାତ୍ର ୫ ହଜାର ଟଙ୍କା ରହିଥିଲା । ଯାହା କି ବର୍ତ୍ତମାନ ବଢିଛି । ୬ ଲକ୍ଷ ୮୭ କ୍ବିଣ୍ଟାଲ ମାଣ୍ଡିଆ ଗତ ବର୍ଷ ସଂଗ୍ରହ କରାଯାଇଛି ।
ଏହି ଅବସରରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ କହିଛନ୍ତି ଯେ, ଯେଉଁ ଚାଷୀ ପଞ୍ଜିକରଣ କରିନାହାନ୍ତି, ଶୀଘ୍ର କରି ଦିଅନ୍ତୁ । ମୟୁରଭଞ୍ଜ ଓ ବଲାଙ୍ଗୀରରେ କୃଷି ମହାବିଦ୍ୟାଳୟ ହେବ । ଚିପିଲିମାରେ ପ୍ରାଣୀ ଚିକିତ୍ସା ମହାବିଦ୍ୟାଳୟ ହେବ। ମୁଖ୍ୟମନ୍ତ୍ରୀ ଏହାକୁ ମଞ୍ଜୁର କରିଛନ୍ତି । ବାତ୍ୟା ଅର୍ଣ୍ଣବରେ ଅନେକ ସ୍ଥାନରେ ଚାଷୀଙ୍କ ଚାଷ ନଷ୍ଟ ହୋଇଛି। ଚାଷୀଙ୍କ ଯାହା ବି କ୍ଷୟକ୍ଷତି ହେବ । ଆମ ସରକାର ଆପଣଙ୍କ ସହ ଛିଡା ହେବ ।
