ବିଜେପିର ଅପରେସନ ଲୋଟସ୍‌: ଛାନିଆ ବିଜେଡି!

ଭୁବନେଶ୍ୱର : ବିରି ମାଡ଼ ଦେଖି କୋଳଥ ଚେପା । ଆମ୍‌ ଆଦମୀ ପାର୍ଟି (ଆପ୍‌)ରେ ଯାହା ଘଟିଲା, ସେଥିରେ ବିରୋଧୀ ଦଳ ଶିବିର ଛାନିଆ । ଚର୍ଚ୍ଚିତ ରାଘବ ଚଢ଼ାଙ୍କ ସମେତ ୭ଜଣ ସାଂସଦ ଆପ୍‌ ଝାଡ଼ୁ ଫିଙ୍ଗି ପଦ୍ମ ପୋଖରୀକୁ ଡିଆଁ ମାରିଛନ୍ତି । କାଲିଠାରୁ ବିଜେପିର ଅପରେସନ ଲୋଟସ୍‌କୁ ନେଇ ବିଭିନ୍ନ ଆଞ୍ଚଳିକ ଦଳ ଓ ଛୋଟ ଦଳରେ ଡର ପଶିଛି । ବିଜେଡିକୁ ବି ଏହି ଛାନିଆ ଗୋଡ଼ାଇଲାଣି । ରାଜ୍ୟସଭା ନିର୍ବାଚନରେ ଦଳ ଯେଉଁ ଝଟ୍‌କା ଖାଇଛି, ସେଥିରେ ଦଳର ଘଳିଆ ପଦାକୁ ଆସିଥିଲା । କେତେବେଳେ ଘାଇ ହୋଇଯିବ, ସେଇ ଆଶଙ୍କାରେ ବିଜେଡି ନେତୃତ୍ୱ ଚିନ୍ତାରେ ।
ରାଜ୍ୟରେ ସରକାର ବଦଳିବା ପରଠାରୁ ବିଜେଡିକୁ ବିଜେପି ବାରମ୍ବାର ଝଟ୍‌କା ଦେଇ ଚାଲିଛି । ନୂଆପଡ଼ା ଉପନିର୍ବାଚନ ସମୟରେ ବିଜେଡିର ସମ୍ଭାବ୍ୟ ପ୍ରାର୍ଥୀ ଜୟ ଢୋଲକିଆଙ୍କୁ ବିଜେପି ନିଜ ଶିବିରକୁ ନେଇଗଲା । ଜୟ ବିଜେପିକୁ ଗଲେ, ନୂଆପଡ଼ା ବିଜେଡି ହାତରୁ ପଳାଇଲା । ଖାଲି ସେତିକି ନୁହେଁ, ସରକାର ବଦଳିବା ପରଠାରୁ ପ୍ରାୟ ୧୫ରୁ ଅଧିକ ବ୍ଲକରେ ବିଜେଡିର କବ୍‌ଜା ଖସିଗଲାଣି । ବହୁ ବ୍ଲକ ଅଧ୍ୟକ୍ଷ, ଉପାଧ୍ୟକ୍ଷ, ସମିତିସଭ୍ୟ, ସରପଞ୍ଚ ଏବଂ ବିଭିନ୍ନ ପୌର ସଂସ୍ଥାର କାଉନସିଲର ବିଜେଡି ଛାଡ଼ି ପଦ୍ମ ଧରି ସାରିଲେଣି । ନିକଟରେ କେନ୍ଦୁଝର ମ୍ୟୁନିସିପାଲିଟିରେ ବଡ଼ ଝଟ୍‌କା ଖାଇଥିଲା ବିଜେଡି । ସବୁଠାରୁ ବଡ଼ ଝଟକା ଏବେ ଯାଇଥିବା ରାଜ୍ୟସଭା ନିର୍ବାଚନ ସମୟରେ ବିଜେଡି ପାଇଥିଲା । ନିଲମ୍ବିତ ୨ ବିଧାୟକଙ୍କ ସମେତ ବିଜେଡିର ୮ ବିଧାୟକ ଦଳ ନିଷ୍ପତ୍ତି ବିରୋଧରେ ଯାଇ କ୍ରସ ଭୋଟିଂ କଲେ । ସଭିଙ୍କୁ ବିଜେଡି ନିଲମ୍ବିତ କରିଛି । ଏସବୁ ନିଲମ୍ବିତ ବିଧାୟକ ଏବେ ବିଜେପିର ନିକଟତର ଥିବା କୁହାଯାଉଛି । ସମସ୍ତେ ଶାସକ ଦଳର ଶୁଭଦୃଷ୍ଟିରେ ଅଛନ୍ତି । ପୂର୍ବରୁ ଦଳର ୨ଜଣ ରାଜ୍ୟସଭା ସାଂସଦ ସୁଜିତ କୁମାର ଓ ମମତା ମହାନ୍ତ ଦଳ ଓ ପଦ ଛାଡ଼ି ବିଜେପିରେ ମିଶିଥିଲେ । ଲୋକସଭାରେ ଜଣେ ବି ସଭ୍ୟ ନଥିବା ବିଜେଡିର ରାଜ୍ୟସଭା ସଂଖ୍ୟା ଇତିମଧ୍ୟରେ ୯ରୁ ୬କୁ ଖସି ଆସିଲାଣି । ଆପ୍‌ ଅବସ୍ଥା ଦେଖି ବିଜେଡି ଶିବିରକୁ ଟେନସନ-ଆଗକୁ ଶଙ୍ଖ ଦଳରେ କିଛି ହେବ କି?

ନିକଟରେ ବିଜେଡି ରାଜ୍ୟସଭାରେ ନେତା ବଦଳାଇଛି । ସସ୍ମିତ ପାତ୍ରଙ୍କ ସ୍ଥାନରେ ମାନସ ମଙ୍ଗରାଜ ଏବେ ସଂସଦୀୟ ଦଳର ନେତୃତ୍ୱ ସମ୍ଭାଳିଛନ୍ତି । ଦଳର ୬ଜଣ ସାଂସଦଙ୍କ ଭିତରୁ ୩ଜଣଙ୍କ କାର୍ୟ୍ୟକାଳ ଆଉ ୨ ବର୍ଷ ଅଛି । ଦୁଇ ଜଣ ସାଂସଦଙ୍କ କାର୍ୟ୍ୟକାଳ ୪ ବର୍ଷ ବାକି ଥିବାବେଳେ ଜଣଙ୍କର ୨୦୩୨ ପର୍ୟ୍ୟନ୍ତ ରହିଛି । ଦଳ ଭିତରେ ଚର୍ଚ୍ଚା ଆପ୍‌ ଭଳି ବିଜେଡିର ରାଜ୍ୟସଭା ସାଂସଦଙ୍କୁ ନେବାକୁ ବିଜେପି କିଛି ବଡ଼ ଯୋଜନା କରୁଛି କି? ଯଦି ଏମିତି ହୁଏ, କିଏ ହେବ ବିଜେଡିର ରାଘବ ଚଢ଼ା? ଅନ୍ୟପଟେ ବିଧାୟକଙ୍କୁ ନେଇ ଦଳରେ ଅନେକ ଟେନସନ । ଏବେ ଯାଏଁ କେବଳ ୮ ବିଧାୟକ ଦଳ ବିରୋଧରେ ଥିବା ନେତୃତ୍ୱ ଚିହ୍ନଟ କରିଛନ୍ତି, କିନ୍ତୁ ପ୍ରକୃତ ସଂଖ୍ୟା ଏହାଠାରୁ ଢେର ଅଧିକ ହେବ ବୋଲି କୁହାଯାଉଛି । କେବଳ ସଭ୍ୟ ପଦ ଚାଲିଯିବା ଭୟରେ ଚୁପ୍‌ ବସିଛନ୍ତି । ସୁଯୋଗ ମିଳିଲେ ଅନେକ ବିଦ୍ରୋହୀ ବାହାରିପାରନ୍ତି ।

ଅନ୍ୟପକ୍ଷରେ ବିଜୁ ଲିଗାସି କଥା ଉଠାଇ କିଛି ପୁରୁଖା ନେତା ବିଜେଡିରେ ବିଦ୍ରୋହ ସୃଷ୍ଟି କରିବା ଯୋଜନାରେ ଥିବା ଦଳର ବହୁ ବରିଷ୍ଠ ନେତା ଆଶଙ୍କା କରୁଛନ୍ତି । ଆପ୍‌ ପ୍ରସଙ୍ଗରେ ଗଣମାଧ୍ୟମକୁ ବିଜେଡି ବିଧାୟକ ଅରୁଣ କୁମାର ସାହୁ କହିଛନ୍ତି, କୌଣସି ଦଳକୁ କ୍ଷମତା ଓ ଅର୍ଥ ବଳରେ ଭଙ୍ଗା ଯାଇଥାଏ । ଦଳରୁ ନେତା ଛାଡ଼ିଲେ ଆଂଶିକ ପ୍ରଭାବ ରହିଥାଏ । ତେବେ ବିଜେଡି ଛାଡ଼ି ବିଜେପିରେ ମିଶିଥିବା ନେତାଙ୍କୁ ପଚାରିଲେ, ଜାଣିବେ ସେମାନେ କେମିତି ଦହଗଞ୍ଜ ହେଉଛନ୍ତି । ପ୍ରଫୁଲ୍ଲ ସାମଲ କହିଛନ୍ତି, ଦଳ ବଦଳାଇଲେ ଲୋକଙ୍କର ଆସ୍ଥା ରହେନି । ଯିଏ ବିଜେଡି ଛାଡ଼ି ଯାଉଛନ୍ତି, ସେମାନଙ୍କ ସହ କର୍ମୀ ଯିବେ ନାହିଁ । ସମ୍ବିତ ରାଉତରାୟ କହିଛନ୍ତି, ନବୀନ ବାବୁଙ୍କ ନେତୃତ୍ୱ ପାଇଁ ସମସ୍ତେ ବିଜେଡିରେ ଅଛନ୍ତି । ତେଣୁ ଆପ୍‌ ଭଳି ବିଜେଡିକୁ ଭାଗ କରିବା କଷ୍ଟକର ହେବ । ତେବେ ଦଳ ପରିଚାଳନା ଦାୟିତ୍ୱ ନେଇଥିବା ନେତାମାନେ ଠିକ୍‌ ଭାବେ କାମ କରିଥିଲେ ବିଧାନସଭାରେ ସଂଖ୍ୟା ୫୧ରୁ ୪୨କୁ ଖସି ନଥାଆନ୍ତା । ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଗଣମାଧ୍ୟମକୁ କହିଛନ୍ତି, ବିଜେପି ଅନ୍ୟ ଦଳକୁ ଭାଙ୍ଗିବା ପାଇଁ କେବେ ଷଡ଼ଯନ୍ତ୍ର କରେ ନାହିଁ । ମୋଦିଜୀଙ୍କ ନେତୃତ୍ୱ, ନୀତି, ଆଦର୍ଶରେ ଅନୁପ୍ରାଣିତ ହୋଇ ବିଭିନ୍ନ ଦଳରୁ ନେତାମାନେ ସ୍ୱତଃ ଭାବେ ବିଜେପିରେ ସାମିଲ ହେଉଛନ୍ତି ।