Garvita Odia
ନୂଆଦିଲ୍ଲୀ : ଆପର ୭ ସାଂସଦ ବିଜେପିରେ ସାମିଲ ହେବା ପରେ ରାଜ୍ୟସଭାରେ ଏନଡିଏ ମ୍ୟାଜିକ ଅଙ୍କ ଅତିକ୍ରମ କରିଛି । ଏନଡିଏ ବର୍ତ୍ତମାନ ସଂଖ୍ୟାଗରିଷ୍ଠତା ହାସଲ କରିବାରେ ସକ୍ଷମ ହୋଇଛି । ରାଜ୍ୟସଭାରେ ଆପର ୧୦ ସାଂସଦ ଅଛନ୍ତି । ୭ ଜଣ ଅର୍ଥାତ ଦୁଇ-ତୃତୀୟାଂଶ ଦଳ ଛାଡି ବିଜେପିରେ ସାମିଲ ହୋଇଥିବାରୁ ସେମାନଙ୍କ ବିରୋଧରେ ଦଳବଦଳ ନିରୋଧ ଆଇନ ଲାଗୁ ହୋଇପାରିବ ନାହିଁ । ଫଳରେ ରାଜ୍ୟସଭାରେ ଶାସକ ଏନଡିଏ ଗତ ଏକ ଦଶନ୍ଧିରୁ ଅଧିକ ସମୟ ଧରି ଯେଉଁ ସଂଖ୍ୟାର ଆଶା କରିଆସୁଥିଲା ତାହା ଏବେ ହାସଲ କରିପାରିଛି । ଆପର ୭ ଜଣ ସାଂସଦ (ରାଘବ ଚଢ଼ା, ସନ୍ଦୀପ ପାଠକ, ସ୍ୱାତୀ ମାଲିୱାଲ, ହରଭଜନ ସିଂହ, ଅଶୋକ ମିତ୍ତଲ, ବିକ୍ରମ ସାହନି ଓ ରାଜେନ୍ଦ୍ର ଗୁପ୍ତା) ବିଜେପିରେ ସାମିଲ ହେବା ପୂର୍ବରୁ ରାଜ୍ୟସଭାରେ ବିଜେପିର ସଂଖ୍ୟା ଥିଲା ୧୦୬ । ଏଥିରେ ଅନ୍ୟ ସହଯୋଗୀ ଦଳମାନଙ୍କର ୧୫ ସଦସ୍ୟ ମିଶିବା ପରେ ଏନଡିଏର ସଂଖ୍ୟା ୧୨୧ ଥିଲା । ଆପର ୭ ସାଂସଦ ବିଜେପିରେ ମିଶିବା ପରେ ଏହାର ସଦସ୍ୟ ସଂଖ୍ୟା ୧୧୩କୁ ବୃଦ୍ଧି ପାଇଥିଲା ବେଳେ ଏନଡିଏର ସଂଖ୍ୟା ୧୨୮ରେ ପହଞ୍ଚିଛି ।
୨୪୩ ଆସନ ବିଶିଷ୍ଟ ରାଜ୍ୟସଭାରେ ମ୍ୟାଜିକ ସଂଖ୍ୟା ହେଉଛି ୧୨୨ । ତେଣୁ ୧୨୮ ସଦସ୍ୟ ସହ ଏନଡିଏ ସଂଖ୍ୟାଗରିଷ୍ଠତା ଅତିକ୍ରମ କରିଛି । ଏହା ଏକ ଐତିହାସିକ ଘଟଣା । ଏଣିକି ରାଜ୍ୟସଭାରେ ସାଧାରଣ ବିଧେୟକ ଗୃହୀତ କରାଇବା ଲାଗି ବିଜେପି କିମ୍ବା ଏନଡିଏକୁ ଆଉ ଛୋଟ ଦଳମାନଙ୍କ ସହାୟତା ନେବାକୁ ପଡିବ ନାହିଁ । ରାଜ୍ୟସଭାରେ ସାଧାରଣ ସଂଖ୍ୟାଗରିଷ୍ଠତା ହାସଲ କରିଥିବା ବିଜେପି କିମ୍ବା ଏନଡିଏ ପାଇଁ ବର୍ତ୍ତମାନ ସାଧାରଣ ବିଲ୍ ପାସ୍ କରାଇବାରେ ଆଉ କୌଣସି ପ୍ରତିବନ୍ଧକ ରହିବ ନାହିଁ । କିନ୍ତୁ ସମ୍ବିଧାନ ସଂଶୋଧନ ପାଇଁ ରାଜ୍ୟସଭାରେ ଏନଡିଏକୁ ଦୁଇ ତୃତୀୟାଂଶ ଅର୍ଥାତ ୧୬୪ ସଦସ୍ୟଙ୍କ ସମର୍ଥନ ଦରକାର । ସେହି ଦୃଷ୍ଟିରୁ ଦେଖିଲେ ଏହି ସଂଖ୍ୟା ପାଇବା ଲାଗି ଏନଡିଏ ନିକଟରେ ଆହୁରି ୩୬ ସଦସ୍ୟ ଦରକାର । ତେଣୁ ଏକ ଦେଶ-ଏକ ନିର୍ବାଚନ ଏବଂ ସୀମା ପୁନଃନିର୍ଦ୍ଧାରଣ ଭଳି ସମ୍ବିଧାନ ସଂଶୋଧନ ବିଧେୟକ ଗୃହୀତ କରାଇବାକୁ ହେଲେ ବିଜେପିକୁ ଅନ୍ୟ ଦଳମାନଙ୍କ ଉପରେ ନିର୍ଭର କରିବାକୁ ପଡିବ । ନଚେତ ଆଗକୁ ହେବାକୁ ଥିବା ରାଜ୍ୟସଭା ନିର୍ବାଚନ ଫଳ ଉପରେ ବିଜେପିକୁ ଅପେକ୍ଷା କରିବାକୁ ହେବ ।
ଅନ୍ୟପକ୍ଷରେ ଆପର ସଦସ୍ୟ ସଂଖ୍ୟା ୩କୁ ଖସି ଆସିଥିଲା ବେଳେ ବିରୋଧୀଙ୍କ ଶକ୍ତି ଦୁର୍ବଳ ହୋଇପଡିଛି । ଫଳରେ ସେମାନେ କୌଣସି ବିଲ୍କୁ ରୋକିବା କିମ୍ବା ସିଲେକ୍ଟ କମିଟିକୁ ପଠାଇବା ଲାଗି ଯେଭଳି ଅଡି ବସୁଥିଲେ କିମ୍ବା ଭୋଟ୍ ଡିଭିଜନ ଦାବି କରୁଥିଲେ ତାହା ସମ୍ଭବ ହୋଇପାରିନାହିଁ ।
