ବ୍ରାହ୍ମଣୀ ନଦୀରେ ଦ୍ୱିତୀୟ ସେତୁ ନିର୍ମାଣ ପାଇଁ କ୍ଷେତ୍ର ପରିଦର୍ଶନ

ଦେବଗଡ଼: ବ୍ରାହ୍ମଣୀ ନଦୀରେ ଦ୍ୱିତୀୟ ସେତୁ ନିର୍ମାଣ ନେଇ ରାସ୍ତା ଓ ଗୃହ ନିର୍ମାଣ ବିଭାଗ ଦେବଗଡ଼ ଡିଭିଜନ ପକ୍ଷରୁ କ୍ଷେତ୍ର ପରିଦର୍ଶନ କରାଯାଇଛି। ଉକ୍ତ ପୋଲ ନିର୍ମାଣ ହେଲେ ଦେବଗଡ଼ ଜିଲ୍ଲା ବାରକୋଟ ବ୍ଲକ ରାଇତାବାହାଳ ପଞ୍ଚାୟତ ଠାରୁ ତିଲେଇବଣୀ ବ୍ଲକ ବଡ଼ଛାପଲ ପଞ୍ଚାୟତ କୁ ପୋଲ ସଂଯୋଗ କରିବ।ଦେବଗଡ଼ ବିଧାୟକ ରୋମାଞ୍ଚ ରଞ୍ଜନ ବିଶ୍ୱାଳ , ଦେବଗଡ଼ ଡିଭିଜନର ଏସ ଇ ଅଭିଷେକ ଓଝା ଓ ଏସଡିଓ ରାଜେନ୍ଦ୍ର ସୋରେନ ଉପସ୍ଥିତ ରହି ପ୍ରସ୍ତାବିତ ପୋଲ ଓ ସଂଯୋଗ ରାସ୍ତାର ବୁଲି ଦେଖିବା ସହ ଆଲୋଚନା କରିଥିଲେ ।ଏହି ପୋଲ ନିର୍ମାଣ ହେଲେ ଅଞ୍ଚଳବାସୀଙ୍କ ପାଇଁ ଯାତାୟାତ ବ୍ୟବସ୍ଥା ଅଧିକ ସୁଗମ ହେବା ସହିତ ରାଇତାବାହାଳ ପଞ୍ଚାୟତରୁ ରିଆମାଳ, ଦେବଗଡ଼ ଓ ତିଲେଇବଣି ଅଞ୍ଚଳକୁ ଅଳ୍ପ ଦୂରତାରେ ସଂଯୋଗ ସ୍ଥାପିତ ହେବ ବୋଲି ବିଧାୟକ ଶ୍ରୀ ବିଶ୍ୱାଳ ପ୍ରକାଶ କରିଛନ୍ତି। ଏହା ଦ୍ୱାରା ସାଧାରଣ ଲୋକଙ୍କ ସମୟ ସଞ୍ଚୟ ହେବା ସହ ଜରୁରୀକାଳୀନ ସେବା, ଶିକ୍ଷା, ସ୍ୱାସ୍ଥ୍ୟ ଓ ବ୍ୟବସାୟ କ୍ଷେତ୍ରରେ ମଧ୍ୟ ବଡ଼ ସୁବିଧା ମିଳିବ। ଏଠାରେ ସୂଚନାଯୋଗ୍ୟ ଯେ , ଉକ୍ତ ସେତୁ ନିର୍ମାଣ ନେଇ ବିଧାୟକ ଶ୍ରୀ ବିଶ୍ୱାଳ ପୂର୍ବରୁ ବିଧାନସଭା ରେ ଉପସ୍ଥାପନ କରି ସରକାର ଙ୍କ ନିକଟରେ ପ୍ରସ୍ତାବ ରଖିଥିଲେ ।ଏନେଇ ବିଭାଗୀୟ ମନ୍ତ୍ରୀ ଏଥିପ୍ରତି ଦୃଷ୍ଟି ଦିଆଯିବା ନେଇ ପ୍ରତିଶ୍ରୁତି ଦେବା ସହ ଫିଜିବିଲିଟି ରିପୋର୍ଟ ବିଭାଗ ପକ୍ଷରୁ ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ଦେଇଥିଲେ ।