ଅଙ୍ଗନୱାଡି କେନ୍ଦ୍ରରେ ରୋଷେୟା ନିଯୁକ୍ତିରେ ଅନିୟମିତତା ଅଭିଯୋଗ

ଦେବଗଡ଼:ବାରକୋଟ ବ୍ଲକର ଦମିତା ଗ୍ରାମର ଅଙ୍ଗନୱାଡି କେନ୍ଦ୍ରରେ ରୋଷେୟା ନିଯୁକ୍ତିରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ଏନେଇ ଆଜି ଗ୍ରାମବାସୀମାନେ ବାରକୋଟ ବ୍ଲକ କାର୍ଯ୍ୟାଳୟ ଘେରାଉ କରିବା ସହ ବିଡିଓଙ୍କୁ ଦାବି ପତ୍ର ପ୍ରଦାନ କରିବା ସହ ଘଟଣାର ତଦନ୍ତ କରିବା ପାଇଁ ଦାବି କରିଛନ୍ତି। ଏହାସହିତ ଏହାର ଏକିକତା ନକଲ ଜିଲ୍ଲାପାଳ, ବାରକୋଟ ବ୍ଲକ ସିଡିପିଓଙ୍କୁ ମଧ୍ୟ ଦେଇଛନ୍ତି। ସୂଚନା ଅନୁଯାୟୀ, ବାରକୋଟ ବ୍ଲକର ଦମିତା ଗ୍ରାମରେ ଥିବା ଅଙ୍ଗନୱାଡି କେନ୍ଦ୍ରରେ ରୋଷେୟା ନିଯୁକ୍ତି ପାଇଁ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। ତେବେ ଗ୍ରାମର ୩ଜଣ ମହିଳା ଉକ୍ତ ପଦବି ପାଇଁ ସାକ୍ଷାତକାର ଦେଇଥିଲେ। କିନ୍ତୁ ସେମାନଙ୍କ ମଧ୍ୟରୁ କେହି ମହିଳା ନିଯୁକ୍ତି ପାଇନଥିଲେ। ତେବେ ଗ୍ରାମର ୧ ନମ୍ବର ୱାର୍ଡର ମହିଳା ୱାର୍ଡମେମ୍ବରଙ୍କୁ ବିଭାଗ ପକ୍ଷରୁ ରୋଷେୟା ଭାବେ ନିଯୁକ୍ତି ଦିଆଯାଇଥିବା ଗ୍ରାମବାସୀ ମାନେ ଜାଣିବାକୁ ପାଇଥିଲେ। ଅନ୍ୟପଟେ ସଂପୃକ୍ତା ମହିଳା ୱାର୍ଡମେମ୍ବର ବାରକୋଟ ବ୍ଲକରେ ହୋଇଥିବା ସାକ୍ଷାତକାରରେ ମଧ୍ୟ ଅଂଶଗ୍ରହଣ କରିନଥିଲେ। ତେବେ ସେ ସାକ୍ଷାତକାରରେ ଅଂଶଗ୍ରହଣ କରିନଥିବାବେଳେ ସଂପୃକ୍ତା ମହିଳା ୱାର୍ଡମେମ୍ବର ଜଣକ ୱାର୍ଡମେମ୍ବର ଭାବେ କାର୍ଯ୍ୟରତ ଥିବାବେଳେ ତାଙ୍କୁ କିପରି ଉକ୍ତ ପଦବି ପାଇଁ ନିଯୁକ୍ତି ଦିଆଯିବା ସହଏଥିରେ ଅନିୟମିତତା ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି।