Garvita Odia
ଭୁବନେଶ୍ୱର: ପ୍ରଦୂଷଣକୁ ହ୍ରାସ କରିବା ସହ ଅଧିକରୁ ଅଧିକ ଅକ୍ଷୟ ଶକ୍ତି ଆହରଣକୁ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି। ପୂର୍ବର ବିଜେଡି ସରକାର ଏ କ୍ଷେତ୍ରରେ ଓଡ଼ିଶା ଅକ୍ଷୟ ଶକ୍ତି ନୀତି, ୨୦୨୨ ଏବଂ ଓଡ଼ିଶା ଇଭି ନୀତି, ୨୦୨୧ର ପ୍ରଣୟନ କରିଥିଲେ। ପରେ ଇଭି ନୀତିରେ ୨୦୨୩ ମସିହାରେ କେତେକ ସଂଶୋଧନ ମଧ୍ୟ କରାଯାଇଥିଲା। ତେବେ ବୈଦ୍ୟୁତିକ ଯାନ ବା ଇଭିର ବ୍ୟବହାର ବୃଦ୍ଧି କରିବା ପାଇଁ ରାଜ୍ୟ ସରକାର ବିଚାର କରୁଛନ୍ତି। ଏନେଇ ସରକାରଙ୍କ ପକ୍ଷରୁ ଖୁବଶୀଘ୍ର ନୂଆ ନୀତି ଆସିବ ବୋଲି ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ ସୂଚନା ଦେଇଛନ୍ତି।
ଏକ କାର୍ୟ୍ୟକ୍ରମରେ ଉପମୁଖ୍ୟମନ୍ତ୍ରୀ ଏନେଇ କହିଛନ୍ତି ଯେ ଆଗକୁ ସରକାରୀ ବାସଭବନରେ ସୋଲାର ପ୍ୟାନେଲ ବାଧ୍ୟତାମୂଳକ କରାଯିବ। ଆସନ୍ତା ୫ ବର୍ଷ ମଧ୍ୟରେ ସମସ୍ତ ସରକାରୀ କାର୍ୟ୍ୟାଳୟରେ ସୌର ପ୍ୟାନେଲ ଲଗାଯିବ ବୋଲି ମଧ୍ୟ କନକବର୍ଦ୍ଧନ ସୂଚନା ଦେଇଛନ୍ତି। ବର୍ତ୍ତମାନ ଦ୍ବୈତନଗରୀର ବିଭିନ୍ନ କାର୍ୟ୍ୟାଳୟରେ ସୌର ପ୍ୟାନେଲ ଲଗାଯାଇଛି। ଆଗାମୀ କିଛି ଦିନ ମଧ୍ୟରେ ସମସ୍ତ ସରକାରୀ କାର୍ୟ୍ୟାଳୟକୁ ସୌରଶକ୍ତିରେ ପରିଚାଳନା କରାଯିବ। ଏହାସହ ସରକାରୀ କର୍ମଚାରୀମାନେ ଇଭି ଗାଡି ବ୍ୟବହାର କରିବା ଉଚିତ୍ ବୋଲି ବୋଲି ଶ୍ରୀ ସିଂହଦେଓ ସୂଚନା ଦେଇଛନ୍ତି।
ସୂଚନାଯୋଗ୍ୟ ଯେ ପୂର୍ବରୁ ଇଲେକ୍ଟ୍ରିକ୍୍ ଗାଡ଼ି କିଣିବାକୁ ଗତ ସରକାର ଅଗ୍ରୀମ ଅର୍ଥରାଶି ସହାୟତା ଆକାରରେ ଯୋଗାଇ ଦେଉଥିଲେ। ସରକାରୀ ଚାକିରିଆଙ୍କୁ ଇଲେକ୍ଟ୍ରିକ୍ ଗାଡ଼ି କିଣିବାକୁ ନେଇ ଆଡଭାନ୍ସ ମଧ୍ୟ ମିଳୁଥିଲା। ୨୦୨୩ରେ ଇଭି ନୀତିରେ ହୋଇଥିବା ସଂଶୋଧନ ଅନୁଯାୟୀ ଦୁଇଚକିଆ ଯାନ ପାଇଁ ସରକାର ସର୍ବାଧିକ ୨୦ ହଜାର ଟଙ୍କା ପର୍ୟ୍ୟନ୍ତ ପ୍ରୋତ୍ସାହନ ରାଶି ଯୋଗାଇ ଦେଉଥିବା ବେଳେ ତିନି ଚକିଆ ପାଇଁ ୩୦ ହଜାର ଏବଂ ଚାରି ଚକିଆ ପାଇଁ ସର୍ବାଧିକ ଦେଢ଼ ଲକ୍ଷ ଟଙ୍କା ପର୍ୟ୍ୟନ୍ତ ସହାୟତା ପ୍ରଦାନ କରାଯାଉଛି। ଏହାସହ ପୂର୍ବ ଇଭି ନୀତିରେ ପଞ୍ଜୀକରଣ ଏବଂ ସଡ଼କ ଶୁଳ୍କକୁ ମଧ୍ୟ ଛାଡ଼ କରାଯାଇଛି। ଏତେସବୁ ପ୍ରୋତ୍ସାହନ ପରେ ମଧ୍ୟ ଇଭି ଗାଡ଼ି ବିକ୍ରି ପରିମାଣ ବଢ଼ିବା ପରିବର୍ତ୍ତେ ଧୀରେ ଧୀରେ କମିବାରେ ଲାଗିଛି। ଏହାର ଦୁଇଟି ପ୍ରମୁଖ କାରଣ ଥିବା ନେଇ ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
