ସୁବର୍ଣ୍ଣରେଖାର ଜଳସ୍ତର ବିପଦ ସଂକେତ ପାର୍‌

ବାଲେଶ୍ବର: ଜଳକା ନଦୀର ତୃତୀୟ ଥର ବନ୍ୟା ଆସିବା ପରେ ଏବେ ଚିନ୍ତା ବଢ଼ାଇଛି ସୁବର୍ଣ୍ଣରେଖା । ଜଳକା ନଦୀର ବନ୍ୟା ପାଣି ଘରେ ଘରେ ପାଣି ପଶିଥିବା ବେଳେ ସୁବର୍ଣ୍ଣରେଖା ନଦୀର ଜଳସ୍ତର ବୃଦ୍ଧି ପାଇଛି । ରାଜଘାଟ ନିକଟରେ ସୁବର୍ଣ୍ଣରେଖାର ବିପଦ ସଂକେତ ୧୦.୩୬ ଥିବା ବେଳେ ବର୍ତ୍ତମାନ ଜଳସ୍ତର ୧୦.୪୦ ମିଟରରେ ପ୍ରବାହିତ ହେଉଛି । ଏହାଦ୍ୱାରା ଉତ୍ତର ବାଲେଶ୍ୱରରେ ପୁଣି ବଡ଼ ବନ୍ୟା ଆସିବା ନେଇ ଆଶଙ୍କା ପ୍ରକାଶ ପାଇଛି ।
ବିଶେଷ କରି ଜଳେଶ୍ୱର, ବାଲିଆପାଳ, ଭୋଗରାଇ ଆଦି ଅଞ୍ଚଳରେ ପାଣି ପଶିବାର ସମ୍ଭାବନା ରହିଛି । ଜଳକା ନଦୀରେ ବନ୍ୟା ଆସିବା ଯୋଗୁଁ ବସ୍ତା, ରୁପ୍ସା ଆଦି ଅଞ୍ଚଳ ଏବେବି ଜଳମଗ୍ନ ରହିଛି । ପୁଣି ସୁବର୍ଣ୍ଣରେଖାର ଜଳସ୍ତର ବୃଦ୍ଧି ଚିନ୍ତା ବଢ଼ାଇଛି । ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ସୁବର୍ଣ୍ଣରେଖା ଫୁଲିବାରେ ଲାଗିଛି । ଝାଡ଼ଖଣ୍ଡ ଓ ଉପରମୁଣ୍ଡରୁ ଲଗାତାର ପାଣି ଆସୁଥିବାରୁ ଜଳସ୍ତର ଆହୁରି ବଢ଼ିବାର ସମ୍ଭାବନା ରହିଛି । ନଦୀର ଜଳସ୍ତର ବୃଦ୍ଧି ପାଉଥିବାରୁ ବିଶେଷ କରି ଜଳେଶ୍ୱର, ବାଲିଆପାଳ ଏବଂ ଭୋଗରାଇ ବ୍ଲକର ଶତାଧିକ ତଳିଆ ଗ୍ରାମ ପ୍ରଭାବିତ ହେବାର ଆଶଙ୍କା ଦେଖାଦେଇଛି । ନଦୀକୂଳିଆ ବାସିନ୍ଦା ଏବେ ବନ୍ୟା ଆଶଙ୍କାରେ ଭୟଭୀତ ହୋଇପଡ଼ିଛନ୍ତି ।
ଅନ୍ୟପକ୍ଷରେ, ଜଳକା ନଦୀରେ ଆସିଥିବା ତୃତୀୟ ଥର ବନ୍ୟା ଯୋଗୁଁ ସ୍ଥିତି ଅଣାୟତ୍ତ ହୋଇପଡ଼ିଛି । କେତେକ ପ୍ରମୁଖ ଗ୍ରାମ୍ୟ ରାସ୍ତା ଉପରେ ୨ ରୁ ୩ ଫୁଟ ଉଚ୍ଚର ପାଣି ଚାଲୁଥିବାରୁ ଯାତାୟାତ ସମ୍ପୂର୍ଣ୍ଣ ଠପ୍ ହୋଇଯାଇଛି । ଏହାସହ ହେକ୍ଟର ହେକ୍ଟର ଧାନ ତଳି ଏବଂ ପନିପରିବା ଫସଲ ବନ୍ୟା ପାଣିରେ ବୁଡ଼ି ରହିଥିବାରୁ ଚାଷୀକୂଳ ମୁଣ୍ଡରେ ହାତ ଦେଇ ବସିଛି ।