ବିଜେପି ସରକାରର ୨୪ ମାସରେ ୧୨ ବିଫଳତା ଗଣେଇଲେ ରଣେନ୍ଦ୍ର

୧- ଓଡ଼ିଶାର ବରିଷ୍ଠ ନାଗରିକ ଓ ଦିବ୍ୟାଙ୍ଗ ଆନ୍ଦୋଳନରେ ବସିଛନ୍ତି । ତିନି ମାସ ହେଲା ସରକାର ତାଙ୍କୁ ଭତ୍ତା ଦେବାରେ ବିଫଳ ହୋଇଛନ୍ତି । ସବୁ ମଧୁବାବୁ ପେନସନ ଯୋଜନା ତଥା ଜାତୀୟ ସାମାଜିକ ସହାୟତା ଯୋଜନା ଅନୁସାରେ ସବୁ ହିତାଧିକାରୀଙ୍କୁ ୩,୫୦୦ ଟଙ୍କା ସହାୟତା ଦେବା ପାଇଁ ନିର୍ବାଚନ ସମୟରେ ବିଜେପି ସଂକଳ୍ପ ପତ୍ରରେ ପ୍ରତିଶୃତି ଦେଇଥିଲେ । ରାଜ୍ୟର ବରିଷ୍ଠ ନାଗରିକ ଓ ଦିବ୍ୟାଙ୍ଗଙ୍କୁ ଠକି ଭୋଟ ନେଲେ । କ୍ଷମତାକୁ ଆସିଲା ପରେ ସଂପୂର୍ଣ୍ଣ U-Turn ନେଇଗଲେ । କେବଳ ୮୦ ବର୍ଷ ବୟସ୍କ ବରିଷ୍ଠ ନାଗରିକ ଓ ୮୦ ପ୍ରତିଶତ ଅକ୍ଷମତା ଥିବା ଦିବ୍ୟାଙ୍ଗଙ୍କୁ ୩,୫୦୦ ଟଙ୍କା ପ୍ରଦାନ କରାଯିବ ବୋଲି ନୂତନ ନିୟମ ଆଣିଲେ ।

୨- ରାଜ୍ୟର ଚାଷୀଙ୍କୁ ୮୦୦ ଟଙ୍କାର ଇନପୁଟ ସବସିଡି ପ୍ରଦାନ କରିବେ ବୋଲି କହିଥିଲେ । ପ୍ରଥମ କ୍ଯାବିନେଟରେ ବି ତାହା କଲେ । କିନ୍ତୁ ଚଳିତ ଖରିଫ ଋତୁରେ ଏହାକୁ ୭୨୯ ଟଙ୍କାକୁ ଖସାଇ ଦେଲେ କାରଣ କେନ୍ଦ୍ର ସରକାର MSPରେ ପ୍ରାୟ ୩ ପ୍ରତିଶତ ମହଙ୍ଗା ଦର ହିସାବରେ ୬୯ ଟଙ୍କା ବୃଦ୍ଧି କରିଥିଲେ । ଏହି ସୁବିଧା କୃଷକଙ୍କୁ ଦେବା ବଦଳରେ ନିଜେ ହଡପ କରିଥିଲେ । ଗତ କିଛି ଦିନ ତଳେ ସରକାର ଧାନର MSPକୁ ୨,୪୪୧ ଟଙ୍କାକୁ ବୃଦ୍ଧି କରିଛନ୍ତି । ତେଣୁ, ରାଜ୍ୟ ସରକର ଏହି ବର୍ଦ୍ଧିତ ପାଉଣାକୁ ନିଜେ ହଡପ କରି ଏବେ ଚାଷୀଙ୍କୁ ୮୦୦ ଟଙ୍କା ବଦଳରେ ୬୫୯ ଟଙ୍କା ଇନପୁଟ ସବସିଡି ପ୍ରଦାନ କରିବେ । ଏବେ ଚାଷୀ ପିଛା ୧୫୦ କୁଇଣ୍ଟାଲ ସିଲିଙ୍ଗ ଲଗାଇଛନ୍ତି, ଯାହା ତାଙ୍କର ସଂକଳ୍ପ ପତ୍ରରେ ନ ଥିଲା । ଏହି U-turn ଫଳରେ ରାଜ୍ୟର ପ୍ରାୟ ୨୦ ଲକ୍ଷ ଚାଷୀ ପରିବାର ତ୍ରାହି ତ୍ରାହି ଡାକୁଛନ୍ତି ।

୩- ସରକାର ସୁଭଦ୍ରାକୁ ନେଇ ବାହାବା ଲୁଟୁଛନ୍ତି । ସଂକଳ୍ପ ପତ୍ରରେ ଦୁଇ ବର୍ଷରେ ୫୦ ହଜାର ଟଙ୍କାର କୁପନ ପ୍ରଦାନ କରିବେ ବୋଲି ଘୋଷଣା କରିଥିଲେ । କିନ୍ତୁ ପ୍ରଥମ କ୍ଯାବିନେଟ ମିଟିଂରେ ରାଜ୍ୟର ଏକ କୋଟି ସୁଭଦ୍ରାଙ୍କୁ ଭଣ୍ଡେଇ ବର୍ଷକୁ ମାତ୍ର ୧୦ ହଜାର ଟଙ୍କା ପ୍ରଦାନ କରିବା ପାଇଁ ନିଷ୍ପତ୍ତି ନେଇଥିଲେ । ବିଭିନ୍ନ ରାଜ୍ୟରେ ଥିବା ବିଜେପି ସରକାରରେ ଏମିତି ଯୋଜନା ତୁଳନାରେ ଓଡିଶାରେ ଦିଆ ଯାଉଥିବା ସହାୟତା ସବୁଠାରୁ କମ ।

୪- ସରକାର ଜଗନ୍ନାଥ ସଂସ୍କୃତି ଓ ଜଗନ୍ନାଥ ପ୍ରେମୀଙ୍କ କଥା କହୁଛନ୍ତି । କିନ୍ତୁ, କେବଳ ତାହା ପ୍ରତାରଣା । ଗତ ସରକାର ଭକ୍ତଙ୍କ ଅପେକ୍ଷା ଗୃହକୁ ଶୀତତାପ ନିୟନ୍ତ୍ରଣ ବ୍ୟବସ୍ଥା କରଯାଇଥିଲା, ତାହାକୁ ଆସିବା ମାତ୍ରେ ହଟାଇ ଦେଲେ ଏ ସରକାର । ଗତ ଦୁଇ ବର୍ଷ ହେଲା ଖରାରେ ଭକ୍ତମାନେ ଡହଳ ବିକଳ ହେଉଛନ୍ତି । ମନ୍ଦିରରେ ଏଣିକି ଧାଡି ଦର୍ଶନ ହେବ ବୋଲି ଆଇନ ମନ୍ତ୍ରୀ କାହାକୁ ନ ପଚାରି ନିଜେ ନିଜେ ଘୋଷଣା କରିଦେଲେ । ସରକାର ଆସିବାର ମାତ୍ର ତିନି ମାସ ମଧ୍ୟରେ ତାହାକୁ ଘୋଷଣା କରିଥିଲେ । ପ୍ରଥମେ ଏହାକୁ ୨୪ ଡିସେମ୍ବର ୨୦୨୪, ତା’ପରେ ଜାନୁୟାରୀ ୨୦୨୫ରେ ତାକୁ କାର୍ଯ୍ୟକାରୀ କରିବା ପାଇଁ ମନ୍ତ୍ରୀ କହିଲେ । କିନ୍ତୁ ଏଯାଏଁ ହୋଇପାରିଲା ନାହିଁ ।

ସେହିପରି ମାଗଣାରେ ମହାପ୍ରସାଦ ଜଗନ୍ନାଥ ପ୍ରେମୀଙ୍କୁ ମିଳିବ ବୋଲି ଆଇନ ମନ୍ତ୍ରୀ ଘୋଷଣା କଲେ । ଏହି ଘୋଷଣା କାର୍ଯ୍ୟକରି କରିବା ପାଇଁ ଆଉ ଶୋର ଶବ୍ଦ ଶୁଣା ଯାଉନାହିଁ । ପୁରା U-turn ନେଇଗଲେ । ନିର୍ବାଚନ ପୂର୍ବରୁ ଘୋଷଣା କରିଥିଲେ ଶ୍ରୀ ମନ୍ଦିରର ଭିତର ରତ୍ନ ଭଣ୍ଡାର ଚାବି ହଜିବା ରିପୋର୍ଟକୁ ଗୃହରେ ରଖିବେ । କିନ୍ତୁ, ଏବେ ଏ ସରକାର ପୂରାପୂରି U-turn ନେଇଗଲେ । ଗତ ଶୀତ କାଳୀନ ଅଧିବେଶନରେ ଗୃହରେ ପଚାରିଥିବା ପ୍ରଶ୍ନର ଏ ପର୍ଯ୍ୟନ୍ତ ଉତ୍ତର ଦେବାକୁ ସରକାର ସଫଳ ହୋଇ ନାହାନ୍ତି ।

୫- ୨୦୨୫-୨୬ ଶିକ୍ଷା ବର୍ଷରୁ ଛାତ୍ର ସାଂସଦ ନିର୍ବାଚନ ନିୟମିତ ଭାବେ କରାଯିବ ବୋଲି ଉଚ୍ଚଶିକ୍ଷା ମନ୍ତ୍ରୀ ଘୋଷଣା କରିଥିଲେ । ସରକାରଙ୍କ ବିଭିନ୍ନ ମନ୍ତ୍ରୀ, ଖୋଦ ମୁଖ୍ୟମନ୍ତ୍ରୀ ବିଭିନ୍ନ ସଭା ସମିତିରେ କହିଥିଲେ ୨୦୨୫ରେ ଛାତ୍ର ସାଂସଦ ନିର୍ବାଚନ ହେବ । ଗତବର୍ଷ ନିର୍ବାଚନ ହେଲାନାହିଁ । ଏ ବର୍ଷ ବି ତାହା କଲା ପରି କୌଣସି ସଂକେତ ମିଳୁନାହିଁ ।

୬- ମତ୍ସ୍ୟ ଓ ପ୍ରାଣୀ ପାଳନ ମନ୍ତ୍ରୀ କହିଥିଲେ ରାଜ୍ୟ ସରକାର ଏକ ନୂତନ ଯୋଜନା ଅଧୀନରେ ସମସ୍ତ ପ୍ରାଥମିକ ଛାତ୍ରଛାତ୍ରୀଙ୍କୁ ୨୦୦ ML କ୍ଷୀର ମିଡ-ଡେ-ମିଲରେ ପ୍ରଦାନ କରିବେ । ଏବେ ଏହା ଉପରେ ସରକାର ସଂପୂର୍ଣ୍ଣ U-Turn ନେଇ ସାରିଛନ୍ତି ।

୭- ସରକାର ଏକତରଫା ଭାବେ ବିଧାୟକ, ମନ୍ତ୍ରୀ, ବାଚସ୍ପତିଙ୍କ ଦରମା, ପେନସନ, ଭତ୍ତା ବୃଦ୍ଧି କରିଥିଲେ । ବିଜେପିର କେନ୍ଦ୍ରୀୟ ନେତୃତ୍ଵ ଏହା ଉପରେ ଖପପା ହୋଇଗଲେ । ସରକାର ତାକୁ ପ୍ରତ୍ୟାହାର କରିବା ପାଇଁ ବାଧ୍ୟ ହୋଇଥିଲେ । ଏବେ ସେ ବିଲ କେବେ ଆସିବ ଜଣାନାହିଁ ।

୮- ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବହୁ ଆକାଂକ୍ଷିତ ମେଟ୍ରୋ ପ୍ରକଳ୍ପର ଶୁଭାରମ୍ଭ କରିଥିଲେ । କିନ୍ତୁ ଏ ସରକାର ଆସିବା ମାତ୍ରେ ତାହାକୁ ରଦ୍ଦ କରିଦେଲେ । ନୂତନ ଭାବେ ଏହି ପ୍ରକଳ୍ପ ଆସିବ ବୋଲି କହିଲେ । କିନ୍ତୁ ଗୃହ ଓ ନଗର ଉନ୍ନୟନ ମନ୍ତ୍ରୀ ବିଧାନସଭାରେ ଉତ୍ତର ରଖିଲେ, ଭୁବନେଶ୍ଵରରେ ଜନସଂଖ୍ୟା ଅଧିକ ନୁହେଁ । ତେଣୁ ଭୁବନେଶ୍ବରର ୨୦୪୧ ସୁଦ୍ଧା feasible ନୁହେଁ । ଲୋକଙ୍କ ଆକ୍ରୋଶର ଶିକାର ହେବା ପରେ ଏହାକୁ ବାତିଲ କରାଯାଇ ନାହିଁ । ଏହାକୁ ସାମୟିକ ଭାବେ ସ୍ଥଗିତ ରକ୍ଷା ଯାଇଛି ବୋଲି ସରକାର କହିଲେ । କିନ୍ତୁ, ଗତ ୧୧ ଏପ୍ରିଲ କ୍ୟାବିନେଟ ବୈଠକରେ ମେଟ୍ରୋ ପ୍ରକଳ୍ପର consultant Delhi Metro Rail Corporation (DMRC) ସହିତ ମେଟ୍ରୋ ପ୍ରକଳ୍ପ ବୁଝାମଣାକୁ ରଦ୍ଦ କରିଛନ୍ତି ।

୯- ପରିବହନ ମନ୍ତ୍ରୀ ଡିସେମ୍ବର ୨୦, ୨୦୨୬ରେ ଘୋଷଣା କରିଦେଲ ଜାନୁୟାରୀ ୧ ତାରିଖରୁ ବିନା ପ୍ରଦୂଷଣ ସାର୍ଟିଫିକେଟରେ ଆଉ ପେଟ୍ରୋଲ ପମ୍ପରେ ତେଲ ମିଳିବ ନାହିଁ । ଏହି ଘୋଷଣାକୁ କିପରି କାର୍ଯ୍ୟକରି କରାଯିବ, ଓଡିଶାରେ ଏତେ ସଂଖ୍ୟକ PUCC checking station ଅଛି ନା ନାହିଁ, ପେଟ୍ରୋଲ ପମ୍ପ ଗୁଡିକ କିପରି PUCCର verify କରିବେ କିଛି ଆଲୋଚନା ନ କରି ଦିଲ୍ଲୀ ସରକାରଙ୍କୁ କପି କରି ମାତ୍ର ଦଶ ଦିନ ଧାର୍ଯ୍ୟ କରିଦେଲେ । ଫଳରେ ଲକ୍ଷ ଲକ୍ଷ ଲୋକଙ୍କୁ PUCC centre ଆଗରେ ଲାଇନରେ ଲଗାଇ ଦେଲେ । ପରେ ଜନ ଆକ୍ରୋଶ ଏବଂ ଓଡିଶା ହାଇ କୋର୍ଟ ଛାଟରେ ୨୮ ଜାନୁୟାରୀରେ ଏହି notification କୁ ପ୍ରତ୍ୟାହାର କରିଥିଲେ ।

୧୦- ସରକାରକୁ ଆସିବା ମାତ୍ରେ ଜୁଲାଇ ୧୯ ତାରିଖରେ ବିଜୁ ପଟନାୟକ ଖେଳ ପୁରସ୍କାରର ନାମ ପରିବର୍ତ୍ତନ କରିବା ପାଇଁ ବିଜ୍ଞପ୍ତି ଜାରି କରିଥିଲେ ସରକାର । କିନ୍ତୁ ବିଜ୍ଞପ୍ତିର ତିନିଦିନ ପରେ ତାହାକୁ ପ୍ରତ୍ୟାହାର କରିଥିଲେ । ମୁଖ୍ୟମନ୍ତ୍ରୀଙ୍କ ବିନା ଅନୁମୋଦନରେ କ୍ରୀଡା ମନ୍ତ୍ରୀ ଏହାକୁ ଘୋଷଣା କରି ଦେଇଥିଲେ ।

୧୧- ଆଗାମୀ ପଞ୍ଚାୟତ ନିର୍ବାଚନକୁ ଦୃଷ୍ଟିରେ ରଖି ସରକାର ଏପ୍ରିଲ ୬ ତାରିଖ ଦିନ ସବୁ ଜିଲ୍ଲାପାଳମାନଙ୍କୁ ଆସନ ସଂରକ୍ଷଣ ଚୁଡାନ୍ତ କରିବା ପାଇଁ ନିର୍ଦ୍ଦେଶ ଦେଇଥିଲେ । କିନ୍ତୁ, ସେହି ଆଦେଶକୁ ଏପ୍ରିଲ ୧୪ ତାରିଖରେ ପ୍ରତ୍ୟାହୃତ କରିଥିଲେ ।

୧୨- ନିର୍ବାଚନ ପୂର୍ବରୁ ସବୁ ସଭା ସମିତିରେ ଶାସକ ଦଳ ନେତା କହିଲେ ଓଡିଶାରେ ମଦ ବନ୍ଦ କରିବେ । ବର୍ତ୍ତମାନ ଅବକାରୀ ମନ୍ତ୍ରୀ କହୁଛନ୍ତି ରାଜ୍ୟର ମିଲେଟ ଓ ମହୁଲରୁ ସୁବାଶିତ ଉତ୍ତମ ମାନର ମଦ ପ୍ରସ୍ତୁତ କରି ବିକ୍ରି କରିବେ । ବେସରକାରୀ ସଂସ୍ଥାକୁ ଏଥିପାଇଁ ସରକାର ଅର୍ଥ ସରକାର ଦେବେ । ସରକାରଙ୍କ ମଦ ନିଗମର ସ୍ଲୋଗାନ, ‘ଅଳ୍ପ ମଦ ପିଅ, କିନ୍ତୁ ଭଲ ପିଅ’ । ଯେଉଁ ସରକାର ମଦ ବନ୍ଦ କରିବା ପ୍ରତିଶୃତି ଦେଇଥିଲା ସେ ସରକାର ଭଲ ମଦ ପ୍ରସ୍ତୁତ କରି ଲୋକଙ୍କ ମଧ୍ୟରେ ବିକ୍ରି କରିବା ପାଇଁ ଲାଗି ପଡିଛି । ଗତ ୫ ତାରିଖରେ ୫୦ଟି ଅଧିକ Off-Shopକୁ ଲାଇସେନ୍ସ ଦେବା ପାଇଁ ଟେଣ୍ଡର ଡ଼ାକିଥିଲା । ମାର୍ଚ୍ଚ ୧୧ ରେ ରାଜ୍ୟରେ ଗୁଟକା ଓ ନିକୋଟିନର ବିକ୍ରି, ଉତ୍ପାଦନ ଓ ବଣ୍ଟନ ପାଇଁ blanket ban ଜାରି କରିଥିଲେ । କିନ୍ତୁ ଏହାକୁ କାର୍ଯ୍ୟକାରୀ କରିବା ମୁସ୍କିଲ ଏବଂ ଗୁଟକା ଲବିଙ୍କ ଚାପରେ ଚେପା ହୋଇ ସେଇ ବିଜ୍ଞପ୍ତିକୁ ୨୭ ଜାନୁୟାରୀରେ ପ୍ରତ୍ୟାହାର କରିଛନ୍ତି ।