Garvita Odia
ଭୁବନେଶ୍ୱର: ଓଡିଶାର ରାଜସ୍ୱ ମନ୍ତ୍ରୀ ଏବଂ ବିଜେପିର ବରିଷ୍ଠ ନେତା ସୁରେଶ ପୂଜାରୀ ସୋମବାର ପଶ୍ଚିମବଙ୍ଗ ନିର୍ବାଚନ ଫଳାଫଳକୁ ସମସ୍ତ ରାଜନୈତିକ ଦଳ ପାଇଁ ଏକ ଶିକ୍ଷା ବୋଲି କହିଛନ୍ତି । ପଶ୍ଚିମବଙ୍ଗ ନିର୍ବାଚନ ଫଳାଫଳ ଉପରେ ପ୍ରତିକ୍ରିୟା ଜଣାଇ ପୂଜାରୀ କହିଛନ୍ତି ଯେ, ଲୋକମାନଙ୍କ ଭୋଟ ସ୍ପଷ୍ଟ କରୁଛି ଯେ କୌଣସି ଶକ୍ତି କିମ୍ବା ଦାୟିତ୍ୱ ମିଳିଲେ ଅହଂକାରକୁ ପରିହାର କରି ନମ୍ରତା ସହ ରାଜଧର୍ମ ପାଳନ କରିବା ଆବଶ୍ୟକ । ସେ ଅଭିଯୋଗ କରିଥିଲେ ଯେ TMC ଶାସନକାଳୀନ ସମୟରେ ମହିଳାଙ୍କ ଉପରେ ଅତ୍ୟାଚାର ଭଳି ଗୁରୁତ୍ୱପୂର୍ଣ୍ଣ ବିଷୟକୁ ନଜର ଅନ୍ଦାଜ କରାଯାଇଥିଲା, ଯାହାର ଫଳ ଭୋଟରମାନେ ନିର୍ବାଚନରେ ଦେଖାଇଛନ୍ତି । ଯେତେ କ୍ଷମତାଶାଳୀ ହେଲେ ମଧ୍ୟ ଯଦି ମହିଳାଙ୍କ ଉପରେ ଅନ୍ୟାୟ ହୁଏ ଏବଂ ସରକାର ନିରବ ରହେ, ତାହାଲେ ଲୋକମାନେ ତାହାର ଉଚିତ ଦଣ୍ଡ ଦେବେ ବୋଲି ମନ୍ତ୍ରୀ କହିଥିଲେ ।
ପୂଜାରୀ ଏହା ସହିତ କହିଥିଲେ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱ ଓ କାର୍ଯ୍ୟକର୍ତ୍ତାଙ୍କ ଅକ୍ଲାନ୍ତ ପରିଶ୍ରମର ଫଳରେ ବିଜେପି ଏହି ସଫଳତା ଅର୍ଜନ କରିପାରିଛି। ସେ ଆହୁରି କହିଥିଲେ ଯେ ବାଂଲାଦେଶରୁ ଅନୁପ୍ରବେଶ ନିୟନ୍ତ୍ରଣ କରାଯିବ ଏବଂ ରାଜଧର୍ମ ଅନୁସାରେ ଶାସନ ଚାଲିବ । ଦେଶର ସ୍ୱାଧୀନତା ସଂଗ୍ରାମରେ ଯେପରି ବେଙ୍ଗଲର ଗୁରୁତ୍ୱପୂର୍ଣ୍ଣ ଭୂମିକା ଥିଲା, ସେପରି ଆଗାମୀ ଦିନରେ ମଧ୍ୟ ଦେଶର ବିକାଶରେ ଏହା ମହତ୍ୱପୂର୍ଣ୍ଣ ଭୂମିକା ନେବ ବୋଲି ସେ ଆଶା ବ୍ୟକ୍ତ କରିଛନ୍ତି ।
