ମେଡିକାଲରୁ କଏଦୀ ଚମ୍ପଟ ଘଟଣା ,ଜଣେ ଜେଲ କର୍ମଚାରୀ ସସପେଣ୍ଡ୍

ସୁନ୍ଦରଗଡ଼ : ସୁନ୍ଦରଗଡ ମେଡିକାଲରୁ ବିଚାରାଧୀନ କଏଦୀ ଚମ୍ପଟ ଘଟଣା । ୫ ଦିନ ପରେ ବି ଫେରାର ବିଚାରଧୀନ କଏଦୀଙ୍କ ମିଳୁନି ପତ୍ତା । କୁଆଡେ ଗଲା ଫେରାର କଏଦୀ ଟେକଚାନ୍ଦ ବେହେରା ?, ତାର ଟେର ପାଉନି ପୁଲିସ । ଏହାରି ଭିତରେ ବଡ ସୁରାକ୍ ସାମ୍ନାକୁ ଆସିଛି । ୨୫ ତାରିଖ ରାତିରେ ମେଡିକାଲରୁ କଏଦୀ ଫେରାର ହୋଇଥିଲା । ଆଉ ସେହି ଦିନ ରାତିରେ ନିଜ ଘରେ ପହଞ୍ଚି ସ୍ତ୍ରୀକୁ ଧରି ଫେରାର ହୋଇଯାଇଥିଲା । ଏହା ପୂର୍ବରୁ ସ୍ତ୍ରୀ ସହ ଫୋନ ଯୋଗେ କଥା ହୋଇଥିଲା ଫେରାର ସ୍ବାମୀ । କେହି ଜଣେ ତାଙ୍କୁ ଫେରାର ସ୍ବାମୀଙ୍କ ସମ୍ପର୍କରେ ପଚାରୁଥିବା ବେଳେ ଭିଡିଓ କରିଛନ୍ତି ।

ସେପଟେ ଫେରାର କଏଦୀ ଟେକଚାନ୍ଦ ବେହେରାକୁ ଧରିବାକୁ ପୁଲିସର ୪ଟି ଟିମ ବିଭିନ୍ନ ସ୍ଥାନରେ ଚଢାଉ ଜାରି ରଖିଛି । ତେବେ ଗତ ୨୫ ତାରିଖରେ ଚିକିତ୍ସା ପାଇଁ ଆସିଥିବା ବେଳେ ଶୌଚ ଯିବା ବାହାନା କରି ଚମ୍ପଟ ମାରିଥିଲା କଏଦୀ । କଏଦୀ ଜଣକ ସୁନ୍ଦରଗଡ ସଦର ଥାନା ରୁପାବାହାଲ ଗାଁ ର ଟେକଚାନ୍ଦ ବେହେରା । ସେ ହତ୍ୟା ଅଭିଯୋଗରେ ଗତ ଏପ୍ରିଲ ମାସରୁ ଜେଲରେ ଥିଲା । ବିରାରାଧିନ କଏଦୀ ଫେରାର ଘଟଣାରେ କଏଦୀକୁ ଜଗିଥିବା ଜଣେ ଜେଲ କର୍ମଚାରୀଙ୍କୁ ନିଳମ୍ବନ କରାଯାଇଛି ।
ତେବେ ଏହା ନୂଆ ଖବର ନୁହେଁ ବିଭିନ୍ନ ଜେଲରୁ କଏଦୀ ଚମ୍ପଟ ଘଟଣା ଜେଲ୍ କର୍ତ୍ତୃପକ୍ଷଙ୍କ ମୁଣ୍ଡବିନ୍ଧାର କାରଣ ପାଲଟିଛି। ଦୁର୍ଦ୍ଦାନ୍ତ ଅପରାଧୀଙ୍କଠାରୁ ଆରମ୍ଭ କରି ଛୋଟ ଅପରାଧୀ ଫେରାର ହୋଇଯାଉଛନ୍ତି। । ଯାହା ପୁଲିସ ପାଇଁ ଚ୍ୟାଲେଞ୍ଚ ପାଲଟିଛି । ଏନେଇ ପୁଲିସର ଆଗାମୀ ପଦକ୍ଷେପ ଉପରେ ସମସ୍ତଙ୍କ ନଜର ।