Garvita Odia
ବାରିପଦା: ଶିମିଳିପାଳରେ ମୁକ୍ତ ଭାବେ ବିଚରଣ କରିବ ‘ଜିନ୍ନତ’ । ବିନା ଟ୍ରାଙ୍କୁଲାଇଜରେ ଖୋଲାଯିବ ରେଡ଼ିଓ କଲାର । ଶିମିଳିପାଳ ଅଭୟାରଣ୍ୟର ପରିବେଶ ସହ ସମ୍ପୂର୍ଣ୍ଣ ଭାବେ ଖାପଖୁଆଇ ନିଜ ବାସସ୍ଥଳୀ ଗଢ଼ିବା ସହ ୪ଟି ଶାବକଙ୍କୁ ଜନ୍ମ ଦେଇଥିବା ମହାବଳ ବାଘୁଣୀ ‘ଜିନ୍ନତ୍’ ଉପରୁ ଏବେ ନଜର ହଟାଇ ସମ୍ପୂର୍ଣ୍ଣ ମୁକ୍ତ କରିବା ପାଇଁ ନିଷ୍ପତ୍ତି ନେଉଛନ୍ତି ବନ ବିଭାଗ । ବର୍ଷା ଋତୁ ପରେ ବିଚାର ବିମର୍ଶ କରି ବାଘୁଣୀ ‘ଜିନ୍ନତ୍’କୁ ସ୍ଥାୟୀ ଭାବରେ ଏନକ୍ଲୋଜରରୁ ମୁକ୍ତ କରିବା ନେଇ ଶିମିଳିପାଳ କର୍ତ୍ତୃପକ୍ଷ ସୂଚନା ଦେଇଛନ୍ତି । ‘ଜିନ୍ନତ୍’ ଶିମିଳିପାଳରେ ସଫଳତାର ସହ ସ୍ଥିର ରହିବା ସହ ଶିମିଳିପାଳର ଅନ୍ୟ ବାଘମାନଙ୍କ ଭଳି ସାଧାରଣ ବିଚରଣ କରୁଥିବାରୁ ଏଭଳି ନିଷ୍ପତ୍ତି ନେବାକୁ ଯାଉଛନ୍ତି କର୍ତ୍ତୃପକ୍ଷ । କିନ୍ତୁ ବାଘୁଣୀ ଯମୁନା ଉପରେ ରହିବ ନଜର ।
ସବୁଠାରୁ ବଡ଼ କଥା ହେଉଛି ବିନା ଟ୍ରାଙ୍କୁଲାଇଜରେ ଖୋଲିବ କଲାର। ଏହି ରେଡିଓ କଲାରକୁ ରିମୋଟ୍ ଜରିଆରେ ସ୍ୱୟଂଚାଳିତ ଭାବେ ବାହାର କରାଯିବ । ଫଳରେ ବାଘୁଣୀକୁ ନିଶ୍ଚେତକ ଦେବାର ଆବଶ୍ୟକତା ପଡ଼ିବ ନାହିଁ। ପରେ ବନ କର୍ମଚାରୀମାନେ ଜଙ୍ଗଲରୁ ଏହାକୁ ସଂଗ୍ରହ କରିବେ । ଶିମିଳିପାଳରେ ମହାବଳ ବାଘ ସଂଖାରେ ବୃଦ୍ଧି ସହିତ କଳାବାଘ ସଂଖ୍ୟାରେ ନିୟନ୍ତ୍ରଣ ପାଇଁ ଏଭଳି ଏକ ନିଷ୍ପତ୍ତି ନିଆଯାଇଥିଲା ଯାହା ସମ୍ପୂର୍ଣ୍ଣ ଭାବେ ସଫଳତା ଆଡ଼କୁ ଗତି କରୁଛି ।
ସୂଚନା ଅନୁସାରେ, ମହାରାଷ୍ଟ୍ରର ତାଡୋବା-ଅନ୍ଧାରୀ ବ୍ୟାଘ୍ର ସଂରକ୍ଷଣ ପ୍ରକଳ୍ପରୁ ୨୦୨୪ମସିହାରେ ପ୍ରଥମେ ଯମୁନା ଏବଂ ପରେ ‘ଜିନ୍ନତ୍’କୁ ଶିମିଳିପାଳ ଅଣାଯାଇଥିଲା । ନଭେମ୍ବର ୨୦୨୪ରେ ଶିମିଳିପାଳ ଆସିଥିଲା ‘ଜିନ୍ନତ୍’। ସେତେବେଳକୁ ତାକୁ ୪ବର୍ଷ ବୟସ ହୋଇଥିଲା । ‘ଜିନ୍ନତ୍’ ଗତ ମେ’ ୨୦୨୬ରେ ୪ଟି ଶାବକଙ୍କୁ ଜନ୍ମ ଦେଇ ରାଜ୍ୟ ବନ୍ୟପ୍ରାଣୀ ସଂରକ୍ଷଣ କ୍ଷେତ୍ରରେ ଏକ ବଡ଼ ସଫଳତା ଆଣିଦେଇଛି। ଅପରପକ୍ଷରେ, କୁଲଡିହା ଜଙ୍ଗଲରେ ଥିବା ଅନ୍ୟତମ ବାଘୁଣୀ ‘ଯମୁନା’ ଏ ପର୍ଯ୍ୟନ୍ତ ବଂଶବୃଦ୍ଧି କରିନଥିବାରୁ ତା’ ଉପରେ ପୂର୍ବଭଳି ରେଡିଓ କଲାର ମାଧ୍ୟମରେ ନଜର ରଖାଯିବ ବୋଲି ସୂଚନା ଦେଇଛନ୍ତି ଶିମିଳିପାଳ ବ୍ୟାଘ୍ର ପ୍ରକଳ୍ପ (ଏସଟିଆର) କ୍ଷେତ୍ର ନିର୍ଦ୍ଦେଶକ ଡ଼ା. ପ୍ରକାଶ ଚାନ୍ଦ ଗୋଗିନେନୀ।
