Garvita Odia
ଯୁବ ସମାଜକୁ ନିଶାମୁକ୍ତ ରହିବା ସହ ଗଣତନ୍ତ୍ରର ସୁଦୃଢ଼ୀକରଣ ଓ ରାଷ୍ଟ୍ର ନିର୍ମାଣରେ ଭାଗୀଦାର ହେବାକୁ ଆହ୍ୱାନ
ରାଇକିଆ: କନ୍ଧମାଳ ଜିଲ୍ଲା ରାଇକିଆସ୍ଥିତ ସୁଧାକିରଣ କଲେଜ ପରିସରରେ ‘ବିକଶିତ ଭାରତ ଯୁବ ସଂସଦ’ କାର୍ଯ୍ୟକ୍ରମ ଅଧ୍ୟକ୍ଷ ଦୀନବନ୍ଧୁ ମହାନ୍ତିଙ୍କ ସଭାପତିତ୍ୱରେ ଆୟୋଜିତ ହୋଇଯାଇଛି। ମାଇ ଭାରତ, କନ୍ଧମାଳ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଯୁବ ସମାଜର ଭୂମିକା, ନିଶାମୁକ୍ତ ସମାଜ ଗଠନ, ଗଣତାନ୍ତ୍ରିକ ମୂଲ୍ୟବୋଧ ଓ ବିକଶିତ ଭାରତ ନିର୍ମାଣରେ ଯୁବପିଢ଼ିଙ୍କ ଦାୟିତ୍ୱ ଉପରେ ଆଲୋଚନା ହୋଇଥିଲା।ସଭାପତି ଦୀନବନ୍ଧୁ ମହାନ୍ତି ନିଜ ଅଭିଭାଷଣରେ ଯୁବପିଢ଼ିଙ୍କୁ ନିଶାସକ୍ତି ଓ ପଥଭ୍ରଷ୍ଟତାଠାରୁ ଦୂରେଇ ରହି ନିଜର ଉଜ୍ଜ୍ୱଳ ଭବିଷ୍ୟତ ଗଠନ କରିବା ସହ ଦେଶର ବିକାଶରେ ସକ୍ରିୟ ଭାଗୀଦାର ହେବାକୁ ଆହ୍ୱାନ ଦେଇଥିଲେ। ଏଥିସହ ଏକ ସୁଦୃଢ଼ ଗଣତନ୍ତ୍ର ପାଇଁ ମତଦାନର ଗୁରୁତ୍ୱ ଉପରେ ଆଲୋକପାତ କରି ଯୁବ ଭୋଟରମାନେ ସଚେତନ ଭାବେ ନିଜର ମତଦାନ ଅଧିକାର ସାବ୍ୟସ୍ତ କରିବା ଉଚିତ ବୋଲି କହିଥିଲେ।କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଜୀବନଜ୍ୟୋତି ମହାବିଦ୍ୟାଳୟର ଅର୍ଥନୀତି ବିଭାଗ ଅଧ୍ୟାପିକା ଶ୍ରୀମତୀ ଗୀତାଞ୍ଜଳି ଗନ୍ତାୟତ,ଇତିହାସ ବିଭାଗ ଅଧ୍ୟାପିକା ଦିବ୍ୟଜ୍ୟୋତି ମଲ୍ଲିକ, ଜାତୀୟ ସେବା ଯୋଜନାର ପ୍ରୋଗ୍ରାମ ଅଫିସର ନୀଳାଞ୍ଚଳ ସାହୁ, ଅଧ୍ୟାପକ ଆଲୋକ କୁମାର ପରିଚ୍ଛା, ଧର୍ମେନ୍ଦ୍ର ଦିଗାଲ ଏବଂ ୟୁଥ୍ ଆଇକନ୍ ପ୍ରତ୍ୟୁଷା ଦାସ ମଞ୍ଚାସୀନ ଥିଲେ। ମଂଚାସୀନ ଅତିଥି ଗଣ ନିଜ ନିଜ ଅଭିଭାଷଣରେ ଯୁବପିଢ଼ିଙ୍କୁ ନିଶାମୁକ୍ତ ଜୀବନଶୈଳୀ ଆପଣାଇବା, ଶିକ୍ଷା ଓ ଦକ୍ଷତା ବିକାଶ ମାଧ୍ୟମରେ ଭବିଷ୍ୟତ ଗଠନ କରିବା ସହ ଗଣତାନ୍ତ୍ରିକ ବ୍ୟବସ୍ଥାକୁ ଅଧିକ ସୁଦୃଢ଼ କରିବାରେ ନିଜର ଯୋଗଦାନ ରଖିବାକୁ ପରାମର୍ଶ ଦେଇଥିଲେ।ଏହି ଅବସରରେ ନିଶାମୁକ୍ତ ସମାଜ ଗଠନ ସମ୍ପର୍କରେ ସଚେତନତା ସୃଷ୍ଟି ଉଦ୍ଦେଶ୍ୟରେ ୧୫ ଜଣ ଛାତ୍ରଛାତ୍ରୀ ସ୍ଲୋଗାନ ଲେଖି ଅଂଶଗ୍ରହଣ କରିଥିଲେ। ସେମାନଙ୍କୁ ଅତିଥିମାନଙ୍କ ପକ୍ଷରୁ ମାନପତ୍ର ପ୍ରଦାନ କରି ଉତ୍ସାହିତ କରାଯାଇଥିଲା। ସେହିପରି ୟୁଥ୍ ଆଇକନ୍ ପ୍ରତ୍ୟୁଷା ଦାସଙ୍କୁ ତାଙ୍କର ଯୋଗଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା। ସେ ଏହି ଅବସରରେ ବର୍ତ୍ତମାନର ଏସ୍ଆଇଆର୍ ପ୍ରସଙ୍ଗ ଉପରେ ନିଜର ସୁନ୍ଦର ଓ ତଥ୍ୟଭିତ୍ତିକ ମତ ଉପସ୍ଥାପନ କରିଥିଲେ।କାର୍ଯ୍ୟକ୍ରମର ଆଭିମୁଖ୍ୟ ସମ୍ପର୍କରେ ମାଇ ଭାରତର ସହକର୍ମୀ ସତ୍ୟବାନ ଦଳବେହେରା ଉପସ୍ଥିତ ମଞ୍ଚାସୀନ ରହି ଆଲୋକପାତ କରିବା ସହ ଶେଷରେ ଧନ୍ୟବାଦ ଅର୍ପଣ କରିଥିଲେ।
କଲେଜର ପ୍ରତିଷ୍ଠାତା ଡ. ସନ୍ତୋଷ କୁମାର ନାୟକ ଏବଂ କଲେଜର ସମସ୍ତ ଅଧ୍ୟାପକ ଅଧ୍ୟାପିକା, ଅଣକର୍ମଚାରୀଙ୍କ ସହଯୋଗରେ କାର୍ଯ୍ୟକ୍ରମଟି ସଫଳତାର ସହ ସମ୍ପନ୍ନ ହୋଇଥିଲା। ଏହି ଯୁବ ସଂସଦ କାର୍ଯ୍ୟକ୍ରମ ଯୁବପିଢ଼ିଙ୍କ ମଧ୍ୟରେ ରାଷ୍ଟ୍ରୀୟ ଚେତନା, ଗଣତାନ୍ତ୍ରିକ ସଚେତନତା ଓ ସାମାଜିକ ଦାୟିତ୍ୱବୋଧ ବୃଦ୍ଧି କରିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି।
ରିପୋର୍ଟର ଦୁତି କୃଷ୍ଣ ପଣ୍ଡା
