Garvita Odia
ପୁରୀ : ଚଳିତ ବର୍ଷ ଅଗଷ୍ଟ ଶେଷ ସୁଦ୍ଧା ଶ୍ରୀଜଗନ୍ନାଥ ମନ୍ଦିରର ୩ଟି ଯୋଜନା (କର୍ପସ ପାଣ୍ଠି, ଫାଉଣ୍ଡେସନ ପାଣ୍ଠି, ମନ୍ଦିର ପାଣ୍ଠି) ରେ ମୋଟ ୧୮୧୧ କୋଟି ୯ ଲକ୍ଷ ୫୮ ହଜାର ୨୮୩ ଟଙ୍କା ସ୍ଥାୟୀ ଜମା ଭାବେ ରଖାଯାଇଛି । ଏଥିମଧ୍ୟରୁ ବିଭିନ୍ନ ରାଷ୍ଟ୍ରାୟତ୍ତ ବ୍ୟାଙ୍କ ମାନଙ୍କରେ ୧୩୧୧ କୋଟି ୯ ଲକ୍ଷ ୫୮ ହଜାର ୨୮୩ ଟଙ୍କା ଏବଂ ଶ୍ରୀଜଗନ୍ନାଥ ମନ୍ଦିରର ପି.ଏଲ୍ ଆକାଉଣ୍ଟରେ ଓଡ଼ିଶା ସରକାରଙ୍କ ପ୍ରଦତ୍ତ ୫୦୦ କୋଟି ଟଙ୍କାର କର୍ପସ ପାଣ୍ଠି ରଖାଯାଇଛି ।
ଏତଦବ୍ୟତୀତ ଆଜି ତାରିଖରେ ଶ୍ରୀଜଗନ୍ନାଥ ମନ୍ଦିରର ବିଭିନ୍ନ ବ୍ୟାଙ୍କ ଆକାଉଣ୍ଟରେ (ସେଭିଙ୍ଗ୍ସ/ କରେଣ୍ଟ/ଫ୍ଲେକ୍ସି) ୧୦୦ କୋଟି ୭୦ ଲକ୍ଷ ୬୬ ହଜାର ୮୬୮ ଟଙ୍କା ରହିଛି । ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ବୁଧବାର ସୂଚନା ଦିଆ ଯାଇଛି । ଭକ୍ତ ମାନଙ୍କର ଦାନରାଶି ଏବଂ ମନ୍ଦିର ସମ୍ପତ୍ତିର ଠିକ୍ ପରିଚାଳନା ସମ୍ପର୍କରେ ଜନ ସାଧାରଣଙ୍କୁ ଅବଗତ କରାଇବା ପାଇଁ ଏହି ସୂଚନା ଦିଆଯାଇଛି ।
ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ କହିଛନ୍ତି ଯେ, ଚଳିତ ବର୍ଷ ଅଗଷ୍ଟ ଶେଷ ସୁଦ୍ଧା ଡିଜିଟାଲ ହୁଣ୍ଡି ‘ସମର୍ପଣ’ ଜରିଆରେ ୫୬ ଲକ୍ଷ ୭୦ ହଜାର ୭୦୫ ଟଙ୍କା ଦାନ ଦିଆଯାଇଛି । ଶ୍ରୀଜଗନ୍ନାଥ ମନ୍ଦିର ଆୟ ମୁଖ୍ୟତଃ ଭକ୍ତଙ୍କ ଦାନ, ଶ୍ରୀମନ୍ଦିର ଖଣିଖାଦାନ, ସ୍ଥାୟୀ ଜମାର ସୁଧ, ଜମି ବିକ୍ରି ଓ ଜମି ଅଧିଗ୍ରହଣ ଏବଂ ସରକାରୀ ଅନୁଦାନରୁ ମିଳିଥାଏ । ଏହି ଆୟର କିଛି ନିଦ୍ଦି ର୍ଷ୍ଟ ଅଂଶ କର୍ପସ ପାଣ୍ଠି ହିସାବରେ ଏବଂ ଅନ୍ୟ ଏକ ଅଂଶ ଫାଉଣ୍ଡେସନ ପାଣ୍ଠି ହିସାବରେ ସ୍ଥାୟୀ ଜମାରେ ରଖା ଯାଇଥାଏ । ଅବଶିଷ୍ଟ ଆୟ ମନ୍ଦିର ପାଣ୍ଠି ହିସାବରେ ରଖାଯାଇଥାଏ । ଶ୍ରୀମନ୍ଦିରର ଦୈନନ୍ଦିନ ଖର୍ଚ୍ଚ ଏହି ମନ୍ଦିର ପାଣ୍ଠିରୁ ହୋଇଥାଏ ଏବଂ ବଳକା ମନ୍ଦିର ପାଣ୍ଠି ଅର୍ଥକୁ ସ୍ଥାୟୀ ଜମା ହିସାବରେ ରଖାଯାଏ ।
ସୂଚନାଥାଉକି, ଶ୍ରୀମନ୍ଦିରକୁ ଭକ୍ତଙ୍କ ଦାନ ପରିମାଣ ପ୍ରତିବର୍ଷ ବଢ଼ିଚାଲିଛି । ୨୦୨୧-୨୨ରେ ହୁଣ୍ଡି, ବ୍ୟାଙ୍କ ଆକାଉଣ୍ଟ ଓ ଅନ୍ୟାନ୍ୟ ସୂତ୍ରରୁ ଯଥାକ୍ରମେ ୮ କୋଟି ୨୩ ଲକ୍ଷ ୧୩ ହଜାର ୧୨୭ ଟଙ୍କା, ୬ କୋଟି ୮୩ ଲକ୍ଷ ୩୧ ହଜାର ୯୬୧ ଟଙ୍କା ଓ ୨ କୋଟି ୨୫ ହଜାର ୩୧ ହଜାର ୪୯୭ ଟଙ୍କା ମିଳିଥିଲା । ୨୦୨୨-୨୩ରେ ଏହି ଦାନ ରାଶି ଯଥାକ୍ରମ ୧୫ କୋଟି ୪୬ ଲକ୍ଷ ୧୭ ହଜାର ୧୫୨ ଟଙ୍କା, ୩୦ କୋଟି ୭୨ ଲକ୍ଷ ୨୭ ହଜାର ୨୧୬ ଟଙ୍କା ଓ ୪ କୋଟି ୬୨ ଲକ୍ଷ ୩୪୩ ଟଙ୍କା ମିଳିଥିଲା । ୨୦୨୩-୨୪ରେ ଏହି ଦାନ ରାଶି ଯଥାକ୍ରମେ ୧୬ କୋଟି ୯୨ ଲକ୍ଷ ୩୬ ହଜାର ୯୪୭ ଟଙ୍କା, ୨୨ କୋଟି ୨୪ ଲକ୍ଷ ୩୯ ହଜାର ୯୧୮ ଟଙ୍କା ଓ ୮ ଲକ୍ଷ ୭୩ ହଜାର ୫୭ ହଜାର ୭୦୧ ଟଙ୍କା ମିଳିଥିଲା । ସେହିପରି ହୁଣ୍ଡି ଓ ଅନ୍ୟାନ୍ୟ ଉତ୍ସବରୁ ଦାନ ସୁନାର ପରିମାଣ ୨୦୨୧-୨୨ ମସିହାରେ ୩ କେଜି ୫୯ ଗ୍ରାମ ୭୪୦ ଗ୍ରାମ, ୨୦୨୨-୨୩ରେ ୩ କେଜି ୭୩୬ ଗ୍ରାମ ୮୯୪ ମିଲିଗ୍ରାମ, ୨୦୨୩ ୨୪ରେ ୫ କେଜି ୩୭ ଗ୍ରାମ ୭୯୦ ମିଲିଗ୍ରାମ ମିଳିଥିଲା ।
ସେହିପରି ଏହି ୩ ଆର୍ଥିକ ବର୍ଷରେ ହୁଣ୍ଡି ଓ ଅନ୍ୟାନ୍ୟ ଉତ୍ସରୁ ଆଦାୟ ରୁପା ପରିମାଣ ଯଥାକ୍ରମେ ୨୪ କେଜି ୮୩୪ ଗ୍ରାମ ୫୨୦ ମିଲିଗ୍ରାମ, ୧୦୮ କେଜି ୧୮୩ ଗ୍ରାମ ୧୦୫ ମିଲିଗ୍ରାମ ଓ ୮୧ କେଜି ୧୧୨ କେଜି ୧୦ ମିଲିଗ୍ରାମ ମିଳିଥିଲା । ଶ୍ରୀଜଗନ୍ନାଥ ମନ୍ଦିର ହୁଣ୍ଡିରୁ ପ୍ରାପ୍ତ ଅର୍ଥର ୧୦ ପ୍ରତିଶତ ଓ ଅନ୍ୟାନ୍ୟ ମାଧ୍ୟମରେ ଆସୁଥିବା ୫୦୦ ଟଙ୍କାରୁ କମ ଦାନ ଅର୍ଥକୁ ଶ୍ରୀମନ୍ଦିରର ଦୈନଦିନ କାର୍ଯ୍ୟରେ ବିନିଯୋଗ କରାଯାଉଛି । ସେହିପରି ବିଭିନ୍ନ ମାଧ୍ୟମରେ ଆସିଥିବା ସୁନା ଓ ରୁପା ଶ୍ରୀମନ୍ଦିରର ବିଭିନ୍ନ ଅଳଙ୍କାର ମରାମତି ଓ ନୀତିକାନ୍ତି ନିମନ୍ତେ ବ୍ୟବହାର ପରେ ସମସ୍ତ ବଳକା ସୁନା ଓ ରୁପାକୁ ଶ୍ରୀମନ୍ଦିର କିମ୍ବା ଶ୍ରୀମନ୍ଦିରର ବ୍ୟାଙ୍କ ଲକରରେ ମହଜୁଦ୍ ରଖାଯାଉଛି ।
