Garvita Odia
ଭୁବନେଶ୍ୱର: ରାଜ୍ୟ ସରକାର ଆଇପିଏସ ଅଧିକାରୀ ସ୍ତରରେ ଅଦଳବଦଳ କରିଛନ୍ତି । ଏନେଇ ମଙ୍ଗଳବାର ଗୃହ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ବ୍ରହ୍ମପୁର ଏସ୍ପି ଭାବେ କାର୍ଯ୍ୟ କରୁଥିବା ୨୦୧୫ ବ୍ୟାଚର ଆଇପିଏସ ଅଫିସର ସର୍ବଣା ବିବେକ ଏମ୍ ଙ୍କୁ ଭୁବନେଶ୍ବର ଡିସିପି ଭାବେ ନିଯୁକ୍ତ କରାଯାଇଛି । ଅବସରପ୍ରାପ୍ତ ଆଇପିଏସ୍ ଅଧିକାରୀ ଜଗମୋହନ ମୀନାଙ୍କ ସ୍ଥାନରେ ତାଙ୍କୁ ଏହି ଗୁରୁଦାୟିତ୍ବ ଦିଆଯାଇଛି । ସେହିପରି ଢେଙ୍କାନାଳ ଏସ୍ପି ଥିବା ୨୦୧୯ ବ୍ୟାଚର ଆଇପିଏସ ଅଫିସର ଅଭିନବ ସୋନକରଙ୍କୁ ବ୍ରହ୍ମପୁର ଏସ୍ପି ଭାବେ ବଦଳି କରାଯାଇଛି । ପାରାଦ୍ୱୀପ ଏଏସ୍ପି ଭାବେ କାର୍ଯ୍ୟ କରୁଥିବା ୨୦୨୨ ବ୍ୟାଚର ଆଇପିଏସ ଅଧିକାରୀ ଅଜିଙ୍କ୍ୟ ବି ମାନେଙ୍କୁ ଢେଙ୍କାନାଳ ଏସ୍ପି ଭାବେ ଅବସ୍ଥାପିତ କରାଯାଇଛି । ସେହିପରି ରାଜ୍ୟ ପୋଲିସ ହେଡକ୍ୱାର୍ଟରରେ ସହକାରୀ ଆରକ୍ଷୀ ଅଧୀକ୍ଷକ ଥିବା ୨୦୨୧ ବ୍ୟାଚର ଆଇପିଏସ ଅଧିକାରୀ ଏ.ବି. ଶିଳ୍ଫାଙ୍କୁ ବରଗଡ଼ ଏସ୍ଡିପିଓ ଭାବେ ବଦଳି କରାଯାଇଛି ।
ସର୍ବଣା ବିବେକଙ୍କ ଉପରେ ରାଜ୍ୟ ସରକାର ଭରସା କରି ବଡ଼ ଦାୟିତ୍ୱ ଦେଇଛନ୍ତି । ସର୍ବଣା ବିବେକ ବ୍ରହ୍ମପୁରରେ ଅପରାଧୀଙ୍କୁ ସାବାଡ଼ କରିବା ନେଇ ଚର୍ଚ୍ଚାକୁ ଆସିଥିଲେ । ଆଇନଜୀବୀ ପୀତବାସ ପଣ୍ଡା ହତ୍ୟା ଓ ବହୁ ଚର୍ଚ୍ଚିତ ଏସ୍ଆଇ ପରୀକ୍ଷା ଜାଲିଆତି ଘଟଣାର ପର୍ଦ୍ଦାଫାସ କରି ସେ ଚର୍ଚ୍ଚାକୁ ଆସିଥିଲେ । ରାଜଧାନୀର ଡିସିପି ଭାବେ ଦାୟିତ୍ୱ ତୁଲାଇବା ତାଙ୍କ ଆଗରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ରହିବ। । କାରଣ ଏଠାରେ ଆଇନଶୃଙ୍ଖଳା ପରିଚାଳନାଠାରୁ ଆରମ୍ଭ କରି ସଂଗଠିତ ଅପରାଧ, ଡ୍ରଗ୍ସ କାରବାର, ସାଇବର କ୍ରାଇମ୍, ଟ୍ରାଫିକ୍ ଓ ଭିଭିଆଇପିଙ୍କ କାର୍ଯ୍ୟକ୍ରମ ସମ୍ଭାଳିବା ସର୍ବଣା ବିବେକଙ୍କ ପାଇଁ ଚ୍ୟାଲେଞ୍ଜ ରହିବ ବୋଲି କୁହାଯାଉଛି ।
ଭୁବନେଶ୍ୱର ଡିସିପି ଭାବେ କାର୍ଯ୍ୟ କରୁଥିବା ୨୦୧୩ ବ୍ୟାଚର ଆଇପିଏସ୍ ଅଫିସର ଜଗମୋହନ ମୀନା ଇସ୍ତଫା ଦେବା ପରେ ଭୁବନେଶ୍ୱର ପୋଲିସ ମୁଖିଆ କିଏ ହେବ, ତାକୁ ନେଇ ଚର୍ଚ୍ଚା ଆଲୋଚନା ଜାରି ରହିଥିଲା । ୨୦୨୫ ମାର୍ଚ୍ଚ ୫ରେ ଭୁବନେଶ୍ୱର ଡିସିପି ଭାବେ କାର୍ଯ୍ୟ କରୁଥିବା ଜଗମୋହନ ବ୍ୟକ୍ତିଗତ କାରଣ ଦର୍ଶାଇ ଗତ ଜୁନରେ ରାଜ୍ୟ ସରକାରଙ୍କ ନିକଟରେ ଇସ୍ତଫା ପତ୍ର ଦାଖଲ କରିଥିଲେ । ରାଜ୍ୟ ସରକାର ଜଗମୋହନଙ୍କ ଇସ୍ତଫା ପତ୍ର ଗ୍ରହଣ କରିବା ସହ ଗୃହ ମନ୍ତ୍ରାଳୟକୁ ସୁପାରିସ କରିଥିଲେ ।
ଜଗମୋହନଙ୍କ ଇସ୍ତଫା ସେପ୍ଟେମ୍ବର ୧୧ରୁ କାର୍ଯ୍ୟକାରୀ ହୋଇଛି ବୋଲି ସେପ୍ଟେମ୍ବର ୧୭ରେ ଗୃହ ମନ୍ତ୍ରାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା । ତେବେ ଜଗମୋହନଙ୍କ ଇସ୍ତଫା ପଛରେ ଅତ୍ୟଧିକ ଚାପ ଓ କଡା ସମାଲୋଚନା ବୋଲି ଚର୍ଚ୍ଚା ହୋଇଥିଲା । କିଛି ମାସ ମଧ୍ୟରେ ରେଳବାଇ କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁ ହତ୍ୟା ଓ ଭିଡ ହିଂସା ଘଟଣାରେ କମିଶନରେଟ୍ ପୋଲିସ ଅଡୁଆରେ ପଡିଥିଲା । ପୋଲିସକୁ କଡା ସମାଲୋଚନା କରାଯାଇଥିଲା । ଏପରିକି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ଆଇନ ଶୃଙ୍ଖଳାକୁ ନେଇ ବୈଠକ କରି ଡିସିପି ମୀନାଙ୍କୁ କଡା ତାଗିଦ କରିଥିଲେ । ଏହି କାରଣ ଦୃଷ୍ଟିରୁ ହଠାତ୍ ମୀନା ଇସ୍ତଫା ନିଷ୍ପତ୍ତି ନେଇଥାପାରନ୍ତି ବୋଲି ଚର୍ଚ୍ଚା ହୋଇଥିଲା ।
