Garvita Odia
ଭୁବନେଶ୍ୱର: ହିଂଜିଳି… ନବୀନ ପଟ୍ଟନାୟକଙ୍କ ରାଜନୈତିକ ଗଡ଼। ଯେଉଁଠୁ ସେ ଲଗାତାର ୬ ଥର ବିଜୟୀ ହୋଇଛନ୍ତି। କିନ୍ତୁ ୨୦୨୪ ନିର୍ବାଚନ ପରେ ସତେ ଯେମିତି ହିଞ୍ଜିଳି ପାଇଁ ନିଖୋଜ ହୋଇଯାଇଛନ୍ତି ନବୀନ। ଦୁଇ ବର୍ଷରେ ମାତ୍ର ଥରଟିଏ ନିଜ ନିର୍ବାଚନମଣ୍ଡଳୀକୁ ଯାଇଛନ୍ତି। ଯାହାକୁ ନେଇ ଲୋକଙ୍କ ମଧ୍ୟରେ ପ୍ରଶ୍ନ ଯେତିକି, ଅସନ୍ତୋଷ ବି ସେତିକି। ଭୋଟର୍ କହିଲେଣି, ଭୋଟ୍ ନେଇ ଭୁଲିଗଲେ ନବୀନ। ସେପଟେ ବିଜେଡିର କହିବା କଥା, ଆସନ୍ତା ସେପ୍ଟେମ୍ବର କି ଅକ୍ଟୋବରରେ ନବୀନ ହିଞ୍ଜିଳି ଯାଉଛନ୍ତି।…
୨୦୨୪ ଡିସେମ୍ବର। ସାଧାରଣ ନିର୍ବାଚନର ପ୍ରାୟ ୬ ମାସ ପରେ ହିଞ୍ଜିଳି ଯାଇଥିଲେ ସ୍ଥାନୀୟ ବିଧାୟକ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ। ହିଞ୍ଜିଳି ଓ ଶେରଗଡ଼ ବ୍ଲକରେ ଅଦିନିଆ ବର୍ଷାରେ ନଷ୍ଟ ହୋଇଥିବା ଫସଲ କିଆରି ବୁଲି ଦେଖିଥିଲେ। ହେଲେ ତା ପରଠୁ ଆଉ ଗଞ୍ଜାମ ମାଟିରେ ପାଦ ପକାଇନାହାନ୍ତି ନବୀନ। ଦେଢ ବର୍ଷରୁ ଅଧିକ ସମୟ ହେଲା ନିଜ ବିଧାୟକଙ୍କୁ ଖୋଜୁଛନ୍ତି ହିଞ୍ଜିଳିବାସୀ। କହିଛନ୍ତି, ଭୋଟ ଦେଲୁ, କିନ୍ତୁ ବିଧାୟକଙ୍କୁ ଦେଖିବାକୁ ମିଳୁନି। କେବଳ ନବୀନଙ୍କ ଅନୁପସ୍ଥିତି ନୁହେଁ…ଉନ୍ନୟନ କାମ ନେଇ ବି ଉଠିଛି ପ୍ରଶ୍ନ। କାରଣ ହିଞ୍ଜିଳିରେ ଅନେକ ପ୍ରକଳ୍ପ ଅଧପନ୍ତରିଆ ହୋଇ ପଡ଼ିଥିବାବେଳେ ଯୋଜନା ବି ସଠିକ ଢଙ୍ଗରେ କାର୍ୟ୍ୟକାରୀ ହୋଇପାରୁନି।
ସମସ୍ୟା ଶୁଣିବାକୁ ବିଧାୟକଙ୍କର ଦେଖାଦର୍ଶନ ମିଳୁନି। କିଛି ଅଭିଯୋଗ କରିବାକୁ ହେଲେ ଭୁବନେଶ୍ବର ନବୀନ ନିବାସ ଯିବାକୁ ପଡ଼େ। ତା ପୁଣି ହାତରୁ ୫୦୦ ଟଙ୍କା ଖର୍ଚ୍ଚ କରି, ଆଉ ୫ଟି ଗେଟ୍ ଡେଇଁ। ଏପରିକି ନବୀନ ନିବାସର ଅନୁମତି ମିଳିବା ପରେ ଯାଇ ନବୀନଙ୍କୁ ଭେଟି ହୁଏ।
ଏପଟେ ଲୋକଙ୍କ ଅଭିଯୋଗ ନେଇ ରାଜନୈତିକ ଚର୍ଚ୍ଚା ଜୋର ଧରିଛି। ପ୍ରସଙ୍ଗକୁ ନେଇ ବିଜେଡିକୁ ଘେରିଛି ବିଜେପି । ଅଭିଯୋଗ ଆଣିଛି, ହିଂଜିଳିକୁ ଅବହେଳା କରାଯାଇଛି। ବିଜେପି ସରକାର ଆସିବା ପରେ ଲୋକଙ୍କ କାମ ହେଉଛି। ଜବାବରେ ବିଜେଡି କହିଛି, ହିଞ୍ଜିଳିବାସୀଙ୍କ ପାଇଁ ନବୀନ ନିବାସ ଦୁଆର ସବୁବେଳେ ଖୋଲା। ସେପଟେମ୍ୱର ଶେଷ କିମ୍ୱା ଅକଟୋବର ପ୍ରଥମ ସପ୍ତାହରେ ନବୀନ ହିଂଜିଳି ଆସିବା କାର୍ୟ୍ୟକ୍ରମ ରହିଛି।
୨୦୦୦ ମସିହାରୁ ନବୀନଙ୍କୁ ବିଧାୟକ ଭାବେ ନିର୍ବାଚିତ କରିଆସିଛି ହିଞ୍ଜିଳି। ଏଇଠୁ ନିର୍ବାଚିତ ହୋଇ ୫ ଥର ମୁଖ୍ୟମନ୍ତ୍ରୀ ହୋଇଛନ୍ତି ନବୀନ। ୨୦୨୪ ନିର୍ବାଚନରେ ପୂରା ଗଞ୍ଜାମ ବିଜେଡିକୁ ପ୍ରତ୍ୟାଖ୍ୟାନ କରିଥିବାବେଳେ କେବଳ ହିଞ୍ଜିଳିବାସୀ ହିଁ ନବୀନଙ୍କ ସମ୍ମାନ ରଖିଥିଲେ। ତେବେ ବିଜେଡି ସରକାରର ୨୪ ବର୍ଷରେ ହିଞ୍ଜିଳି-ଶେରଗଡ଼ ପାଇଁ ଅନେକ ଯୋଜନା ଆଜି ବି ଘୋଷଣାରେ ଅଟକି ରହିଛି।
ଗୋଟିଏ ପଟେ ବିକାଶ ବାଟବଣା ଓ ଅନ୍ୟପଟେ ବିଧାୟକଙ୍କର ଦେଖାଦର୍ଶନ ନମିଳିବାକୁ ନେଇ ଏକପ୍ରକାର ହତାଶ ହୋଇପଡ଼ିଛନ୍ତି ହିଞ୍ଜିଳିବାସୀ। ତେବେ ତମାମ ଅଭିଯୋଗ ନେଇ ନବୀନଙ୍କର କୌଣସି ପ୍ରତିକ୍ରିୟା ମିଳିପାରିନି।
