ଆଜି ଦେଶକୁ ମିଳିବ ନୂଆ ଉପରାଷ୍ଟ୍ରପତି; କାହାର ରହିଛି କେତେ ଶକ୍ତି ?

ନୂଆଦିଲ୍ଲୀ: ଆଜି ଦେଶକୁ ମିଳିବ ନୂଆ ଉପରାଷ୍ଟ୍ରପତି । ଉପରାଷ୍ଟ୍ରପତି ନିର୍ବାଚନ ପାଇଁ ସବୁ ପ୍ରସ୍ତୁତି ଶେଷ ହୋଇଛି । ଆଜି ଭୋଟ୍ ଗ୍ରହଣ ସହ ଭୋଟ ଗଣନା ମଧ୍ୟ ହେବ । ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (NDA) ପ୍ରାର୍ଥୀ ସିପି ରାଧାକ୍ରିଷ୍ଣନ୍ ଏବଂ ଇଣ୍ଡିଆ ବ୍ଲକ ପ୍ରାର୍ଥୀ ଜଷ୍ଟିସ୍ (ଅବସରପ୍ରାପ୍ତ) ବି. ସୁଦର୍ଶନ ରେଡ୍ଡୀଙ୍କ ମଧ୍ୟରେ ସିଧାସଳଖ ପ୍ରତିଦ୍ୱନ୍ଦ୍ୱିତା ହେଉଛି । ଏହି ନିର୍ବାଚନରେ ​​ଉଭୟ ଲୋକସଭା ଏବଂ ରାଜ୍ୟସଭାରୁ ମୋଟ 782 ଜଣ ସାଂସଦ ଉଭୟ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିବେ ।ସମ୍ବିଧାନର ଧାରା 66 (1) ଅନୁଯାୟୀ, ଭାରତର ଉପରାଷ୍ଟ୍ରପତି ଏକ ନିର୍ବାଚିତ କଲେଜ ଦ୍ୱାରା ନିର୍ବାଚିତ ହୁଅନ୍ତି । ଦେଶର ଦ୍ୱିତୀୟ ସର୍ବୋଚ୍ଚ ପଦବୀ ପାଇଁ ଭୋଟ୍ ଆଜି (ମଙ୍ଗଳବାର) ସକାଳ 10ଟାରେ ସଂସଦ ଭବନରେ ଆରମ୍ଭ ହେବ । ସନ୍ଧ୍ୟା 5ଟା ଯାଏଁ ଚାଲିବ ଭୋଟ ଗ୍ରହଣ । ଧାରା 324 ଅନୁଯାୟୀ ଭାରତୀୟ ନିର୍ବାଚନ କମିଶନ (ECI) ଉପରାଷ୍ଟ୍ରପତି ପଦ ପାଇଁ ନିର୍ବାଚନ ପରିଚାଳନା କରିବେ ।
ନିର୍ବାଚନ କମିଶନର ଜଣେ ବରିଷ୍ଠ ଅଧିକାରୀ କହିଛନ୍ତି, “ମଙ୍ଗଳବାର ଅନୁଷ୍ଠିତ ହେବାକୁ ଥିବା ଉପରାଷ୍ଟ୍ରପତି ନିର୍ବାଚନ ପାଇଁ ସମସ୍ତ ପ୍ରସ୍ତୁତି ଶେଷ ହୋଇଛି । ମୋଟ 782 ଜଣ ସଦସ୍ୟ (ଲୋକସଭା ଏବଂ ରାଜ୍ୟସଭା ଉଭୟରୁ) ଭୋଟ ଦେବେ । ସଂସଦ ଭବନର ବସୁଧାରେ ଥିବା କୋଠରୀ ନମ୍ବର F-101 ରେ ସକାଳ 10 ଟାରୁ ସନ୍ଧ୍ୟା 5 ଟା ପର୍ଯ୍ୟନ୍ତ ବାଲଟ୍ ପେପର ମାଧ୍ୟମରେ ଭୋଟ୍ ଗ୍ରହଣ କରାଯିବ । ଭୋଟ୍ ଗଣନା ସନ୍ଧ୍ୟା 6ଟାରୁ ଆରମ୍ଭ ହେବ ଏବଂ ତା’ପରେ ଫଳାଫଳ ଘୋଷଣା କରାଯିବ ।”
ବରିଷ୍ଠ ନିର୍ବାଚନ ଅଧିକାରୀଙ୍କ କହିବା ଅନୁସାରେ “ଏକ ସମୟରେ 6 ଜଣ ସଦସ୍ୟ ଭୋଟ୍ ଦେବା ପାଇଁ କୋଠରୀରେ ପ୍ରବେଶ କରିପାରିବେ । ଏଠାରେ 6ଟି କ୍ୟାବିନ୍ କରାଯାଇଛି । ସେଠାରେ ସେମାନେ ନିଜ ନିଜ ବାଲଟ୍ ପେପରରେ ଭୋଟ ଦେଇ ଏହାକୁ ବାଲଟ୍ ବାକ୍ସରେ ପକାଇବେ ।” ପୂର୍ବତନ ଲୋକସଭା ମହାସଚିବ ପି ଡି ଟି ଆଚାରୀ ଇଟିଭି ଭାରତକୁ କହିଛନ୍ତି, “ଏହି ପ୍ରକ୍ରିୟା ସାଧାରଣ ନିର୍ବାଚନ ସହିତ ସମାନ । ସାଧାରଣ ନିର୍ବାଚନରେ ​​ଇଲେକ୍ଟ୍ରୋନିକ୍ ଭୋଟିଂ ମେସିନ୍ (ଇଭିଏମ୍) ବ୍ୟବହାର କରାଯାଏ, ଏଠାରେ ବାଲଟ୍ ପେପର୍ ବ୍ୟବହାର କରାଯାଏ । ଏଠାରେ ଭୋଟରମାନେ ସାଧାରଣ ଜନତା ନୁହନ୍ତି, ଉଭୟ ଗୃହର ସାଂସଦ ଅଟନ୍ତି ।”ପୂର୍ବତନ ଲୋକସଭା ସଚିବ ମହାସଚିବ କହିଛନ୍ତି, “ପ୍ରାର୍ଥୀଙ୍କ ପ୍ରତିନିଧି ନିର୍ବାଚନ ଅଧିକାରୀଙ୍କ ସହିତ ମତଦାନ କେନ୍ଦ୍ରରେ ଉପସ୍ଥିତ ରହିପାରିବେ । ସେମାନେ ଭୋଟ ପ୍ରକ୍ରିୟା ଉପରେ ନଜର ରଖିବେ । ଯଦି କିଛି ଅନିୟମିତତା ହୁଏ, ତେବେ ସେମାନେ ଏହାର ପ୍ରତିବାଦ କରିବେ ଏବଂ ଏହାକୁ ନିର୍ବାଚନ ଅଧିକାରୀଙ୍କ ଦୃଷ୍ଟିକୁ ଆଣିବେ । ନିର୍ବାଚନ କମିଶନ ପର୍ଯ୍ୟବେକ୍ଷକମାନେ ମଧ୍ୟ ସେଠାରେ ଉପସ୍ଥିତ ରହିବେ । ସେମାନେ ସମଗ୍ର ପ୍ରକ୍ରିୟା ଉପରେ ନଜର ରଖନ୍ତି ।”ଲୋକସଭାରେ ଏନଡିଏର ୨୯୩ ଏବଂ ବିରୋଧୀ ଦଳର ୨୩୪ ସଦସ୍ୟ ଅଛନ୍ତି । ସେହିପରି ରାଜ୍ୟସଭାରେ ଯଥାକ୍ରମେ ୧୩୨ ଏବଂ ୭୭ ସଦସ୍ୟ ଅଛନ୍ତି । ଉପରାଷ୍ଟ୍ରପତି ନିର୍ବାଚନ ପୂର୍ବରୁ ବିଜେପି ଦିଲ୍ଳୀରେ ରବିବାର ଦୁଇ ଦିନିଆ କର୍ମଶାଳା ଆରମ୍ଭ କରିଥିଲା । ସେହିପରି ସୋମବାର, ସଂସଦର କେନ୍ଦ୍ରୀୟ ହଲରେ ଇଣ୍ଡିଆ ବ୍ଲକ୍ ସାଂସଦମାନଙ୍କର ଏକ ବୈଠକ ଅନୁଷ୍ଠିତ ହୋଇଥିଲା ।

ଏଠି କହିରଖିବୁ, ଜୁଲାଇରେ ଜଗଦୀପ ଧନଖଡ ତାଙ୍କ ପଦରୁ ଇସ୍ତଫା ଦେଇଥିଲେ । ସ୍ୱାସ୍ଥ୍ୟଗତ କାରଣ ଦର୍ଶାଇ ଜଗଦୀପ ଧନଖଡ, ଜୁଲାଇ 21 ତାରିଖରେ ଉପରାଷ୍ଟ୍ରପତି ପଦବୀ ଛାଡିଥିଲେ । ଏହା ପରେ ଉପରାଷ୍ଟ୍ରପତି ପଦବୀ ଖାଲି ପଡ଼ିଥିଲା । ଧନଖଡ ଅଗଷ୍ଟ 2022ରେ ଦାୟିତ୍ୱ ଗ୍ରହଣ କରିଥିଲେ ଏବଂ ତାଙ୍କର କାର୍ଯ୍ୟକାଳ 2027 ପର୍ଯ୍ୟନ୍ତ ଥିଲା । ମାତ୍ର କାର୍ଯ୍ୟକାଳ ଶେଷ ହେବାର 2 ବର୍ଷ ପୂର୍ବରୁ ସେ ଇସ୍ତଫା ଦେଇଥିଲେ ।