Garvita Odia
ଭୁବନେଶ୍ୱର: ଭୁବନେଶ୍ୱର ମହାନଗର ନିଗମ (ବିଏମ୍ ସି) ଡାକ୍ତରଖାନାରେ ସରକାରଙ୍କ ତରଫରୁ ଚାଲିଥିବା ଏଚ୍.ପି.ଭି ଟୀକାକରଣ ସଫଳତାର ସହ ଅନୁଷ୍ଠିତ ହୋଇଯାଇଛି । ଜରାୟୁ ଗ୍ରୀବା କର୍କଟ ରୋଗରୁ ଏଚ୍.ପି.ଭି ଟୀକାର ଗୋଟିଏ ମାତ୍ର ଡୋଜ୍ ସଂପୂର୍ଣ୍ଣ ସୁରକ୍ଷା ପ୍ରଦାନ କରିଥାଏ । ବର୍ତ୍ତମାନ ଏହି ଟୀକା ସରକାରଙ୍କ ନିୟମ ଅନୁଯାୟୀ 14-15 ବର୍ଷର ବାଳିକାମାନଙ୍କ ପାଇଁ ସରକାରୀ ସ୍ୱାସ୍ଥ୍ୟ କେନ୍ଦ୍ରଗୁଡିକରେ ବିନା ମୂଲ୍ୟରେ ଉପଲବ୍ଧ । ବର୍ତ୍ତମାନ ସୁଦ୍ଧା ବିଏମ୍ ସି ଅଂଚଳରେ ପାଖାପାଖି 1 ହଜାର ବାଳିକା ଏହି ଟୀକା ନେଇସାରିଛନ୍ତି । ଆଜି ଗୋଟିଏ ଦିନରେ 110 ଜଣ ବାଳିକା ବିଭିନ୍ନ ଡାକ୍ତରଖାନାରେ ଟୀକା ନେଇଥିବା ବେଳେ କେବଳ ବିଏମ୍ ସି ହସ୍ପିଟାଲରେ 84 ଜଣ ବାଳିକା ଟୀକା ନେଇଛନ୍ତି ।
ଆଜି ସ୍ଥାନୀୟ ଡିଏଭି ପବ୍ଲିକ୍ ସ୍କୁଲ ପୋଖରୀପୁଟଠାରେ 84 ଜଣ ଛାତ୍ରୀ ଏହି ଟୀକାକରଣ କାର୍ଯ୍ୟକ୍ରମରେ ଅଂଶ ଗ୍ରହଣ କରି ଏଚ୍.ପି.ଭି ଟୀକା ନେଇଛନ୍ତି ଏବଂ ଜରାୟୁ ଗ୍ରୀବା କର୍କଟ ରୋଗରୁ ନିଜକୁ ସୁରକ୍ଷା ଦେଇଛନ୍ତି । ବିଏମ୍ ସି ଡାକ୍ତରଖାନାର ମୁଖ୍ୟ ଚିକିତ୍ସା ଅଧିକାରୀ ଡାକ୍ତର ସିଦ୍ଧାର୍ଥ ଶଙ୍କର ରାୟ ନିଜେ କାର୍ଯ୍ୟକ୍ରମରେ ଉପସ୍ଥିତ ରହି ଛାତ୍ରୀମାନଙ୍କୁ ଏଚ୍.ପି.ଭି. ଟୀକାର ଉପକାରିତା ସଂପର୍କରେ ପୁଙ୍ଖାନୁପୁଙ୍ଖ ବୁଝାଇଥିଲେ । ସହରାଞ୍ଚଳ ସ୍ୱାସ୍ଥ୍ୟ ମିଶନ ପକ୍ଷରୁ ମଧ୍ୟ ଏ ସଂପର୍କରେ ଲୋକମାନଙ୍କୁ ସଚେତନ କରାଯାଉଛି ।
କାର୍ଯ୍ୟକ୍ରମରେ ସିପିଏମ୍ ଏଲିନା ମହାପାତ୍ର, ଏପିଏମ୍ ସନ୍ତୋଷ ମିଶ୍ର, ପ୍ରମୁଖ ଉପସ୍ଥିତ ଥିଲେ । ବିଏମ୍ ସି ଡାକ୍ତରଖାନାର ମହିଳା ସ୍ୱାସ୍ଥ୍ୟକର୍ମୀ ଓ ଆଇଏଲଆର ଇନଚାର୍ଜ ସମସ୍ତ ବାଳିକାଙ୍କୁ ଟୀକା ଦେଇଥିଲେ । ୟୁଡିଏମ୍ ଆକାଉଣ୍ଟାଣ୍ଟ ଓ ଏମ୍ଆର୍ ଏ ପ୍ରମୁଖ କମ୍ପ୍ୟୁଟର ମାଧ୍ୟମରେ ପଞ୍ଜିକରଣ କରାଇଥିଲେ । ଏହି ସମସ୍ତ କାର୍ଯ୍ୟକ୍ରମକୁ ଜନସ୍ୱାସ୍ଥ୍ୟ ପରିଚାଳକ ରଣଜିତ୍ ସ୍ୱାଇଁ ସଫଳତାର ସହ ପରିଚାଳନା କରିଥିଲେ ।
