ଓଡ଼ିଶା ମାଟି ତଳେ ଲୁଚିଛି ବହୁମୂଲ୍ୟ ହୀରା

୧୯/୦୩/୨୦୨୬:ଆଜି ବିଧାନସଭାରେ ଖଣି ମନ୍ତ୍ରୀ ସଂପର୍କିତ ତଥ୍ୟ ରଖିବା ପରେ, ଓଡ଼ିଶାର ଗାଁରେ ମିଳିଛି ହୀରାର ସନ୍ଧାନ। ମାଟି ତଳେ ଲୁଚିଛି ବହୁମୂଲ୍ୟ ହୀରା । ନୂଆପଡ଼ା ଜିଲ୍ଲା ସଦର ବ୍ଲକ୍ ଅନ୍ତର୍ଗତ କଲମିଦାଦର । ଯେଉଁଠି ବହୁ ବର୍ଷ ତଳେ ମିଳିଥିଲା ହୀରା ଖଣିର ସନ୍ଧାନ । ଆଜି ବିଧାନସଭାରେ ଖଣି ମନ୍ତ୍ରୀ ବିଭୁତି ଭୂଷଣ ଜେନା ଏଠାକାର ହୀରା ପଥର ପ୍ରସଙ୍ଗରେ ଉତ୍ତର ରଖିବା ପରେ, ଏହି ଗାଁରେ ପହଞ୍ଚିଥିଲା କନକ ନ୍ୟୁଜ୍ । ୨୦୦୨-୦୩ ମସିହା ବେଳକୁ ଖଣି ବିଭାଗ ପକ୍ଷରୁ ଏହି ଅଞ୍ଚଳରେ ସର୍ଭେ ହେବା ସହ, କ୍ୟାମ୍ପ୍ ଲଗାଯାଇ ଖୋଳାଖୋଳି ଓ ଭୂତଳ ନମୁନା ସଂଗ୍ରହ ପାଇଁ ଡ୍ରିଲିଂ ହୋଇଥିଲା । କେବଳ ନୂଆପଡ଼ାରେ ହୀରା ନୁହେଁ, କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକର ହିଞ୍ଜିଳିବାହାଲ-ଜିଲିଙ୍ଗିବାର ଠାରେ ମାଣିକ ଥିବା ଚିହ୍ନଟ ହୋଇଛି । ଦେବଗଡ଼ ଜିଲ୍ଲାର ରିଆମାଳ ବ୍ଲକ ଅନ୍ତର୍ଗତ ଆଦାସ-ରାମପାଲ୍ଲୀ ଅଞ୍ଚଳରେ ତମ୍ବାବାହୀ ପଥର, ଗ୍ରାଫାଇଟ୍, ନିକେଲ ସହିତ ସୁନା ଥିବା ଜଣାପଡ଼ିଛି । ମୟୂରଭଞ୍ଜ ଜିଲ୍ଲାର କୁଳିଅଣା ବ୍ଲକ ଅନ୍ତର୍ଗତ ମଦନାସାହି-କାଞ୍ଜିଆ ଅଞ୍ଚଳରେ ତମ୍ବାବାହୀ ପଥର ସହିତ ସୁନା ଥିବା ଆକଳନ ହୋଇଛି । କେନ୍ଦୁଝର ଜିଲ୍ଲାର ବାଂଶପାଳ ବ୍ଲକ ଅନ୍ତର୍ଗତ ଗୋପୁର-ଜଳଡ଼ିହି ଅଞ୍ଚଳରେ ସୁନାପଥର ଥିବାର ସନ୍ଧାନ ମିଳିଛି ।
ଏହାପରେ ଗାଁ ଲୋକେ ମଧ୍ୟ ସେହି ଖୋଳାଯାଇଥିବା ସ୍ଥାନରୁ ଅଳ୍ପ କିଛି ହୀରା ପାଇଥିବା ଚର୍ଚ୍ଚା ହୋଇଥିଲା । ପରେ ପ୍ରଶାସନର କଟକଣା ସହ ସେହି ଅଞ୍ଚଳରେ ସର୍ଭେ କାମ କିଛି ବର୍ଷ ହେବ ବନ୍ଦ ରହିଛି । ତେବେ ଆଜି ପୁଣି ସରକାର ହୀରା ଖଣି ପ୍ରସଙ୍ଗ ଉଠାଇବା ସହ ଏହାର ବୈଷୟିକ, ଅର୍ଥନୈତିକ ଓ ଅନ୍ୟାନ୍ୟ ଆନୁଷଙ୍ଗିକ ମୂଲ୍ୟାୟନ କାର୍ଯ୍ୟ ଚାଲୁଅଛି ବୋଲି ଜଣାଇଛନ୍ତି । ଫଳରେ ଚାଷବାସ କରି ଚଳୁଥିବା ଏହି ଲୋକଙ୍କ ମନରେ ନୂଆ ଆଶା ସଞ୍ଚାର ହୋଇଛି ।