Garvita Odia
ଭୁବନେଶ୍ୱର: ନିଟ୍ ପେପର ଲିକକୁ ନେଇ ଗତକାଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେବା ପରେ ରାଜ୍ୟ ରାଜନୀତିରେ ଝଡ ଉଠିଛି l କେନ୍ଦ୍ରରେ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ପରେ ରାଜ୍ୟରେ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବି କରିଛନ୍ତି ଉଭୟ ବିଜେଡି ଓ କଂଗ୍ରେସ l ପାଠ୍ୟ ପୁସ୍ତକରେ ହୋଇଥିବା ବ୍ୟାପକ ତ୍ରୁଟି ପାଇଁ ରାଜ୍ୟ ଗଣ ଶିକ୍ଷାମନ୍ତ୍ରୀ ତୁରନ୍ତ ଇସ୍ତଫା ଦେବା ଦାବିରେ ଅଡି ବସିଛନ୍ତି ଉଭୟ ବିରୋଧୀ । ଏଥିପାଇଁ 7 ଦିନର ଅଲଟିମେଟମ୍ ଦେଇଛି କଂଗ୍ରେସ ।
ବିଜେଡ଼ି ବିଧାୟକ ପ୍ରଦୀପ ଦିଶାରୀ କହିଛନ୍ତି, ଧର୍ମେନ୍ଦ୍ର ପ୍ରଧାନ ବହୁ ପୂର୍ବରୁ ଇସ୍ତଫା ଦେବା କଥା । ଇସ୍ତଫା ଦେବାରେ ବହୁତ ବିଳମ୍ବ ହୋଇଛି । ଜନ୍ତରମନ୍ତରରେ ଆନ୍ଦୋଳନ କରୁଥିବା ଯୁବଗୋଷ୍ଠୀଙ୍କୁ ପୋଲିସ ଲଗାଇ ମାଡ଼ ମାରିଲେ ସରକାର । ଫଳରେ ଆନ୍ଦୋଳନ ସବୁ ରାଜ୍ୟ ଓ ଜିଲ୍ଲା ସ୍ତରକୁ ବ୍ୟାପିଲା । ଆନ୍ଦୋଳନ ଏତେ ବ୍ୟାପକ ହେଲା ଯେ, ବାଧ୍ୟ ହୋଇ ଧର୍ମେନ୍ଦ୍ର ଇସ୍ତଫା ଦେଇଛନ୍ତି । ସେହିଭଳି ଓଡ଼ିଶାର ଗଣଶିକ୍ଷା ମନ୍ତ୍ରୀ ବି ଇସ୍ତଫା ଦେବା କଥା। ହେଲେ ଗଣତନ୍ତ୍ରକୁ ବିରୋଧ କରୁଛି ବିଜେପି । ବହିରେ ଏତେ ବଡ ତ୍ରୁଟି ହେଲା, କିନ୍ତୁ ସରକାରଙ୍କର ଖାତିର ନାହିଁ । ଏତେ ବଡ଼ ଭୁଲ କେବେ ଓଡ଼ିଶାରେ ହୋଇ ନଥିଲା। ଲୋକଙ୍କ ରାଜସ୍ୱ ନଷ୍ଟ ହେଲା। ପିଲାଙ୍କ ଭବିଷ୍ୟତ ଅନ୍ଧାର ହେଲା । ଉତ୍ତର ଦାୟିତ୍ୱ ନେଇ ଗଣଶିକ୍ଷା ମନ୍ତ୍ରୀ ଇସ୍ତଫା ଦେବା କଥା’ ବୋଲି କହିଛନ୍ତି ବିଜେଡି ବିଧାୟକ ।
ଅନ୍ୟପକ୍ଷେ ପେପର ଲିକ, ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଇତ୍ୟାଦି ପ୍ରସଙ୍ଗକୁ ନେଇ ସରକାରଙ୍କୁ ଘେରିଛି କଂଗ୍ରେସ l ଜେନ-ଜି ଆନ୍ଦୋଳନ ପରେ ବିଜେପିର କାଉଣ୍ଟ ଡାଉନ ଆରମ୍ଭ ହେଲା ବୋଲି କହିଛନ୍ତି ପିସିସି ସଭାପତି ଭକ୍ତ ଦାସ l ଭକ୍ତ କହିଛନ୍ତି, ‘ଗରିବଙ୍କ ପାଇଁ ଥିବା ଯୋଜନାକୁ ବନ୍ଦ କରିଛି ବିଜେପି ସରକାର। ଲୋକ ଭୟରେ କିଛି କହୁ ନଥିଲେ। ଯୁବ ସମାଜ ନୂଆ ଆଶା ଦେଖାଇଲା । ଯୁବଗୋଷ୍ଠୀଙ୍କୁ ଅଣଦେଖା କରିବା ବିଜେପିକୁ ମହଙ୍ଗା ପଡିଲା । ଆଜି ଦେଶର ରାଜନୀତି ବଦଳାଇ ଦେଲେ ଏହି ଯୁବଗୋଷ୍ଠୀ । ପିଲାମାନଙ୍କ ପ୍ରତି ଅନ୍ୟାୟ ହୋଇଛି । ଏହାକୁ ପିଲା କାହିଁକି ସହିବେ ? ବିଜେପିର ଏବେ କାଉଣ୍ଟ ଡାଉନ ଆରମ୍ଭ ହେଲା। ଧର୍ମେନ୍ଦ୍ର ପ୍ରାଧାନ ଖୁସିରେ ଇସ୍ତଫା ଦେଇ ନାହାନ୍ତି। ଚାପରେ ଦେଇଛନ୍ତି । ଏବେ କେନ୍ଦ୍ରରେ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେବା ପରେ ରାଜ୍ୟରେ ଗଣଶିକ୍ଷା ମନ୍ତ୍ରୀ ମଧ୍ୟ ଇସ୍ତଫା ଦେବା ଉଚିତ’ ବୋଲି କହିଛନ୍ତି ପିସିସିି ସଭାପତି । ପିସିସି ସଭାପତି ଆହୁରି କହିଛନ୍ତି, ‘7 ଦିନ ଭିତରେ ଗଣଶିକ୍ଷା ମନ୍ତ୍ରୀ ଇସ୍ତଫା ନ ଦେଲେ ଆଗାମୀ ଦିନରେ ଓଡ଼ିଶା ବନ୍ଦ ହେବ l’
ପିସିସି ସଭାପତି କହିଛନ୍ତି, ‘ରାଜ୍ୟରେ ଗଣଶିକ୍ଷା ମନ୍ତ୍ରୀ ଇସ୍ତଫା ଦେବା ଉଚିତ। 7 ଦିନ ଭିତରେ ଯଦି ସରକାର କାର୍ଯ୍ୟାନୁଷ୍ଠାନ ନ ନେଲେ ଆଗାମୀ ଦିନରେ ଓଡ଼ିଶା ବନ୍ଦ ହେବ। ରାଜ୍ୟର ଜେନ-ଜି ଆନ୍ଦୋଳନ ହେଲେ ତାଙ୍କ ସହ ରାଜ୍ୟ କଂଗ୍ରେସ ଠିଆ ହେବ। ତାଙ୍କର ସବୁ ଖର୍ଚ୍ଚ ବହନ କରିବ। ରାଜ୍ୟରେ ଆଗକୁ ବ୍ୟାପକ ଜେନ୍ ଜି ଆନ୍ଦୋଳନ ହେବ।’
