Garvita Odia
ଅତାବିରା: ଅତାବିରା ଥାନା ସରଣ୍ଡା ଗେଟ ପାଖ ୫୩ ନମ୍ବର ଜାତୀୟ ରାଜପଥରେ ସୋମବାର ରାତ୍ରି ୮ଟାରେ ଏକ ସଡ଼କ ଦୁର୍ଘଟଣା ଘଟିଛି। ଏଥିରେ ୨ ଜଣ ଯୁବକଙ୍କ ମୃତ୍ୟୁ ହୋଇଛି। ସେମାନେ ହେଲେ ସମ୍ବଲପୁର ଜିଲା ଯୁଯୁମୁରା ଥାନା ଡୁଙ୍ଗୁରିପଡାର ସୌମ୍ୟ ରଞ୍ଜନ ଖମାରୀ (୨୪) ଏବଂ ସମ୍ବଲପୁର ସଦର ଥାନା ଅଞ୍ଚଳର ଗୋପବନ୍ଧୁ ପରିଡ଼ା (୩୩)।
ବରଗଡ଼ – ସମ୍ବଲପୁର ୫୩ ନମ୍ବର ଜାତୀୟ ରାଜପଥର ସରଣ୍ଡା ଗେଟ ପାଖରେ ଏକ ଟ୍ରକ୍ (ନଂ-ଓଡ଼ି୦୫ପି /୭୬୦୫) କୌଣସି କାରଣରୁ ଅଚଳ ହୋଇ ରାସ୍ତା ମଝିରେ ଛିଡ଼ା ହୋଇଥିଲା। ଜାତୀୟ ରାଜପଥ ସୁରକ୍ଷା ଦାୟିତ୍ୱରେ ଥିବା ଟୋଲଗେଟ ରାସ୍ତା ମଝିରେ ଠିଆ ହୋଇଥିବା ଟ୍ରକ ପାଖରେ କୌଣସି ସୂଚନା ଫଳକ ବା ସ୍ପିଡ଼ ବ୍ରେକର ଲଗାଇ ନ ଥିଲେ। ଫଳରେ ସେହି ରାସ୍ତା ଦେଇ ଯାଉଥିବା ଏକ ବାଇକ୍ (ନଂ-ଓଡ଼ି୧୫ଏସ /୫୦୬୭) ଅଟକି ରହିଥିବା ଟ୍ରକ୍ ପଛରେ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଥିଲା।
ଫଳରେ ବାଇକ୍ରେ ଥିବା ୨ ଜଣ ଯୁବକ ଘଟଣାସ୍ଥଳରେ ହିଁ ପ୍ରାଣ ହରାଇ ଦେଇଥିଲେ। ସେମାନଙ୍କୁ ଅତାବିରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲେ ମଧ୍ୟ ସେଠାରେ ଡାକ୍ତର ଯୁବକ ଦ୍ବୟଙ୍କୁ ମୃତ ଘୋଷଣା କରିଥିଲେ। ଏ ନେଇ ଅତାବିରା ଥାନାରେ ଏକ ମାମଲା ରୁଜୁ କରି ଟ୍ରକ୍ ଓ ବାଇକ୍କୁ ଜବତ କରାଯାଇଛି। ମୃତଦେହକୁ ପୋଲିସ ଜବତ କରିଛି।
