Garvita Odia
ରାୟଗଡ଼ା : ରାୟଗଡ଼ା ଜିଲା ନିୟମଗିରି ସୁରକ୍ଷା ସମିତିର ନେତା ଲଦ ସିକକାଙ୍କୁ ଲାଞ୍ଜିଗଡ଼ ମୁନସିଫ୍ କୋର୍ଟ ପଳାତକ ଘୋଷଣା କରିବା ସହିତ ତାଙ୍କର ସବୁ ସମ୍ପତ୍ତି ବାଜ୍ୟାପ୍ତି ପାଇଁ କଲ୍ୟାଣସିଂହପୁର ଥାନା ଅଧିକାରୀଙ୍କୁ ନିର୍ଦେଶ ଦେଇଛନ୍ତି। ୨୦୧୭ ମସିହାର ଏକ ମାମଲାର ବିଚାର କରି ଏହି ରାୟ ଦିଆଯାଇଛି। ସୂଚନା ଅନୁଯାୟୀ, ଲଦଙ୍କ ବିରୋଧରେ ଆପରାଧିକ ଆଇନର ଧାରା ୭ ତଥା ଭାରତୀୟ ଦଣ୍ଡ ସଂହିତାର ବିଭିନ୍ନ ଦଫାରେ ଆପରାଧିକ ମାମଲା ରୁଜୁ ହୋଇଥିଲା। ଲାଖପଦର ଗ୍ରାମର ଲଦ ସିକକା ଡଙ୍ଗରିଆ କନ୍ଧ ଜନଜାତି ବର୍ଗର। ସେ ବହୁ ଦିନଧରି ନିୟମଗିରି ଓ ଜଙ୍ଗଲ ସୁରକ୍ଷା ନିମନ୍ତେ ସଂଗ୍ରାମ କରିବା ସହିତ ନିୟମଗିରି ସୁରକ୍ଷା ସମିତିର ଆବାହକ ଭାବେ କାର୍ଯ୍ୟ କରୁଛନ୍ତି। ଅପରପକ୍ଷେ ଅନେକ ସାମାଜିକ କର୍ମୀ ଏହି ରାୟକୁ ବିରୋଧ କରିଛନ୍ତି। ନିୟମଗିରିରେ ବସବାସ କରୁଥିବା କନ୍ଧ ଜନଜାତିର ଲୋକଙ୍କ ଜୀବନଜୀବିକା ପାଇଁ ଲଢ଼େଇ କରୁଥିବା ଲଦ ସିକକାଙ୍କୁ ପଳାତକ ଘୋଷଣା ତଥା ତାଙ୍କ ସମ୍ପତ୍ତି ବାଜ୍ୟାପ୍ତି ଆଦେଶ ବ୍ୟବସ୍ଥାଗତ ଅନ୍ୟାୟ ବୋଲି ବିଶିଷ୍ଟ ସାମାଜିକ କର୍ମୀ ନରେନ୍ଦ୍ର ମହାନ୍ତି କହିଛନ୍ତି। ଉଚ୍ଚ ନ୍ୟାୟାଳୟ ତୁରନ୍ତ ଏହି ମାମଲାରେ ହସ୍ତକ୍ଷେପ କରିବା ଶ୍ରୀ ସିକକାଙ୍କୁ ନ୍ୟାୟ ପ୍ରଦାନ ପାଇଁ ବିଶିଷ୍ଟ ପରିବେଶବିତ୍ ପ୍ରଫୁଲ୍ଲ ସାମନ୍ତରା ଦାବି କରିଛନ୍ତି।
